2 ماۋسىم – 6 شىلدە ارالىعىندا استانا كۇنىنە ارنالعان «يگى ىستەر بيۋروسى» بىرەگەي جوباسى ىسكە قوسىلادى. بۇل تۋرالى ەلوردانىڭ 16 جىلدىعىنا ارنالعان مەرەكەلىك شارالاردى دايىنداۋ جانە وتكىزۋ جونىندەگى ۇيىمداستىرۋ كوميتەتىنىڭ مەديا-شتابىنان حابارلاندى.
جوبانىڭ عالامتور-انىقتاما سيپاتىنداعى ارنايى سىلتەمەسى استانا قالاسى اكىمىنىڭ www.astana.gov.kz. سايتىندا «يگى ىستەر بيۋروسى» بولىمىنە ورنالاستىرىلادى. وندا كەز كەلگەن ادام قارجىلاي, تەحنيكالىق, گۋمانيتارلىق, ۆولونتەرلىك جانە باسقالاي دا كومەككە مۇقتاج جاندارعا قولۇشىن سوزا الادى. اتاپ ايتساق, جەتىمدەر ءۇيى, ينتەرنات تاربيەلەنۋشىلەرىنە, كوپبالالى وتباسىلار, قاتەرلى اۋرۋعا دۋشار بولعان, قاراجاتتان قىسىلعان قارتتارعا جانە قوعامنىڭ باسقا دا الەۋمەتتىك ءالسىز توپتارىنا كومەكتەسۋگە ءمۇمكىندىك الادى. انىقتامادا كومەككە مۇقتاج جانداردىڭ تىكەلەي بايلانىس ءنومىرلەرى مەن قاجەتتىلىكتەرى جازىلادى.
«يگى ىستەر بيۋروسى» اكتسياسى اياسىندا قايىرىمدى ىسكە بەلسەندى ارالاسقان ازاماتتارعا استانا قالاسى اكىمى اتىنان العىس حاتتار بەرىلەدى.
