كەشە ماحامبەت وتەمىسۇلى اتىنداعى وقۋشىلار سارايىندا قالالىق ءبىلىم باسقارماسى «استانا – تەڭ مۇمكىندىكتەردىڭ قالاسى» اتتى تەحنيكالىق جانە كاسىپتىك ءبىلىم بەرۋ مەكەمەلەرىنىڭ كورمە-فەستيۆالىن وتكىزدى.
جىل سايىن وتكىزىلەتىن بۇل شاراعا قالامىزداعى 34 كاسىپتىك ءبىلىم بەرۋ مەكەمەلەرى تۇگەلدەي قاتىستى. وقۋ ورىندارى وزدەرى دايارلايتىن ماماندىقتارى جايىندا حابار بەرىپ, تۇلەكتەرگە بولاشاقتا ماماندىق تاڭداۋدىڭ ماڭىزىن ءتۇسىندىردى. جالپى ءبىلىم بەرەتىن مەكتەپتەردىڭ 9-11-سىنىپ وقۋشىلارىنا تەحنيكالىق جانە كاسىپتىك ءبىلىم بەرۋ مەكەمەلەرىندە وقىتاتىن ماماندىق تۇرلەرى تانىستىرىلدى.
بۇگىنگى تاڭدا جاس تۇلەكتەردىڭ نازارى اۋا بەرمەگەنىمەن, سۇرانىسى جوعارى «شاشتاراز ونەرى جانە ساندىك كوسمەتيكا», «تىگىن ءوندىرىسى جانە كيىمدى مودەلدەۋ», «قوناقۇي شارۋاشىلىعىندا قىزمەت كورسەتۋدى ۇيىمداستىرۋ» ءتارىزدى ماماندىق تۇرلەرى دە بار. كەلەشەكتە قۇرىلىستىڭ قارقىندى جۇرگىزىلۋىنە بايلانىستى قۇرىلىسشى مامانداردىڭ تاپشىلىعى سەزىلەتىنىن الدىن الا بولجاپ وتىرعان استانا قالاسى اكىمدىگىنىڭ قۇرىلىس-تەحنيكالىق كوللەدجى تۇلەكتەرگە «قۇرىلىس, عيماراتتاردى سالۋ جانە پايدالانۋ ءىسى», «دانەكەرلەۋ ءىسى» ماماندىقتارىن تاڭداۋعا كەڭەس بەردى. ادام جانىنىڭ اراشاسى بولار مەديتسينا قىزمەتكەرلەرىن دايارلايتىن «دانالىق» كوللەدجى دە ءوز جۇمىستارىن دارىپتەدى.
كورمەگە قالامىزدىڭ كوپتەگەن مەكتەپتەرىنەن وقۋشىلار كەلىپ, وزدەرىن قىزىقتىرعان ماماندىقتار توڭىرەگىندەگى اقپاراتتارعا قانىقتى. بولاشاققا قادام جاسار تۇستا الدىڭعى بۋىن اعالاردان كەڭەس سۇرادى.
كورمە-فەستيۆلدىڭ سوڭى تەحنيكالىق جانە كاسىپتىك ءبىلىم بەرۋ مەكەمەلەرىنىڭ ستۋدەنتتەرى ارنايى دايىنداعان كونتسەرتكە ۇلاستى.
دوسجان سقاقوۆ
