كەشە استانا قالاسى ءماسليحاتىنىڭ كەزەكتەن تىس شاقىرىلعان 52-سەسسياسى ءوتىپ, وعان زاڭدىلىق, قۇقىق ءتارتىبى جانە قوعاممەن جۇمىس ماسەلەلەرى جونىندەگى تۇراقتى كوميسسيا مۇشەسى ا.ف.كيم توراعالىق ەتتى.
سەسسيانىڭ جۇمىسىنا استانا قالاسى اكىمىنىڭ ورىنباسارى ا.ي.لۋكين, قالا قۇرىلىمدارى باسشىلارى, قوعامدىق ۇيىمدار وكىلدەرى قاتىستى.
سەسسيانىڭ كۇن تارتىبىندە استانا قالاسىنىڭ 2014 جىلعى بيۋدجەتىنىڭ ورىندالۋى تۋرالى; استانا قالاسى ءماسليحاتىنىڭ 2010 جىلعى 29 جەلتوقسانداعى «2011-2015 جىلدارعا ارنالعان استانا قالاسىن دامىتۋ باعدارلاماسى تۋرالى» شەشىمىنە وزگەرىستەر مەن تولىقتىرۋلار ەنگىزۋ تۋرالى; مەملەكەت مۇقتاجى ءۇشىن جەر ۋچاسكەلەرىن الۋعا بايلانىستى جەر ۋچاسكەلەرىن
نەمەسە جىلجىمايتىن وزگە مۇلىكتەردى ساتىپ الۋ تۋرالى شارتتاردىڭ جوباسىن كەلىسۋ, تاعى باسقا دا ون ءبىر ماسەلە قارالدى.
الدىمەن 2014 جىلعى بيۋدجەتتىڭ ورىندالۋى جونىندە استانا قالاسى قارجى باسقارماسىنىڭ باسشىسى ر.دوساەۆ بايانداما جاسادى.
– وتكەن جىلدىڭ بيۋدجەتتىك ساياساتىندا استانا قالاسىنىڭ دامۋ جانە بيۋدجەتتىك, اكىمشىلىك-بيۋدجەتتىك باعدارلامالارىندا بەلگىلەنگەن ماقساتتار مەن مىندەتتەرگە قول جەتكىزىلدى, – دەپ باستادى ول ءسوزىن.
ودان ءارى بايانداماشى ەسەپتى كەزەڭدە جەرگىلىكتى بيۋدجەتكە تيەسىلى كىرىستەردىڭ تۇسىمدەرى بويىنشا جوسپار 103,3%-كە ورىندالىپ, جوسپاردان تىس 5289,7 ملن تەڭگە تۇسكەنىن ايتتى.
سالىق تۇسىمدەرى بويىنشا دا 140225,2 ملن تەڭگەنىڭ ورنىنا 143953,9 ملن تەڭگە ءتۇسىپ, قالا بيۋدجەتىنىڭ قورجىنى 3728,7 تەڭگەگە نەمەسە 102,7%-عا تولىققان.
سونداي-اق, قارجى باسقارماسى باسشىسى سالىقتان تىس تۇسىمدەر مەن نەگىزگى كاپيتالدى ساتۋدان تۇسكەن تۇسىمدەر ەسەبىنە توقتالا كەلىپ, 2014 جىلى استانا قالاسى بيۋدجەتىنىڭ شىعىستارى 99,4%-عا نەمەسە 374741,5 ملن تەڭگەگە اتقارىلعانىن اتاپ كورسەتتى.
بۇدان كەيىن سەسسيادا تەكسەرۋ كوميسسياسىنىڭ توراعاسى ع.مولداش پەن قالالىق ەكونوميكا جانە بيۋجەتتى جوسپارلاۋ باسقارماسى باسشىسىنىڭ ورىنباسارى ا.تۇگەلباەۆانىڭ, تۇرعىن ءۇي ينسپەكتسياسى باسقارماسىنىڭ باسشىسى ت.رىسبەكتىڭ, تاعى دا باسقا ادامداردىڭ باياندامالارى تىڭدالدى.
سەسسيادا كۇن تارتىبىندە قارالعان بارلىق ماسەلەلەر بويىنشا ءتيىستى شەشىمدەر قابىلداندى.
ال, قالالىق ءماسليحاتتىڭ 2012 جىلعى 25 قاڭتارداعى شەشىمىنە «استانا قالاسى ءماسليحاتىنىڭ بەسىنشى شاقىرىلعان تۇراقتى كوميسسياسىن سايلاۋ تۋرالى» وزگەرىستەر ەنگىزۋ جونىندە ءماسليحات حاتشىسى س.ەسىلوۆ بايانداما جاساپ, دەپۋتاتتار قالاداعى №4 سايلاۋ وكرۋگىنەن دەپۋتاتتىققا سايلانعان م.شايداروۆتى قالالىق ءماسليحاتتىڭ بيۋدجەت, ەكونوميكا, ونەركاسىپ, جانە كاسىپكەرلىك ءماسەلەلەرى جونىندەگى تۇراقتى كوميسسياسىنىڭ مۇشەسى ەتىپ سايلادى.
تاڭاتار تولەۋعاليەۆ
