س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە ەلباسىنىڭ «نۇرلى جول – بولاشاققا باستار جول» اتتى جولداۋىن تالقىلاۋ ماقساتىندا رەسپۋبليكالىق اقپارات توبى وكىلدەرى ۋنيۆەرسيتەت ۇجىمىمەن كەزدەستى.
جيىن بارىسىندا ينۆەستيتسيالار جانە دامۋ مينيسترلىگىنىڭ وكىلدەرى ب.بەكەنوۆ, م.مولدابەكوۆ پەن ەنەرگەتيكا مينيسترلىگى كليماتتىڭ وزگەرۋى جونىندەگى دەپارتامەنتتىڭ ديرەكتورى گ.سەرعازينا جولداۋدى جان-جاقتى ءتۇسىندىردى. اتالمىش شاراعا اگروتەحنيكالىق ۋنيۆەرسيتەتتىڭ رەكتورى ا.كۇرىشباەۆ باستاعان جوعارى وقۋ ورىندارىنىڭ وقىتۋشىلارى مەن ستۋدەنتتەرى قاتىستى.
ينۆەستيتسيالار جانە دامۋ مينيسترلىگى ستراتەگيالىق جوسپارلاۋ دەپارتامەنتىنىڭ ديرەكتورى ب.بەكەنوۆ ەلباسىنىڭ «نۇرلى جول – بولاشاققا باستار جول» اتتى جولداۋى ستراتەگيالىق جانە جەدەل ماڭىزى بار قۇجات رەتىندە تاريحقا ەنەتىن بۇگىنگى كۇننىڭ ماڭىزدى جاڭالىقتارىنىڭ ءبىرى ەكەنىن ايتتى. سونىمەن قاتار ول ەلىمىزدىڭ ينفراقۇرىلىمىن جانە تەمىرجول سالاسىن دامىتۋ تۋرالى ءسوز قوزعادى. ينۆەستيتسيالار جانە دامۋ مينيسترلىگىنىڭ اەروعارىش كوميتەتى توراعاسىنىڭ ورىنباسارى مەيىربەك مولدابەكوۆ اتالعان سالاداعى اتقارىلىپ جاتقان يگى ىستەرى تۋرالى اڭگىمەلەدى.
كليماتتىڭ وزگەرۋى جونىندەگى دەپارتامەنت ديرەكتورى گ.سەرعازينانىڭ بايانداماسى ەنەرگەتيكا سالاسىنداعى جۇمىستار جايىندا ءوربىپ, قارا التىننىڭ قورى مەن ونى يگەرۋگە ينۆەستيتسيا تارتۋ بارىسىنا توقتالدى.
كەزدەسۋ سوڭىندا اقپارات توبىنىڭ وكىلدەرى وقىتۋشىلار مەن ستۋدەنتتەردىڭ سۇراقتارىنا جاۋاپ بەرىپ, پىكىر الماستى.
باعلان ورازالى
