«بولاشاق» ونەرلى ورەندەرگە قولداۋ ءبىلدىردى
نازارباەۆ ورتالىعىندا «بولاشاق» قورى «مەنىڭ اينالامداعى الەمىم – مەنىڭ شىعارماشىلىق ءومىرىم» اتتى II رەسپۋبليكالىق كوركەمونەر تۋىندىلارىنىڭ بايقاۋ قورىتىندىسىن شىعاردى.
قور 2010 جىلدان باستاپ «قۇلانشى» قازىرگى زامانعى ونەر ورتالىعى جانە «يۋنەسكو» بالالار كوركەمسۋرەت مەكتەبىنىڭ قولداۋىمەن بالالار ۇيلەرى ءتاربيەلەنۋشىلەرىنىڭ اراسىنان تالانتتاردى تاۋىپ, ولاردىڭ شىعارماشىلىعىن شىڭداۋعا كومەك كورسەتىپ كەلەدى.
ماسەلەن, بىلتىرعى بايقاۋدىڭ ءۇش جەڭىمپازى قازاق ۇلتتىق ونەر ۋنيۆەرسيتەتىنە وقۋعا شاقىرىلدى. ال بيىلعى بايقاۋعا 200 ۇمىتكەر قاتىستى. ولار جينالعان جۇرتقا ماتادان, اعاشتان, مەتالدان جاسالعان بۇيىمدارىن ۇسىندى.
11-13 جاس ارالىعىندا ءبىرىنشى ورىندى پاۆلودار قالاسىنداعى مۇمكىندىگى شەكتەۋلى بالالاردى بەيىمدەۋ ورتالىعىنىڭ تاربيەلەنۋشىسى انەل تولەپوۆا مەن اقمولا وبلىسى ۋريۋپينكا اۋىلىنداعى №1 بالالار ءۇيىنىڭ تاربيەلەنۋشىسى كيريلل مويسەەۆ جەڭىپ الدى. 14-16 جاس ارالىعىندا استاناداعى بالالار ءۇيىنىڭ بويجەتكەنى زەمفيرا مليۋكوۆا مەن اقتوبە وبلىسى تامدى مەكتەپ-ينتەرناتىنىڭ وقۋشىسى تيمۋر مولداعاليەۆ ۇزدىك دەپ تانىلدى. 7-11 ماۋسىمدا نازارباەۆ ورتالىعىندا ونەرلى ورەندەر تۋىندىلارىنىڭ قايىرىمدىلىق كورمەسى بولادى. تۇسكەن تابىس بالالاردىڭ وزدەرىنە بەرىلەدى.
ىرىستى جالعاسباي