دارىگەرلەردىڭ داۋالى ءدارىسى

دۇنيەجۇزىلىك سوزىلمالى اسقىنعان وكپە اۋرۋلارىمەن كۇرەس كۇنى استانا قالاسىنداعى №1 قالالىق اۋرۋحانادا «تىم كەش ەمەس» اتتى اكتسيا ۇيىمداستىرىلدى.

سول كۇنى ەلورداداعى بەلگىلى دارىگەر-پۋلمونولوگتار استانا مەديتسينا ۋنيۆەرسيتەتىنىڭ پۋلمونولوگيا كا­فەدراسى پروفەسسورلارىمەن جانە دو­تسەنتتەرىمەن بىرلەسە وتىرىپ, ناۋقاستار ءۇشىن تەگىن كەڭەس بەرىپ, ءدارىس وقىدى. وسىعان وراي تىنىس الۋ اعزالارىنىڭ سوزىلمالى اۋرۋلار توبىن بىرىكتىرەتىن اسقىنعان وكپە اۋرۋى جونىندە كەڭەس الۋعا جانە ءدارىستى تىڭداۋعا قىزىعۋشىلار №1 قالالىق اۋرۋحاناعا اعىلدى. ولاردىڭ اراسىندا № 5, №4 جانە № 9 قالالىق ەمحاناعا قارايتىن تۇرعىندار كوپ بولدى.
قالا تۇرعىنى قايروللا سەرىكباەۆپەن تىلدەسكەنىمىزدە, ول تىنىس جولدارى اۋرۋىمەن ون جىلدان استام ۋاقىتتان بەرى ارپالاسىپ كەلە جاتقانىن ايتتى. «وسى شاراعا قاتىسۋىمىزدىڭ ءوزى تەگىن ۇيىمداستىرىلىپتى. تىنىس الۋ جولدارىندا كەمىستىگى بار ءبىز سەكىلدى ادامدارعا ارنايى ۋاقىت ءبولىپ, وسىنداي شارا وتكىزىپ جاتقان جاندارعا ايتار العىسىمىز شەكسىز. بۇگىن تەگىن كەڭەس الىپ, دارىستەر تىڭدادىق. دارىگەرلەر دە شەتىنەن جۇمىستارىنا ادال, بىلىكتى ماماندار ەكەن. اكتسيانى ۇيىمداستىرۋشىلارعا كوپ-كوپ راحمەت!».
سوزىلمالى وكپە اۋرۋىنان كوز جۇمۋ­شىلار قاتارى جىل وتكەن سايىن كوبەيىپ كەلەدى. ەلىمىز اتالمىش اۋرۋ بويىنشا ءولىم كورسەتكىشىنەن ءتورتىنشى ورىندا تۇرعان كورىنەدى. وعان دەنساۋلىققا دەر كەزىندە كوڭىل بولمەۋ سەبەپ بولىپ وتىرعانىن ايتقان سالا ماماندارى
جاعداي وسى بەتىمەن كەتە بەرسە, دۇنيە­جۇزىلىك دەنساۋلىق ساقتاۋ ۇيىمىنىڭ
بولجامى بويىنشا, 2020 جىلعا قاراي ءبىز الگى اۋرۋ سالدارىنان ءولىم-جىتىمگە ۇشىراۋدان ءۇشىنشى ورىنعا شىعۋىمىز ابدەن مۇمكىن ەكەنىن ەسكەرتتى.
اكتسيانى ۇيىمداستىرۋداعى نەگىزگى ماقسات تا وسى اۋرۋدى اسقىندىرىپ الماي, دەر كەزىندە ەمدەلۋدىڭ ناتيجەلى ەكەنىن ناۋقاستارعا ەسكەرتىپ, كوپشىلىككە جەتكىزۋ ەدى. وسىلايشا, اكتسياعا قا­تى­سۋشىلار تەگىن كونسۋلتاتسيالار الۋمەن بىرگە تەمەكىگە تاۋەلدىلىكتەن قالاي ارىلۋعا بولاتىنىن, دەنساۋلىققا زياندى باسقا دا ادەتتەردەن بويدى اۋلاق ۇستاۋدىڭ جولدارىن ۇيرەنۋگە مۇمكىندىكتەر الدى.

گۇلبارشىن وكەشقىزى