«بوبەك» جاردەمدەسەدى
استانالىق ەۋرازيا گۋمانيتارلىق ينستيتۋتى «پەداگوگيكا جانە پسيحولوگيا» ماماندىعىنىڭ ستۋدەنتى پەريزات وڭعاربەك, ەۋرازيا گۋمانيتارلىق ينستيتۋتى كوللەدجىنىڭ «مەكتەپكە دەيىنگى ءبىلىم» ماماندىعىنىڭ ستۋدەنتتەرى الينا قاليبەك پەن ايدا جانتۋاروۆا سارا نازارباەۆانىڭ ءبىلىم گرانتىنا يە بولدى.
نەگىزىنەن, سارا نازارباەۆانىڭ ءبىلىم گرانتتارى جەتىم, اتا-اناسىنىڭ قامقورلىعىنسىز قالعان, تۇرمىسى تومەن جانە كوپ بالالى وتباسىلاردان شىققان بالالارعا الەۋمەتتىك كومەك كورسەتۋ ماقساتىندا ساراپتامالىق كوميسسيامەن تاعايىندالادى. وتكەن جىلى وسى اتاۋلى گرانتتى ەلوردالىق ءبىلىم باسقارماسىنىڭ «كامەلەتكە تولماعان بالالار باسپاناسى» مم ءتاربيەلەنۋشىسى ديانا بەكنازاربەكوۆا يەلەنگەن. ول بۇگىندە استانا قالاسىنداعى گۋمانيتارلىق كوللەدجدە «باستاپقى ءبىلىم» ماماندىعى بويىنشا وقىپ ءجۇر.
باسىنان باستاپ بايانداپ وتسەك, سارا نازارباەۆا جەتەكشىلىك ەتەتىن «بوبەك» قايىرىمدىلىق قورى 1992 جىلى قۇرىلعان بولاتىن. قور قىزمەتىنىڭ باستى ءمىندەتى – جەتىم بالالارعا كومەكتەسۋ. ويتكەنى, ەل تاۋەلسىزدىگىنىڭ العاشقى كەزەڭىندە ءجاسوسپىرىمدەردى قورعاۋ ماسەلەسى ەرەكشە كوڭىل ءبولۋدى قاجەت ەتەتىن. وسى جىلدارى «ءبوبەكتىڭ» باستاماسىمەن جۇزدەگەن قايىرىمدىلىق اكتسياسى وتكىزىلدى. ال, 2002 جىلدان باستاپ بۇل قور اتا-اناسىنىڭ قامقورلىعىنسىز قالعان جانە تۇرمىسى تومەن بالالاردان باستاپ, ستۋدەنتتەرگە دە كومەك كورسەتۋدى قولعا الدى. ەندى, بيىل «بوبەك» قورى ەلىمىزدىڭ جوعارى وقۋ ورىندارىندا, تەحنيكالىق جانە كاسىبي ءبىلىم مەكەمەلەرىندە وقۋعا سارا نازارباەۆانىڭ 70 ءبىلىم گرانتىن ءبولىپ وتىر.
ەركەعالي بەيسەنوۆ