ومىردەن ءبىر مىسال: كەشە تاكسيگە وتىرىپ, جۇمىسقا كەلە جاتىر ەدىك. جۇرگىزۋشى كولىگىنە ءبىر مەزگىلدە ءۇش بىردەي جولاۋشىنى وتىرعىزدى. سارىارقا داڭعىلىنداعى كولىك كەپتەلىسىنە كەلگەندە, ول ءسوز باستادى. سونداعى اڭگىمەسىنىڭ سيقى مىناۋ: «وسى كەپتەلىس جول پوليتسياسى قىزمەتكەرلەرىنىڭ كەسىرىنەن بولادى. جول سىلتەپ, ۇيىقتاپ تۇراتىنى نەسى؟ شەتەلدە مۇنداي اتىمەن جوق. مۇندايدى تەك ءبىزدىڭ ەلدە عانا كورۋگە بولادى…».
الگىنىڭ «اڭگىمەسىن» تىڭداۋعا ەشكىمنىڭ نيەتى جوق ەدى. ول بولسا, «كىم قوسىلىپ جاماندار ەكەن» دەگەندەي تۇرمەن بىزگە قارادى. قولداۋ تاپپاعان سوڭ, اڭگىمەنىڭ اۋانىن باسقاعا بۇردى. ايتايىن دەگەنىم, قازىرگى قوعامدا وزىنىكىنەن گورى, وزگەنىكىن ۇلگى تۇتاتىن ازاماتتار قاتارى كوبەيىپ بارادى. وزىڭدەگىگە كوڭىلى تولماي, وزگەنى قالايدى. وزىنىكىن داتتايدى, ال, باسقانى ماقتايدى. وزىندە بارعا قاناعات ەتپەيدى. اڭگىمە وسىندا.
شەتەلدە كەپتەلىس جوق دەگەندى الەمنىڭ بارلىق قالاسىن ارالاپ شىعىپ ايتسا, ءبىر ءسارى. كورشى تۇرعان ماسكەۋدىڭ كەپتەلىسى تۋرالى ايتىلىپ كەلە جاتقانىنا بىرنەشە جىلدىڭ ءجۇزى بولدى. ءتىپتى, ماسكەۋدىڭ مەرى اۋىسقان سايىن حالىق ءھام بيلىك تاراپىنان قويىلاتىن №1 مىندەت – كەپتەلىستى جويۋ. سول سياقتى, ىرگەتاسى جۇزدەگەن جىل بۇرىن قالانعان ستامبۋل, ۆارشاۆا قالالارى الەم بويىنشا كەپتەلىستىڭ باسىندا تۇر. استانانىكى ونىڭ قاسىندا انشەيىن! جۇرتتىڭ جيىرما مينۋت تۇرعانعا جانى شىعىپ كەتە جازدايدى. ونىسىن دا تۇسىنۋگە بولار. بىراق, اسىقتىم ەكەن دەپ, باسقاعا ءتيىسىپ, كەكەتۋگە بولا ما ەكەن؟
جۇمىسىمىزعا اسىعىپ بارا جاتساق تا, ءبىزدىڭ بۇلاي نالۋىمىزعا تۇرتكى بولعان كەپتەلىستەن بۇرىن الگى جۇرگىزۋشىنىڭ ارەكەتى بولدى. بىرەۋدىڭ ىسىنە قىزعانىپ قارايتىنداي, قولدان ءىس كەلمەيتىندەي, قازاق قور ەمەس قوي. باسقا ەلدە كەپتەلىس جوق ەكەن دەپ, ءوز ەلىڭدى جەك كورۋ كەرەك ەمەس. سەبەبى, قازاقتىڭ ەلى دە, جەرى دە – وسى!
اينۇر شوشاەۆا,
a.shoshaeva@astana-akshamy.kz
