ەلوردادا كۇزگى ەكولوگيالىق ايلىق وتۋدە. سونىڭ اياسىندا جالپى قالالىق سەنبىلىك وتكىزۋ جوسپارلانعان. وسى رەتتە «استانا – تازالىق» جشس باسشىسى ازىمبەك باسقانباەۆپەن تىلدەسكەن ەدىك.
– بيىل قالالىق سەنبىلىككە توقسان بەس مىڭداي ادام قاتىسادى دەپ جوسپارلانۋدا. ۇيىمداستىرۋ جۇمىستارى قالاي جۇرگىزىلۋدە؟
– دايىندىق تولىق قارقىنمەن جۇرىپ جاتىر. ءتيىستى ءىس-شارالار جوسپارى بەكىتىلىپ, جۇمىس تيىمدىلىگىن ارتتىرۋ ءۇشىن بارلىق تەحنيكا تۇگەل تەكسەرىستەن وتكىزىلدى. اۋداندىق اكىمدىكتەر تازالىق شاراسىنا قاتىسۋشىلاردى قاجەتتى قۇرال-جابدىقتارمەن, اتاپ ايتقاندا, كۇرەك, تىرناۋىش, قولعاپ, قوقىس سالاتىن قاپتارمەن قامتاماسىز ەتەدى.
– ءسىزدىڭ مەكەمەدەن قانشا ادام قاتىسادى, قاي اۋماقتاردى تازالايسىزدار؟
– يگى شاراعا ءبىزدىڭ مەكەمەدەن 232 ادام قاتىسادى. سەنبىلىك بارىسىندا قالا اۋماعىنان بىرنەشە مىڭ توننا قوقىس شىعارىلماق. ءبىز ۇيىلگەن قوقىس قالدىقتارىن جيناپ, توگەتىن بولامىز.
– جينالعان قوقىستى شىعارۋعا قانشا تەحنيكا جۇمىلدىرىلادى؟
– ءجۇز ەكى تەحنيكا, سونىڭ ىشىندە ون بەس فرونتالدىق تيەۋ ماشينالارى, وتىز كاماز جۇك كولىگى پايدالانىلادى.
ەركەجان ساتىمبەك
