دەنساۋلىق كەپىلى – دەر كەزىندەگى كومەك

استانا حالقىنىڭ سانى جىل سايىن ورتا ەسەپپەن 30-35 مىڭ ادامعا كوبەيىپ وتىر. ال ەلوردالىق اتانعان ءار ازاماتتىڭ دەنساۋلىعىن ساقتاپ, ولارعا دەر كەزىندە مەديتسينالىق كومەك بەرۋ – قالانىڭ باستى مىندەتتەرىنىڭ ءبىرى. وتپەلى جىل دا باس شاھاردىڭ دەنساۋلىق سالاسى ءۇشىن وسال بولعان جوق.

قۇرت اۋرۋى قۇرىقتالىپ كەلەدى

استانا باس قالاعا اينالعالى باستى الەۋمەتتىك ماسەلەنىڭ ءبىرى – قۇرت اۋرۋى بولىپ كەلگەن ەدى. اسىرەسە, العاشقى جىلدارى ەلورداعا اعىلعان ادامداردىڭ كوپتىگىنەن كوح تاياقشاسى دا ءورشي تۇسكەن. بۇگىندە قۇرت اۋرۋىنىڭ «بەتى قايتا باستادى». بۇل  ەلورداداعى تۋبەركۋلەزگە قارسى كۇرەس جۇمىستارىنىڭ ناتيجەسى دەپ بىلگەن ءجون. ستاتيستيكالىق مالىمەتتەردى سويلەتسەك, بىلتىرعىمەن سالىستىرعاندا, قۇرت اۋرۋى 30 پايىزعا تومەندەپ, تۋبەركۋلەزدەن كوز جۇماتىن جاعدايلار 50 پايىزعا ازايدى. بۇل دەگەنىڭىز –ۋربانيزاتسيا ۇدەرىسىندەگى استانا ءۇشىن قۋانارلىق جايت. قۇرت اۋرۋىنىڭ كۇرت تومەندەۋىنىڭ بىردەن-ءبىر سەبەبى 2011 جىلدىڭ ەكىنشى جارتىجىلدىعىندا ەنگىزىلگەن تۋبەركۋلەزگە قارسى كۇرەس تۇجىرىمداماسى­نىڭ جۇزەگە اسىرىلۋى دەيدى ماماندار. بۇگىندە ەلوردادا قۇرت اۋرۋىن باستاپقى كەزدەن انىقتاۋ, دەر كەزىندە ەمدەۋ شارالارىن جاسايتىن 25 فتيزياتر ۋچاسكەسى جۇمىس ىستەيدى.  ونىڭ 14-ءى  – قوسىمشا اشىلعاندار بولسا, 7-ەۋى – بالالارعا ارنالعان ەمدەۋ ءبولىمى. ال, قالاداعى جالعىز تۋبەركۋلەزگە قارسى ديسپانسەردە قوسىمشا 10 ديففەرەنتسيالدى-دياگنوستيكالىق توسەك ورنى اشىلىپ, وستەوحيرۋرگيالىق بولىمشە ىسكە قوسىلدى. بۇل بولىمشە ومىرتقا مەن بۋىنعا زاماناۋي ادىستەرمەن وتا جاساۋ ارقىلى تۋبەركۋلەزدى دەر كەزىندە انىقتاۋ جاعىنان الدىنا جان سالماي تۇر. بۇگىنگە دەيىن بولىمشە دارىگەرلەرى 50 وتا جاساپ ۇلگەردى.

قۇرت اۋرۋىمەن كۇرەسۋ جۇمىستارى, ونىڭ الدىن الۋ شارالارى كۇن تارتىبىنەن ەشقاشان تۇسپەك ەمەس.

ەمحاناعا – ەرەكشە كوزقاراس

ادام العاش اۋىرعاندا باراتىن جەرى – ەمحانا. تۇرعىندارعا العاشقى مەديتسينالىق كومەك كورسەتىپ, دياگنوز قوياتىن وسى ۇيىمدار. سوندىقتان دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىنىڭ باستى باعىتى – ەمحانالار كورسەتەتىن مەديتسينالىق كومەكتىڭ ساپاسىن جاقسارتىپ, قولجەتىمدىلىگىن ارتتىرۋ.

ەلوردانىڭ حالقى كۇن وتكەن سايىن كوبەيىپ كەلە جاتقانىن جوعارىدا ايتتىق. تۇرعىندار سانىنىڭ كۇرت كوبەيۋى قالالىق ەمحانالارعا دا از سالماق سالىپ وتىرعان جوق. الايدا, قالا بيلىگى دە قاراپ قالماي, امبۋلاتورلىق-ەمحانالىق مەكەمەلەردىڭ جۇكتەمەسىن ازايتۋ ءۇشىن بىرقاتار شارالاردى قولعا الدى.  ولاردىڭ ءبىرى – ەلوردادا جاڭا ەمحانالاردىڭ ىسكە قوسىلۋى. ايتالىق, بىلتىر جەلتوقسان ايىندا امانات كوشەسى بويىندا ءبىر مەزگىلدە 500 ادامدى قابىلداي الاتىن №3 ەمحانالىق كەشەن اشىلسا, بيىلعى جەلتوقساندا قالانىڭ 65 مىڭ تۇرعىنىنا قىزمەت كورسەتەتىن №10 ەمحانا ىسكە قوسىلدى. بۇل – «100 مەكتەپ, 100 اۋرۋحانا» باعدارلاماسى اياسىندا اشىلعان زاماناۋي مەديتسينالىق مەكەمە.

دەنساۋلىق نىساندارىن وڭتاي­لاندىرىپ, قايتا قۇرۋ بويىنشا بيىل قاراشا-جەلتوقسان ايلارىندا №1 پەريناتالدىق ورتالىق پەن №2 قالالىق بالالار اۋرۋحاناسى بازاسىندا ءبىر اۋىسىمدا 250 جانە 150 ادامدى قابىلداي الاتىن  وتباسىلىق دەنساۋلىق ورتالىقتارى اشىلدى. بۇل مەديتسينالىق ۇيىمدار ەسىلدىڭ سول جاعالاۋى مەن پريگورودنىي, تەلمان, زارەچنىي جانە پرومىشلەننىي تۇرعىندارىنا قىزمەت كورسەتەدى.

بالالار دا قالىس قالمايدى

قالادا بالالاردىڭ دەنساۋلىعىن قارايتىن مەديتسينالىق ۇيىمدار دا كوبەيىپ كەلەدى. 2013 جىلعا دەيىن بالدىرعانداردى ەمدەيتىن جالعىز  مامانداندىرىلعان كلينيكالىق-دياگنوستيكالىق ەمحانا بولدى. №2 قالالىق بالالار اۋرۋحاناسىنىڭ بازاسىندا جۇمىس ىستەيتىن بۇل كەشەننىڭ جۇكتەمەسى تىم كوپ ەدى. سوندىقتان, كەيبىر دارىگەر-ماماندارعا جەتكىنشەكتەر ايلاپ كەزەكتە تۇراتىن. ال بيىل شىلدە ايىندا №1 قالالىق بالالار اۋرۋحاناسىندا تاعى وسىنداي جاڭا ەمحانا اشىلىپ, سونىڭ ارقاسىندا كەزەك اجەپتاۋىر قىسقاردى. بالالار دا دەر كەزىندە ءتيىستى دارىگەرگە كورىنۋگە مۇمكىندىك الدى.

بۇعان قوسا, 350 ورىندىق كوپسالالى بالالار اۋرۋحاناسىنىڭ اشىلۋى دا كىشكەنتاي تۇرعىندارعا كورسەتەتىن مەديتسينالىق قىزمەت ءتۇرىن كوبەيتتى.

سان مەن ساپا

سونىمەن, بۇگىندە استاناداعى ەمحانانىڭ سانى ونعا جەتتى. جالپى, 2013 جىلدىڭ 1 جەلتوقسانىنداعى جاعداي بويىنشا, ەلوردانىڭ دەنساۋلىق ساقتاۋ باسقارماسىنا قاراستى 34 مەديتسينالىق مەكەمە جۇمىس ىستەيدى. سونىڭ ىشىندە 14-ءى – اۋرۋحانا,  ءبىر جەدەل جاردەم ستانساسى بار. قالعانى – وتباسىلىق-دارىگەرلىك امبۋلاتوريالار مەن مەملەكەتتىك كوممۋنالدىق كاسىپورىندار.  بۇعان قوسا, «وقۋ-كلينيكالىق ورتالىق» جشس مەن مەديتسينالىق كوللەدج بار.

تۇرعىندارعا جوعارى ساپالى مەديتسينالىق قىزمەت كورسەتۋ ءۇشىن دارىگەرلەردىڭ بىلىكتىلىگىن ارتتىرۋ جۇمىستارىنا دا جەتە ءمان بەرىلەدى. بيىل ەلىمىزدىڭ ايتۋلى عىلىمي ورتالىقتارى مەن شەت مەملەكەتتەردە 2 748 مەديتسينالىق قىزمەتكەر بىلىكتىلىگىن جەتىلدىرسە, سونىڭ 1498-ءى – دارىگەرلەر.

قىمبات توقتامۇرات