Sport

چەمپيوندار شايقاسى

وسى اپتادا ءبىزدىڭ «استانا ارلاندارى» مەن «كۋبا قابىلاندارى» كومانداسى «چەمپيوندار شايقاسىندا» قولعاپ ءتۇيىستىردى. جەڭىس قوناقتاردىڭ قورجىنىندا كەتسە دە, جەكپە-جەك تارتىسقا تولى بولدى.

ارلاندار مەن قابىلان­داردىڭ ارپالىسى ەكى كۇنگە سوزىلدى. WSB چەمپيوناتىنىڭ 2013/2014 جىلعى جەڭىمپازدارى كەزدەسۋدىڭ كورىگىن قىزدىردى. الايدا, ارلاندار العاشقى كۇننەن-اق جەڭىستىڭ تىزگىنىن كۋبالىقتارعا بەرىپ قويدى. مايداندى باستاعان 49 كەلىدەگى ماردان بەرىكباەۆ سانتياگو امادورانى سان سوقتىرىپ, 1 ۇپاي ەنشىلەگەن ەدى. بىراق, قالعان ءتورت بوكسشىمىز مارداننىڭ جەڭىستى جولىن جالعاي المادى. بۇل كۇنگى ەسەپ 1:4 بولىپ تىركەلدى.

جانكۇيەرلەر قاۋىم ەكىنشى كۇننەن ءۇمىت كۇتتى. ءۇمىت اقتالدى! الدىمەن شارشى الاڭعا كوتەرىلگەن ميراس جاقىپوۆ جەڭىس جولىن اشتى. ناعىز ارلانشا ايقاسقان ميراس وليمپيادا جانە الەم بىرىنشىلىگىنىڭ جۇلدەگەرى  ۆەيتيانى ايقىن جەڭدى.

كەلەسى سالماقتا رومان ششەگرينوۆ الەم چەمپيونى الۆارەز ەستراداعا تەگەۋرىندى توتەپ بەرسە دە, تارازى باسىن وزىنە اۋدارا المادى. بوستاندىق ارالىنان كەلگەن شىمىر جىگىتكە شاماسى جەتپەدى.

ال, 69 كەلى سالماقتاعى جەكپە-جەك وسى ماتچتاعى ەڭ تارتىستى باسەكە بولعانى ءسوزسىز. ماديار اشكەەۆ الەم چەمپيونى ءارى وليمپيادا ويىندارىنىڭ جەڭىمپازى يگلەسياس سوتولانگامەن بولعان شايقاسقا ناعىز نامىستىڭ نايزاعايىن كورسەتتى. قانشا سوققى الىپ, بەت-اۋزى قانجوسا بولسا دا, شەگىنبەي سوڭىنا دەيىن قارسىلىق تانىتتى. اقىرى, ونىڭ جەڭىسكە دەگەن جىگەرىن جوعارى باعالاعان تورەشىلەر ءبىزدىڭ مادياردى جەڭىمپاز دەپ تانىدى. زال تولى كورەرمەن وسى ساتتە قازاقتىڭ قايسار ۇلىنا ورىندارىنان تىك تۇرىپ, قۇرمەت كورسەتتى.

81 كەلىدە سىنعا تۇسكەن حرگوە سەپ ەكى دۇركىن الەم چەمپيونى, وليمپيادا جەڭىمپازى لا كرۋزگە قارسىلىق كورسەتە المادى. ءبىزدىڭ ۇلتتىق قۇرامانىڭ ماقتانىشى ادىلبەك نيازىمبەتوۆتىڭ بايراقتى باسەكەلەردە جولىن كەسكەن كۋبالىق بوكسشى بۇل جولى دا باسىم بولدى.

ەڭ اۋىر سالماقتاعى جەكپە-جەكتە جانكۇيەردىڭ دەلەبەسىن قوزدىردى. فيليپ حرگوۆيچ قارسىلاسى ورتەگانى بەسىنشى راۋندتا نوكاۋتقا ءتۇسىردى. وسىلايشا, ارلاندار 3:2 ەسەبىمەن جەڭىسكە جەتتى.

تۇپتەپ ايتقاندا, «استانا ارلاندارى» جانە «كۋبا قابىلاندارى» اراسىندا وتكەن جولداستىق كەزدەسۋ, ياعني, «چەمپيوندار شايقاسى» 4:6 ەسەبىمەن قوناقتاردىڭ پايداسىنا شەشىلدى. ەڭ باستىسى, قازاق بوكسشىلارى الەمدەگى ەڭ مىقتى كوماندا سانالاتىن كۋبالىقتارعا قارسى تەگەۋرىندى تويتارىس بەردى.

عالىم قوجابەكوۆ

تاعىدا

عالىم قوجابەكوۆ

«استانا اقشامى» گازەتى باس رەداكتورىنىڭ ورىنباسارى

ۇقساس جاڭالىقتار

پىكىر ۇستەۋ

Back to top button