بۇگىنگى بوزبالا – بولاشاق جاۋىنگەر
قازاقستان اسكەرىنىڭ قاتارى جاس ساربازدارمەن تولىعادى. سوعان سايكەس وتان الدىنداعى بورىشىن وتەگىسى كەلگەن بوزبالالارعا ارنالعان «استانا جاستارى جانە قارۋلى كۇشتەر – ءبىرتۇتاس» اتتى پاتريوتتىق جيىن ءوتتى.
مەرەكەلىك شارا استاناداعى ≪وتان قورعاۋشىلار≫ الاڭىندا بولدى. وعان قاراشا ايىنا دەيىن وتان الدىنداعى بورىشىن وتەۋ ءۇشىن اسكەرگە اتتاناتىن بولاشاق وتان قورعاۋشىلار مەن مەرزىمدى قىزمەتتەگى اسكەري قىزمەتشىلەر كوپ جينالدى. سالتاناتتى شارا ≪وتان قورعاۋشىلار≫ مونۋمەنتىنە گۇل شوقتارىن قويۋ راسىمىمەن باستالدى. وسىدان كەيىن جيىنعا قاتىسۋشىلار سۇراپىل سوعىستاردا قۇربان بولعان قازاقستاندىق جاۋىنگەرلەردى ءبىر مينۋت ۇنسىزدىكپەن ەسكە الدى.
ال رەسمي ءبولىم بىتكەن سوڭ, جاستار دەسانتشىلاردىڭ قويان-قولتىق ۇرىستارىن كوردى. بۇندا سايىپقىران ساربازدار جاۋىنگەرلىك شەبەرلىكتەرىن كورسەتىپ جاتتى. ال جاستار بولسا, ولاردىڭ شەبەر قيمىلدارىن ەرەكشە ىنتا-ىقىلاسپەن تاماشالادى. سونداي-اق, ≪اسكەر – ءجاسوسپىرىم كوزىمەن≫ اتتى سولدات كيىم ۇلگىسىنىڭ كورمەسى ۇيىمداستىرىلدى. مۇندا قورعانىس مينيسترلىگى, رەسپۋبليكالىق ۇلان, ىشكى ىستەر مينيسترلىگىنىڭ ىشكى اسكەرلەرى, ۇلتتىق قاۋىپسىزدىك كوميتەتى شەكارا اسكەرلەرىنىڭ قارۋ-جاراقتارى, كيىم-كەشەكتەرىمەن تانىستى. ≪ەرتەڭگى كۇنى بولاشاق ساربازدار وسى زاتتاردى پايدالانىپ, ەل قورعاۋدىڭ قىرى مەن سىرىن مەڭگەرەتىن بولادى≫, دەيدى ۇيىمداستىرۋشىلار. وسىدان كەيىن ارنايى اسكەري شاتىردا جاستار سولدات بوتقاسىنىڭ ءدامىن تاتىپ كوردى. ءىس-شارادا جاستار الدىندا ≪نۇر وتان≫ حدپ استانا قالالىق فيليالى توراعاسىنىڭ ءبىرىنشى ورىنباسارى قايرات جاڭابەرگەنوۆ, حالىق قاھارمانى, قر پارلامەنت ءماجىلىسىنىڭ دەپۋتاتى باقىتجان ەرتاەۆ, لوندون وليمپياداسىنىڭ چەمپيونى سەرىك ساپيەۆ ءسوز سويلەپ, ءسات-ساپار تىلەدى. ال ءوز كەزەگىندە اسكەرگە الىناتىن جاستار بولسا, بولاشاقتا اعا بۋىن داستۇرلەرىنە ادالدىق تانىتاتىندارىن ءبىلدىردى. ولار اسكەر قاتارىندا بولۋ ءار ازاماتتىڭ بورىشى دەپ ەسەپتەيدى. شارا اسكەريلەندىرىلگەن ≪جاس سارباز≫ اتتى تۋرنيرمەن اياقتالدى.
ەركەجان ساتىمبەك