ولار – كولۋمبيا, فرانتسيا, كوستا-ريكا, ارگەنتينا, بەلگيا. ءوز توبىنداعى ءۇش قارسىلاستى شاڭ قاپتىرعان جۇيرىكتەر. ەلدىڭ ابىرويى جولىندا ەرتە قامدانعاندار دەسەك تە بولادى-اۋ…
«ا» توبى. ويدا جوقتا مەكسيكامەن تەڭ ويناعان الاڭ يەلەرى سوڭعى تۋردا كامەرۋندى ءىرى ەسەپپەن ۇتىپ, توپتان ءبىرىنشى بولىپ شىعۋدى ويلايدى. ال ەكىنشى ورىن ءۇشىن حورۆاتيا مەن مەكسيكانىڭ جان بەرىپ, جان الىساتىنى انىق.
«ۆ» توبى. سوڭعى تۋردا ءبىر-بىرىمەن كەزەدەسەتىن گوللانديا مەن چيلي توپ تىزگىنىن قولعا الۋ ءۇشىن عانا تالاسقا تۇسەدى. تەڭ ويىن بولعان جاعدايدا «قىزعالداقتىلاردىڭ» جولى بولدى دەي بەرىڭىز. چيلي – ەكىنشى.
ەسكەرتە كەتەيىك, «ا» جانە «ۆ» توبىنداعى سوڭعى كەزدەسۋلەر وتكەن تۇندە وينالعانىنا بايلانىستى قورىتىندىسىن الدىن-الا جاريالاۋ مۇمكىن بولمادى.
«س» توبى. كولۋمبيا الدىنا قارا سالمادى. ال كەلەسى كەزەڭگە وتەتىن ەكىنشى كوماندانىڭ تاعدىرى – كوت د’يۆۋار, گرەكيا, جاپونيا قۇرامالارىنىڭ ءوز قولىندا.
«D» توبى. ءۇش الەم چەمپيونىمەن ءبىر توپقا تۇسكەن كوستا-ريكا قۇراماسىنىڭ جانازاسىن الدىن-الا وقىپ تاستاعانىمىز راس ەدى. قاتەلەسىپپىز. ۋرۋگۆاي مەن يتاليانى جەر جاستاندىرعان ولار ءوز توبىنىڭ ءبىرىنشى كومانداسىنا اينالدى. ال سوڭعى تۋردا ۋرۋگۆاي-يتاليا قۇرامالارىنىڭ اراسىنداعى «سوعىسقا» كۋا بولاتىنىمىز انىق.
«ە» توبى. فرانتسيا وزدەرى قالاعان ناتيجەگە قول جەتكىزدى. 6 ۇپايمەن توپ باستادى. ال ەكىنشى ورىنعا شۆەيتساريا مەن ەكۆادور قول سوزادى. بۇل رەتتە ەۋروپالىقتاردىڭ ءۇمىتى باسىم.
«F» توبى. ارگەنتينا دا العاشقى ەكى ويىندا جەڭىلىس كورمەي, پلەي-وفف كەزەڭىنە ءبىرىنشى بولىپ جولداما الدى. ەندى ولاردىڭ ىزىنە ەرۋ ءۇشىن يران مەن نيگەريا تالاساتىن بولادى.
«G» توبى. سوڭعى تۋردا تيىسىنشە 4 ۇپايى بار قوس كوماندا – اقش پەن گەرمانيا ءوزارا باق سىناسىپ, توپتان ءبىرىنشى بولىپ شىعۋ جاعىن قاراستىرادى. پورتۋگاليا ءوز ەسەپتەرى ءۇشىن «نەمىس ماشيناسىنىڭ» جەڭىسىن تىلەي وتىرىپ, گانالىقتاردى ۇتۋعا تىرىسادى. ال افريكالىق فۋتبولشىلار اقش-تىڭ ءىرى جەڭىسى ارقاسىندا وزدەرى دە رونالدۋلاردى تاپتاپ ءوتىپ, كەلەسى كەزەڭگە شىعاتىن سەنىمدە.
«ن» توبى. بەلگيا توپتان ءبىرىنشى شىقتى. ال الجير, رەسەي, وڭتۇستىك كورەيا فۋتبولشىلارىنىڭ تاعدىرى سوڭعى تۋرعا بايلانىپ تۇر. كىمنىڭ ەكىنشى بولارىن ناقتى ايتۋ قيىن.
ءاپ دەگەنشە الەم بىرىنشىلىگىنىڭ ەكى اينالىمى وتە شىقتى. ءبىز بىلەتىن تاعى دا بەس انىق بار. ولاردىڭ ساناتىنا قازىرگى الەم چەمپيوندارى يسپانيا, انگليا, اۆستراليا, گوندۋراس جانە بوسنيا-گەرتسەگوۆينا ەنەدى. بۇلار – اتتىعا ەرىپ تاڭى ايىرىلعان جاياۋدىڭ كەبىندەگى قىرسىزدار. كىل مىقتىنىڭ سوڭىنا ەرە الماي ەرتە وشكەندەر. جارايدى, ۇلكەن جارىسقا العاش رەت قاتىسقان بوسنيالىقتاردى تۇسىنۋگە بولادى. سونداي-اق, گوندۋراس پەن اۆستراليانى دا قارالاۋدان اۋلاقپىز. ءبىزدى تاڭ قالدىرعانى – اعىلشىندار مەن يسپاندار. «چەلسي» مەن «مانچەستەر يۋنايتەد», «رەال مادريد» پەن «بارسەلونانىڭ» جىگىتتەرى جەرگە قاراعان ۋاقىتتا فۋتبول الەمىنە تىڭ سەرپىن ەنگەنىن بايقادىق. ولاردان باسقا دا حالىقتىڭ دوپ تەبەتىنىنە كوز جەتكىزدىك. ءبىر وكىنىشتىسى, جاڭا بۋىننىڭ قاتارىندا قازاقتىڭ جىگىتتەرى جوق.
