شەۆرون كومپانياسىنىڭ قولداۋىمەن استانا قالالىق بالالار كوركەمسۋرەت مەكتەبى ەلباسى كىتاپحاناسى عيماراتىندا «بولاشاق قازاقستاننىڭ ەنەرگياسى» بالالار شىعارماشىلىعى كورمەسىن وتكىزىپ, وسى تاقىرىپتا وتكىزىلگەن رەسپۋبليكالىق سايىستىڭ جەڭىمپازدارىن ماراپاتتادى.
اتى ايتىپ تۇرعانداي, بۇل سايىس «ەكسپو-2017» حالىقارالىق مامانداندىرىلعان كورمەسىنىڭ اشىلۋىنا وراي ۇيىمداستىرىلدى. سايىس بالالارعا قورشاعان ورتانى قورعاۋ, ەكولوگيالىق مادەنيەتكە تاربيەلەۋ جانە وسكەلەڭ ۇرپاقتىڭ اراسىندا بەينەلەۋ ونەرىن ناسيحاتتاپ, شىعارماشىلىق قابىلەتتەرىن ارتتىرۋ ماقساتىندا ءوتتى.
كورمەگە 12-16 جاس ارالىعىنداعى ەلىمىزدىڭ تۇكپىر-تۇكپىرىنەن سايىسقا قاتىسقان وقۋشىلاردىڭ ەڭ ۇزدىك 100-دەن استام جۇمىسى قويىلدى. بايقاۋعا رەسپۋبليكا بويىنشا 17 كوركەمونەر ۇيىمدارىنىڭ شاكىرتتەرى مەن استانا قالالىق بالالار ءۇيىنىڭ تاربيەلەنۋشىلەرى قاتىستى. سايىسقا تۇسكەن جۇمىستارعا سۋرەتشىلەر وداعى, ونەر قايراتكەرلەرى جانە قر ەڭبەگى سىڭگەن سۋرەتشىلەردەن قۇرالعان كاسىبي قازىلار القاسى تورەلىك ەتتى.
بايقاۋدىڭ ءتورت كۇنىندە دە استانا قالالىق يۋنەسكو كلۋبى – بالالار كوركەمسۋرەت مەكتەبى قىزمەتكەرلەرىنىڭ دايىنداعان تانىمدىق جانە ويىن-ساۋىق باعدارلاماسى جوعارى دەڭگەيدە ءجۇردى. ەكسپو-نىڭ قارساڭىندا ەلوردانى كورۋگە, تانىمال سۋرەتشىلەرمەن كەزدەسۋگە, ءارتۇرلى شەبەرلىك سىنىپتارىنا قاتىسۋعا مۇمكىندىك العان جاس سۋرەتشىلەردىڭ قۋانىشتارىندا شەك جوق. ايتا كەتۋ كەرەك, سۋرەت كونكۋرسى وتكىزىلگەن ۋاقىتتا «بولاشاق قازاقستاننىڭ ەنەرگياسى» شىعارماشىلىق سايىسىنىڭ جەڭىمپازدارى ءۇشىن بەينەلەۋ ونەرى, ساندىك-قولدانبالى ونەر, كەراميكا جانە مۇسىندەۋ ونەرلەرى بويىنشا شەبەرلىك سىنىپتارى دا وتكىزىلدى. بۇعان قوسا, بالالار ءۇشىن قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىندا, قازاقستان رەسپۋبليكاسىنىڭ ۇلتتىق مۋزەيىندە ەكسكۋرسيالار جۇرگىزىلىپ, قۇندى اقپاراتتار الۋ مۇمكىندىگىنە يە بولدى. ارنايى بالالاردى قورعاۋ كۇنىنە الماتى قالاسىنان كاسىبي كينولوگتار توبى كەلىپ, مۋزەي عيماراتىنىڭ الدىنداعى الاڭدا كورنەكى باعدارلاماسىن پاش ەتتى.
ەستەلىككە تولى كەرەمەت كونكۋرستىڭ ناتيجەسىندە 12-14 جاس ارالىعى بويىنشا باس جۇلدەنى استانالىق الينا ۋتاەۆا السا, 15-16 جاس ارالىعى بويىنشا اقتوبەلىك ديانا وتەتىلەۋوۆا جەڭىسكە جەتتى.
گۇلجان راحمان
