قالالىق ءماسليحات دەپۋتاتتارى استانا ستانتسياسىنىڭ ەسكى ۆوكزالىنا بارىپ, عيماراتتىڭ قازىرگى جاعدايىمەن تانىستى. سونىڭ بارىسىندا جولاۋشىلارعا قولايلى جاعداي جاساۋدا كەدەرگى كەلتىرەتىن ماسەلەلەر انىقتالىپ, قورىتىندى جيىندا سولاردى شەشۋگە قاتىستى ۇسىنىستار ايتىلدى.
استانا قالاسى ءماسليحاتىنىڭ دەپۋتاتى, ءارى «قتج» ۇك» اق باس ينجەنەرى باتىر كوتىرەۆ باستاعان 4 حالىق قالاۋلىسى ۆوكزالدىڭ كۇتۋ زالىنان باستاپ, ەكىنشى جولعا ءوتۋ ارالىقتارىن, پەرروندى قاراپ, پويىز كۇتكەن جولاۋشىلار شاعىمىنا دا قۇلاق ءتۇردى.
– بۇل – ەلورداداعى ەڭ ەسكى تاريحي عيمارات. ەسكى جاعى 1961 جىلى, ال قاسىنداعى قازىر جولاۋشىلار قابىلدايتىن جاڭا بولىگى 1990 جىلى سالىنعان. اۋماعى – 11 174 شارشى مەتر. ورتاشا جولاۋشىلار اعىمى تاۋلىگىنە – 10 670 ادام. ەكى جولاۋشىلار پلاتفورماسى جانە جولاۋشىلار پويىزدارىن جونەلتەتىن 3 جولى بار. سوڭعى رەت مۇندا كۇردەلى جوندەۋ 2004 جىلى جاسالعان. سوندىقتان وزدەرىڭىز جاڭا كورگەندەي, جوندەۋگە قاجەتتىلىك جوعارى. مەردىگەر مەكەمە بار, ولار 2023 جىلى شىلدەدە ۆوكزالدى جوندەۋ بويىنشا جوبالىق سمەتالىق قۇجاتتى دايىنداۋى كەرەك. سودان سوڭ جوندەۋ جۇمىستارى 2024 جىلى جۇرگىزىلەدى, – دەدى ب.كوتىرەۆ.
دەپۋتاتتار ۆوكزال مەن قتج كومپانياسىنىڭ ۆوكزال شارۋاشىلىعى بويىنشا دەپارتامەنتى باسشىلىعىنا كوزبەن كورگەن كەمشىلىكتەر بويىنشا ەسكەرتۋلەرىن ايتتى.
– ۆوكزالدىڭ ىشكى, كۇتۋ زالىنداعى جارىعى ءالسىز, ءتىپتى كوزىمىز اۋىرىپ كەتتى. سونىڭ جارىعىن رەتتەۋ كەرەك. سونىمەن قاتار قوعامدىق ورىن بولسا دا, مىناداي حالىق كوپ شوعىرلاناتىن ۇلكەن عيماراتتا ءۇش قانا اجەتحانا بار ەكەن, سونىڭ ەكەۋى اقىلى. ءبىز سولاردى تەگىن ەتۋدى ايتتىق. كەي جەرلەردە سۋ اعىپ جاتىر. جەر استىمەن وتەتىن جولدارىندا پليتكالارى سىنىپ كەتكەن. سونداي شارۋالاردى ەكى جىلدان كەيىنگى كۇردەلى جوندەۋدى كۇتپەي-اق قازىر ىستەۋگە بولادى عوي, – دەيدى ءماسليحات دەپۋتاتى گۇلجامال جاپاروۆا.
تەكسەرۋ كەزىندە كۇتۋ زالىندا وتىرعان جولاۋشىلار وزدەرى كەلىپ, پويىزداردىڭ جارتى ساعاتتاپ كەشىگەتىنىنە شاعىمداندى. تەمىرجولشىلار مۇنى ناقتى ءبىر تەمىرجول تەلىمدەرىندە جوندەۋ جۇمىستارى جۇرگىزىلىپ, سوعان وراي بەلگىلى ءبىر ۋاقىت ارالىعىندا قوزعالىستىڭ توقتاتىلاتىندىعىمەن بايلانىستىردى.
قورىتىندى جيىندا جەلىلىك ءتارتىپ ساقشىلارى ۆوكزال عيماراتىنداعى دۇكەندەردە ىشىمدىك ونىمدەرىن كەشكى ۋاقىتتا ساتقاندىقتان, بۇزاقىلىق فاكتىلەرىنە جول بەرىلگەنىن ايتتى. سونىمەن قاتار ۆوكزال اۋماعىنداعى شلاگباۋمنىڭ جۇمىسىنا قاتىستى جەكەمەنشىك يەلەرىنە ەسكەرتۋلەر ايتىلدى. بارلىق ماسەلەلەر ءماسليحاتتىڭ الداعى وتىرىستارىندا قارالىپ, شەشىمىن تابادى.
