مەكتەپ تابالدىرىعىن العاش رەت اتتايتىن بۇلدىرشىندەردىڭ ءتيىستى ەكپەلەرىن الىپ, دەر كەزىندە دارىگەر كەڭەسىنە جۇگىنۋدىڭ ماڭىزى زور. وسىعان وراي, قالالىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار تولەگەنوۆا اتا-انالارعا قاجەتتى بىرقاتار مالىمەتتەرمەن بولىسكەن ەدى.
-بيىل ءبىرىنشى سىنىپقا باراتىن بالالاردى مەكتەپكە راسىمدەۋ ءۇشىن قانداي مەديتسينالىق قۇجاتتار قاجەت؟
– بالانىڭ تۇرعىلىقتى مەكەنجايى بويىنشا اۋماقتىق ەمحانانىڭ ۋچاسكەلىك پەدياترىنىڭ جانە جالپى تاجىريبەدەگى دارىگەردىڭ كەڭەسىن العانى ءجون. سول جەردە بالاعا دەنساۋلىق پاسپورتى (026/ۋ-3), پروفيلاكتيكالىق ەگۋ كارتاسى (063/ۋ), ەكپە پاسپورتى تولتىرىلادى. بالا نەۆروپاتولوگ, حيرۋرگ, وفتالمولوگ, لور, ءتىس دارىگەرىنىڭ تەكسەرۋىنەن ءوتۋى ءتيىس. سونداي-اق, ەمحانادا ارناۋلى تالداۋلار جاسالىپ, ياعني قان, نەسەپ, گەلمەنت جۇمىرتقاسىنا ءناجىس تالداۋى جۇرگىزىلەدى.
– ءبىرىنشى سىنىپقا باراتىن وقۋشىلار بۇدان ءارى قاراي پروفيلاكتيكالىق ەكپەلەردى قايدان الادى؟
– وقۋشىلارعا ۆاكتسيناتسيا جانە پروفيلاكتيكالىق تەكسەرۋ مەكتەپتە جۇرگىزىلەدى. پروفيلاكتيكالىق تەكسەرۋ مەكتەپتىڭ بەكىتىلگەن اۋماعى بويىنشا ەمحانا ماماندارىنىڭ قاتىسۋىمەن جۇرگىزىلەدى.
– وتكەن وقۋ جىلىندا جاسوسپىرىمدەرگە ادام پاپپيلوماسىنا قارسى ەكپە جاسالعان بولاتىن, بۇل شارا بيىل دا جالعاسا ما؟
– ءيا, اعىمداعى جىلدىڭ قىركۇيەك-قازان ايلارىندا ادام پاپپيلوماسىنا قارسى ەكپە ەگۋ ناۋقانى جۇرگىزىلەدى. قوسىمشا اقپاراتتى بالاڭىزعا قىزمەت كورسەتەتىن ەمحانادان الۋىڭىزعا بولادى.
ايگۇل ۋايسوۆا
