كەشە «Ramada Plaza» قوناق ۇيىندە «الەۋمەتتىك داۋلاردى شەشۋدەگى ساياسي پارتيا جەتەكشىلەرىنىڭ ءرولى» تاقىرىبىندا دوڭگەلەك ۇستەل بولىپ ءوتتى. استانا قالاسى ىشكى ساياسات باسقارماسى مەن «قازاقستان جاستارى كونۆەنتى» جەكە قورى ۇيىمداستىرعان شارانى ساياساتتانۋشى ارتۋر نىعمەتوۆ جۇرگىزدى.
استانا قالاسى ىشكى ساياسات باسقارماسىنىڭ ءبولىم باسشىسى نۇربول سەرىكبەكوۆتىڭ العىسوزىنەن كەيىن دوڭگەلەك ۇستەلگە كەلگەن ساياسي پارتيا مەن قوعامدىق بىرلەستىكتەردىڭ وكىلدەرى ءوز ويلارىن ورتاعا سالدى.
«نۇر وتان» حدپ استانا قالالىق فيليالى قوعامدىق-ساياسي جۇمىس ءبولىمىنىڭ باسشىسى تولەگەن ابىلعازين شىعىس مەملەكەتتەرىندەگى ءجيى-ءجيى دۇربەلەڭ تۋدىراتىن وقيعالار سول ەلدەردىڭ ساياسي پارتيالارى جەتەكشىلەرىنىڭ الەۋمەتتىك جانجالدارعا ءتيىستى دەڭگەيدە كوڭىل بولمەگەندەرىن كورسەتەتىندىگىن, سوندىقتان ەل پارتيالارى الەۋمەتتىك داۋلاردى الدىن الۋعا ۇلكەن نازار اۋدارۋ كەرەكتىگىن اتاپ ءوتتى.
«شاڭىراق» قوعامدىق بىرلەستىگىنىڭ توراعاسى ماحامبەت ءابجان وزدەرى اتقارعان جۇمىستارى جونىندە باياندادى. «ايشا» قوعامدىق قورىنىڭ ءتورايىمى ايشا ورازباي قوردىڭ قىزمەتىنەن حابار بەردى. پىكىرتالاس ءوربىپ, پارتيالاردىڭ جانىنان تالقىلاۋ تاقىرىبىنا اينالعان ماسەلە بويىنشا قوعامدىق كەڭەستەردى قۇرۋ ءتيىمدى بولاتىنى ايتىلدى.
ا.شميتۇلى
