استانا قالاسى ءماسليحاتىنىڭ كەزەكتەن تىس قىرىق توعىزىنشى سەسسياسىنا قالا اكىمىنىڭ ورىنباسارى ا.لۋكين, اۋدان اكىمدەرى, ەلوردالىق باسقارمالاردىڭ باسشىلارى مەن بۇقارالىق اقپارات قۇرالدارىنىڭ وكىلدەرى قاتىستى.
كۇن تارتىبىندەگى العاشقى ماسەلە بويىنشا قالالىق سايلاۋ كوميسسياسىنىڭ توراعاسى ي.جالبيروۆ بايانداما جاساپ, استاناداعى №4 سايلاۋ وكرۋگى بويىنشا جاقىندا وتكەن قالالىق ءماسليحاتتىڭ دەپۋتاتىن سايلاۋ قورىتىندىسى بويىنشا «استانا» مەديتسينا ۋنيۆەرسيتەتىنىڭ رەكتورى ءماجيت شايداروۆتىڭ جەڭىسكە جەتىپ, حالىق قالاۋلىسى اتانعانىن جەتكىزدى.
ودان كەيىن ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ج.نۇرپەيىسوۆ استانا قالاسىنىڭ 2015-2017 جىلدارعا ارنالعان بيۋدجەتىنە وزگەرىستەر مەن تولىقتىرۋلار ەنگىزۋدى ۇسىندى. وسىعان وراي, ول استانا قالاسىنىڭ 2015-2017 جىلدارعا ناقتىلانعان بيۋدجەت جوباسىندا رەسپۋبليكالىق بيۋدجەتتى ناقتىلاۋ شەگىندە نىسانالى ترانسفەرتتەر بويىنشا وزگەرىستەر مەن تولىقتىرۋلار ەسكەرىلگەنىنە توقتالا كەلە, «نۇرلى جول – بولاشاققا باستار جول» باعدارلاماسى بويىنشا قازاقستان رەسپۋبليكاسىنىڭ ۇلتتىق قورىنان بولىنگەن ترانسفەرتتەردىڭ 4 جانە 5-ەنگىزىلىمنىڭ جىلۋ ماگيسترالدارىن سالۋعا جانە تۇرعىن ۇيلەردىڭ جىلۋ تراسساسىن, سونداي-اق, №26 اپاتتى مەكتەپتى جوندەۋگە باعىتتالاتىنىن اتاپ ءوتتى. سونىمەن قاتار, وسى ناقتىلانۋ شەگىندە مەملەكەت باسشىسىنىڭ تاپسىرماسىن ورىنداۋعا وراي شىعىستاردى وڭتايلاندىرۋ جۇرگىزىلدى. ناتيجەسىندە, رەسپۋبليكالىق بيۋدجەتتى ناقتىلاۋ كەزىندە استانا قالاسى بويىنشا ترانسفەرتتەر 8 ملرد 464 ملن تەڭگەگە ازايتىلدى.
«وسىلايشا, استانانىڭ 2015 جىلعى ناقتىلانعان بيۋدجەتىنىڭ كولەمى 349,861 ملرد تەڭگەنى قۇرايدى. جەكە تابىستار بويىنشا تۇسكەن قارجى 169,194 ملرد تەڭگە, رەسپۋبليكا بيۋدجەتىنەن ترانسفەرتتەر 168,882 ملرد تەڭگە. قوسىمشا قارجى الەۋمەتتىك جانە ينفراقۇرىلىمدىق جوبالاردى ىسكە اسىرۋعا جۇمسالاتىن بولادى. بۇل رەتتە ەلوردانىڭ جولدارى مەن كوشەلەرى قايتا جوندەلىپ, سالىنادى, ينجەنەرلىك جەلىلەر تارتىلادى, ايالداما بەكەتتەرى قالپىنا كەلتىرىلىپ, جەدەل جاردەم بريگادالارى ءۇشىن جاڭا ماشينالار ساتىپ الىنادى. سونداي-اق, الداعى ۋاقىتتا قالالىق مەكتەپتەردىڭ جاپسارجايلارىن جوبالاۋ جانە جاڭا بالاباقشالار سالۋ جۇمىستارى جالعاسادى», – دەدى ج.نۇرپەيىسوۆ.
قالا اكىمىنىڭ ورىنباسارى ا.لۋكين بولسا, «نۇرلى جول» باعدارلاماسىنىڭ اياسىندا بيۋدجەتتەن بولىنگەن قارجى الدىمەن باس قالادا جىلۋ ماگيسترالدارى مەن مەكتەپتەر سالۋعا جۇمسالاتىنىن جەتكىزدى.
– بۇل رەتتە قالا اكىمدىگى بيۋدجەت قارجىسىن يگەرۋدى تۇراقتى تۇردە قاداعالاپ وتىرادى. سونىمەن بىرگە, بيۋدجەتتىك باعدارلامالار اكىمشىلەرىمەن بىرلەسكەن جۇمىستار جۇرگىزىلىپ, دەبيتورلىق جانە كرەديتورلىق قارىزداردىڭ وسۋىنە جول بەرمەۋ دە تۇراقتى باقىلاۋدا بولادى, – دەدى ا.لۋكين.
سەسسيا بارىسىندا سونداي-اق, جەڭىستىڭ 70 جىلدىعىن مەرەكەلەۋگە بايلانىستى استانا قالاسى ازاماتتارىنىڭ جەكەلەگەن ساناتتارىنا قوسىمشا الەۋمەتتىك كومەك كورسەتۋ ماسەلەسى تالقىلاندى. وسىعان وراي, استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءلاززات ابۋەۆا ۇلى وتان سوعىسىنىڭ ارداگەرلەرى مەن مۇگەدەكتەرىنە قارجىلاي وتەماقى تولەۋ مەن ولاردى بىرىڭعاي كيىمدەرمەن قامتاماسىز ەتىپ, تىلدا ەڭبەك ەتكەندەردى ءدارى-دارمەكتەرمەن قامتاماسىز ەتۋدە جانە ساناتوريالىق-كۋرورتتىق ەمدەلۋگە بارۋدا ەلۋ پايىز جەڭىلدىكتى پايدالانۋ جونىندەگى ۇسىنىسىن ءبىلدىردى. حالىق قالاۋلىلارى بۇل ۇسىنىستاردى ءبىراۋىزدان ماقۇلدادى.
سەسسيا بارىسىندا مەملەكەت مۇقتاجى ءۇشىن جەر ۋچاسكەلەرىن جانە وزگە دە جىلجىمايتىن مۇلىكتى ساتىپ الۋ تۋرالى شارتتاردىڭ جوبالارى كەلىسىلدى. بۇل جەرلەرگە 1200 وقۋشىعا لايىقتالعان مەكتەپ پەن 240 ورىندىق بالاباقشا سالىنباقشى.
سونىمەن بىرگە استانا قالاسى ءماسليحاتىنىڭ بىرقاتار شەشىمدەرىنە وزگەرىستەر ەنگىزىلىپ, قالا اكىمدىگىنىڭ جانىنداعى ۇكىمەتتىك ەمەس ۇيىمدارمەن ىنتىماقتاستىق جانە ءوزارا قارىم-قاتىناس جونىندەگى كونسۋلتاتيۆتىك كەڭەستىڭ, مەملەكەتتىك رامىزدەر جونىندەگى, سونداي-اق, ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيالاردىڭ قۇرامى وزگەرتىلدى.
