مادەنيەت

ساكۋرا ەلىنە ساياحات

جاپون حالقىندا كوپپەن بىرگە گۇلدەردى تاماشالايتىن حانامي ءداستۇرى بارىن بىلەمىز. كورمەدە ءوزىمىزدى سول مەرەكەدە جۇرگەندەي سەزىندىك. توموكو حوۋكيونىڭ سۋرەت گالەرەياسىنان قۇرالعان عاجايىپ باقتى ارالاپ, اسەمدىككە ءبىز دە سۇيسىندىك.  ۇزدىكسىز وزگەرىس ۇستىندەگى تابيعات تىرشىلىگىمەن ۇيلەسىم تاپقان تۋىندىلار كورگەن كوزدى تۇتاس ءبىر ەل بولمىسىنىڭ كۋاسى ەتەدى. كورمەنىڭ اتى دا زاتىنا ساي – «جاپونيانىڭ سۇلۋلىق الەمى».

سۋرەتشى – جاپون بەينەلەۋ ونەرىنىڭ ەجەلگى تۇرلەرىنىڭ ءبىرى سانالاتىن نيحونگا كەسكىندەمەسىنىڭ وكىلى. نيحونگانىڭ دالمە-ءدال اۋدارماسى «جاپوندىق كەسكىندەمە» ءسوزىن بىلدىرەدى. VIII عاسىردان باستاۋ العان بۇل  ونەر بۇگىنگە دەيىن ءوز بيىگىنەن ەش تومەندەمەي, حالىقتىڭ ۇلتتىق ءبىتىمىن جەتكىزۋمەن كەلەدى.

تابيعات كورىنىستەرىنە تامسانا ءبىلۋ – جاپوندىقتاردىڭ ۇلتتىق مىنەزىندەگى بىردەن-ءبىر ەرەكشەلىك. ماۋسىمدىق وزگەرىستەر مۇندا انىق بايقالاتىندىقتان, جىلدىڭ ءتورت مەزگىلى دە كەسكىندەمە ونەرىنە ارقاۋ بولىپ جاتادى. سۋرەتشىلەر, اسىرەسە, ساكۋرانىڭ بۇرشىك اتىپ, گۇلدەگەن كەزىن قاعازعا تۇسىرۋگە اسىعادى. توموكو حوۋكيونىڭ كورمەگە قويىلعان 22 كارتيناسىنىڭ كوبىندە ساكۋرا گۇلدەۋىنىڭ ءتۇرلى كەزەڭدەرى سونداي-اق, حريزانتەما, گورتەنزيا  گۇلدەرى سۋرەتتەلەدى. ادەمىلىگى بىرىنەن-ءبىرى وتكەن, ەكىنشىسى العاشقىسىن قايتالامايتىنداي ءارتۇرلى. بوياۋى قانىق. ءتىپتى, الىستان كوز تاستاعان ادامعا فوتوگرافيا سەكىلدى كورىنەدى. الايدا, جاقىننان قاراساڭ, ەشقانداي دا كوشىرۋ ەمەس, تۇپنۇسقا ەكەنى, فوتوگرافيا ەمەس, قولمەن سالىنعان سۋرەت ەكەنى ايقىن بايقالادى. مۇنىڭ سىرى ءبىر جاعىنان اۆتوردىڭ بوياۋ رەتىندە تەك تابيعي مينەرالدى زاتتاردى پايدالانۋىندا بولسا, ەكىنشى جاعىنان, ۇساق-تۇيەك دەتالدىڭ ءوزىن ءمۇلت جۇبەرمەي سەزىنە ءبىلىپ, بارىنشا ۇقساتىپ بەينەلەۋىندە.

«ساكۋرانىڭ قىسقا عانا عۇمىرى بار. ءومىر  دە سونداي وتكىنشى. تىرلىكتىڭ بايانسىز ەكەنىن تابيعاتتىڭ وسى عاجاپ كورىنىسىمەن بايلاناستىراتىنىمىز راس. سول گۇلدەردىڭ ۇستىنە كوبەلەك قوندىرعانىمنىڭ دا ماعىناسى بار. كوبەلەك – تىرشىلىك يەسى. ونى ۇنەمى تىرشىلىك ءۇشىن تىربانىپ ءىس-ارەكەت, قيمىل-قوزعالىس ۇستىندە جۇرەتىنىمىزدى جەتكىزۋ ءۇشىن سۋرەتكە قوستىم» دەيدى اۆتوردىڭ ءوزى. ءار سۋرەتتىڭ تومەنگى بولىگىندە كىشكەنتاي عانا كوبەلەكتىڭ بەلگىسى بارىن بايقادىق. «بۇل مەنىڭ جەكە قولتاڭبام, قالىپتاستىرعان ءستيلىم» دەپ جاۋاپ بەردى سۋرەتشى قىز.

ول فۋكۋسيما پرەفەكتۋراسىنا بارىپ, جاپون ەلى تاريحىنداعى قايعىلى وقيعادان كەيىن دە ءوسۋىن توقتاتپاعان ساكۋرا اعاشىن كورىپ, ونى ءوز شىعارماشىلىعىنا قوسادى. رادياتسيا كەسىرىنەن سۇر تۇمان اراسىندا ءوسىپ جاتقان اعاشتىڭ كورىنىسى اۋىر مۇڭعا جەتەلەيدى…

سونداي-اق, «بۇركىت پەن سالدەگۇل» سۋرەتى نازارىمىزدى اۋدارماي قويمادى. اۆتور بۇركىتتى قازاقستان كەلبەتى دەپ الىپ,  ەكى ەل اراسىنداعى تابىس­تى سەرىكتەستىك پەن باۋىرلاستىقتى كورسەتۋدى ماقسات ەتىپتى. اتالعان تۋىندىنىڭ ەسكيزى الماتىدا تۋعان كورىنەدى.

توموكو حوۋكيو بۇعان دەيىن جاپونيادا قازاقستان تاۋەلسىزدىگىنە ارنالعان ارنايى كورمە ۇيىمداستىرعان بولاتىن, ال «جاپونيانىڭ سۇلۋلىق الەمى» – سۋرەتشىنىڭ ەلىمىزدەگى العاشقى كورمەسى. قازاننىڭ 19-ىنا دەيىن قالا تۇرعىندارى مەن قوناقتارىنىڭ جاپوندىق مانەردەگى كارتينالارمەن تانىسۋعا مۇمكىندىگى بار.

 ءمادينا جاقىپ

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button