2003 جىلى بريتانيالىق بۇقارالىق اقپارات قۇرالدارى مۇسىلمانداردىڭ كوبەيۋىنە بايلانىستى كەلەشەكتە ۇلىبريتانيانىڭ يسلام ەلىنە اينالۋى مۇمكىن ەكەندىگىن ايتىپ, دابىل قاققان بولاتىن.
اراعا بەس جىل سالىپ, بريتانيا بيلىگى كەلەشەكتە يسلام ءدىنى ەلدە كەڭ قانات جاياتىنى تۋرالى زەرتتەۋ تۇجىرىمىن جاريالادى.
بريتانيادا ەۋروپانىڭ وزگە دە زايىرلى ەلدەرىندەگى سەكىلدى يمميگرانت مۇسىلمانداردىڭ قاراسى ارتىپ كەلەدى. جۋىردا عانا ناتيجەسى جارىق كورگەن زەرتتەۋدەن بەلگىلى بولعانداي, بۇل ەلدە حريستيان ءدىنى ەلۋ پايىزدىق كورسەتكىشپەن باسىمدىققا يە بولعانىمەن, ەل تۇرعىندارىنىڭ جارتىسىنان كوبىسىنىڭ جاسى ەلۋدەن اسىپ كەتكەن.
جاسى 25-كە تولا قويماعان جاستاردىڭ از عانا بولىگى وزدەرىن حريستيان سانايدى.
2011 جىلعى مالىمەتكە سەنسەك, ەلدەگى حريستيانداردىڭ كوبىسىن تورىنەن كورى جۋىق ەگدە, قارت ادامدار قۇراسا, مۇسىلمانداردىڭ دەنى جاستاردان تۇراتىنى بەلگىلى بولدى. 2001-2011 جىلدار ارالىعىندا انگليا مەن ۋەلس تۇرعىندارىنىڭ جالپى سانى 3,7 ملن ادامعا ارتقان. الايدا, حريستيان ءدىنىن ۇستاناتىنداردىڭ قاتارى 4,1 ملن ادامعا كەمىگەن. ال, 6,4 ملن ادام اتەيست ەكەنىن العا تارتقان. وسى ارالىقتا مۇسىلمانداردىڭ قاراسى 1,2 ملن ادامعا كوبەيگەن.
تاعى ءبىر دەرەك, بريتانياداعى مۇسىلمانداردىڭ جارتىسىنا جۋىعىنىڭ جاسى جيىرما بەسكە تولماعان جانە ەلۋدى ەڭسەرە قويماعانداردىڭ توقسان پايىزى مۇسىلماندار. سونداي-اق, حريستياندارعا قاراعاندا مۇسىلمانداردىڭ تەگى, ءناسىلى, ۇلتى ءار الۋان.
بريتانيا مۇسىلماندارىنىڭ كوبى – ازيادان كەلگەن يمميگرانتتار. بۇگىنگى تاڭدا پاكىستاننان جارتى ميلليونننان استام, ال بانگلادەشتەن شامامان 400 مىڭ مۇسىلمان وسى ەلگە قونىس اۋدارعان.
كەمبريدج ۋنيۆەرسيتەتىنىڭ پروفەسسورى فرەيزەر ۋوتتستىڭ ايتۋىنشا, الداعى ون جىلدىڭ ىشىندە حريستياندار سانى كۇرت ازايۋى عاجاپ ەمەس. سونىمەن قاتار, 2011 جىلى انگليا مەن ۋەلستە مۇحاممەد ەسىمىن يەلەنگەندەردىڭ قاتارى ارتقان.
