«استانا وپەرادا» پ. ي. چايكوۆسكيدىڭ «اققۋ كولى » قويىلادى. وندا بوستوننان كەلگەن لاشا حوزاشۆيلي زيگفريد شاحزادانىڭ پارتياسىن ورىندايدى. ونىڭ سىڭارى ودەتتا-وديلليانى قازاقستان بالەتىنىڭ ماقتانىشىنا اينالعان ايگەرىم بەكەتاەۆا بيلەيدى. بالەتتىك سپەكتاكل ءبىرىنشى «جىبەك جولى» حالىقارالىق فەستيۆالى اياسىندا ۇسىنىلىپ وتىر.
بوستوندىق بالەتتىڭ پرەمەرى قازاقستانعا العاش رەت كەلەتىنىن ايتادى. «مەن الەمنىڭ ەڭ جاقسى تەاترلارىنىڭ ءبىرى بولىپ سانالاتىن «استانا وپەرا» تەاترى جايلى كوپ ەستىدىم. بۇل مەلپومەنا ورداسى ءوزىنىڭ كۇللى مادەني كەڭىستىكتەگى ەڭ قىزىقتى جانە بولاشاعى زور ونەر وشاعى ەكەنىن بۇكىل الەمگە مالىمدەگەنىن اتاپ وتكىم كەلەدى. ەگەر ناقتى قازاقستاندىق بالەت جايلى ءسوز قوزعاساق, بۇل جەردە تاماشا دەڭگەيلى كلاسسيكالىق مەكتەپ بارىن بىلەمىن. «جىبەك جولى» ىسپەتتەس فەستيۆالدار مەن دۇنيە ءجۇزى بويىنشا ءوتىپ جاتقان وزگە كونكۋرستاردىڭ ارقاسىندا ەرلان اڭداعۇلوۆ جانە دوسجان تابىلدى سياقتى قازاقستاننىڭ ارتىستەرىمەن تانىسىپ ۇلگەردىم. ءبىز جاقسى دوستارمىز جانە مەن ولاردىڭ كاسىبي دەڭگەيىن جوعارى باعالايمىن» دەيدى ول.
«اققۋ كولى» بالەتىندەگى زيگفريد پارتياسى كلاسسيكالىق ەركەكتەر ءبيىنىڭ ۇلگىسى بولىپ تابىلادى. «اتالعان پارتيا جان دۇنيەمە جاقىن. شاحزادانىڭ ءرولىن ويناعان كەزدە بالەت ونەرىنىڭ تاماشا الەمىندە جانىمنىڭ قالاي شىرقاپ سالا بەرەتىنىن سەزەمىن» دەيدى لاشا حوزاشۆيلي. سونىمەن قاتار, ول كورەرمەندەرگە بوزبالا مەن بويجەتكەننىڭ نازىك سەزىمدەرى جايلى تۋرالى تەرەڭ وي نەگىز بولعان سىرعا تولى جانە سيقىرلى كلاسسيكالىق بالەت – «اققۋ كولى» سپەكتاكلىنەن ءلاززات الۋدى تىلەدى.
لاشا حوزاشۆيلي تبيليسيدە دۇنيەگە كەلگەن. 2010 جىلى بوستوندىق بالەت قۇرامىنا پرەمەر رەتىندە كىردى. 1994 پەن 2002 جىلدار ارالىعىندا تبيليسيدەگى ۆ. چابۋكياني اتىنداعى حورەوگرافيالىق ۋچيليششەدە وقىعان. كەيىن ز. پالياشۆيلي اتىنداعى مەملەكەتتىك وپەرا جانە بالەت تەاترىنىڭ بالەتتىك ترۋپپاسىنا جەتەكشى سوليست رەتىندە قابىلداندى. گرۋزيانىڭ مەملەكەتتىك بالەتى قۇرامىندا بيلەپ جۇرگەن كەزىندە ونى «Ballet Dance» جۋرنالى «ەرلەر ترۋپپاسىنداعى ەڭ سەزىمتال ءبيشى» دەپ اتادى. 2008 جىلى ول جيلبەر البەر جانە نينا ءانانياشۆيليدىڭ «جۇلدىز» حالىقارالىق سىيلىعىمەن ماراپاتتالدى.
حوزاشۆيلي گرۋزيا مەملەكەتتىك بالەت ترۋپپاسىنىڭ اقش-تاعى جانە جاپونياداعى گاسترولدەرىن قاتىستى. سونداي-اق, ول «سپولەتتو» جانە «دجەيكوبس پيللوۋ» فەستيۆالدارىندا «اققۋ كولى» مەن «دون كيحوتتا» باستى پارتيالاردا, سونىمەن قاتار, دجوردج ءبالانچيننىڭ «موتسارتيانا» جانە «Duo Concertant» بالەتتەرىندە ونەر كورسەتتى.
ەركەجان ساتىمبەك
