رەسەيدىڭ ەڭبەك سىڭىرگەن ءارتىسى, قوعامدىق پالاتا وكىلى ءانشى ديانا گۋرتسكايا استاناداعى زاعيپ بالالارعا ارنالعان مەكتەپ-ينتەرناتتا قايىرىمدىلىق كونتسەرتىن وتكىزبەك. بۇل تۋرالى «مۋز-تۆ 2015. گراۆيتاتسيا» جۇلدەسىن تابىستاۋ راسىمىنە قاتىستى وسى جوبانىڭ جەتەكشىسى ارمان داۋلەتياروۆ ۇيىمداستىرعان بريفينگتە ءانشىنىڭ ءوزى مالىمدەدى.
الدىن الا بەلگىلى بولعانداي, ەسترادا جۇلدىزى بالالارمەن قايىرىمدىلىق كونتسەرتىن وتكىزۋدى 4 ماۋسىمعا جوسپارلاعان. ول ءۇشىن استانا قالاسىنداعى زاعيپ جانە كوزى ناشار كورەتىن بالالارعا ارنالعان مەكتەپ-ينتەرناتىن تاڭداعانى دا تەگىن ەمەس.
«مەن ونداعى بالالاردىڭ ارقايسىسىنىڭ جانىن تۇسىنەمىن. ويتكەنى, ءوزىم دە سونداي ينتەرناتتا جاتىپ وقىدىم. ءار جولى اتا-اناڭمەن قوشتاسىپ, ينتەرناتتا قالۋدىڭ قانداي قيىن, جاس-تاي ءومىردىڭ سىناعىن كورۋدىڭ قانشالىقتى اۋىر ەكەنىن بىلەمىن. بىراق, قينالسا دا, ادامعا كەيدە توزىمدىلىك تانىتۋعا تۋرا كەلەدى ەكەن. مەن دە سونداي كۇيدى باستان كەشتىم. ون ءبىر جىل بويى ءوز ءۇيىمدى اڭساپ, انامدى ساعىنسام دا, شىداپ, ينتەرناتتا جاتىپ ءبىلىم الدىم», – دەدى ول.
ءانشىنىڭ ايتۋىنشا, بۇل كۇنگى كەزدەسۋگە ءوزىنىڭ رەپەرتۋارىنداعى تاڭداۋلى اندەردى ىرىكتەپ, جاقسى باعدارلاما ازىرلەۋدە ەكەن. ۇلكەن ساحناداعىداي, ديانا استانانىڭ بالالارىنا ارناپ ءان سالىپ بەرمەك. سونىمەن بىرگە, ءانشى ينتەرناتتاعى بالالار دا ءوزى ءۇشىن قانداي دا ءبىر باعدارلاما ازىرلەپ, ونەر كورسەتەدى دەپ كۇتەتىنىن جاسىرمادى.
«ءبىز ول كۇنى بالالارمەن اڭگىمەلەسىپ, وي بولىسسەك, سىرلاسساق دەيمىن. وزگەلەرگە جاۋتاڭداعان, كومەككە, قامقورلىققا مۇقتاج بالالار ءۇشىن از عانا ايالداپ, كوڭىل بولگەننىڭ ءوزى قانداي باقىت ەكەنىن مەن وزگەلەردەن ارتىق سەزەتىن شىعارمىن… استاناعا كەلگەن وسى ساپارىمداعى ەڭ باستى ماقساتىم دا, وسىنداي بەيكۇنا بالالارمەن بىرگە بولىپ, ولارعا از دا بولسا جان جىلۋىمدى سەزدىرۋ, قۋانىش سىيلاۋ», – دەيدى ديانا گۋرتسكايا.
قايىرىمدىلىق جاساۋدان تالمايتىن, قايىرىمدىلىق شارالارىنان ەشقاشان باس تارتپايتىن ءانشىنىڭ بۇل ساپارداعى تاعى ءبىر مىندەتى, ارينە, «مۋز-تۆ 2015. گراۆيتاتسيا» جۇلدەسىن تابىستاۋ سالتاناتىنا قاتىسۋ. بۇل شارا ەلوردامىزدا 5 ماۋسىم كۇنى وتەتىنى بارشاعا ءمالىم. بۇل كەشتەگى كونتسەرتتىك باعدارلامادا جەرگىلىكتى ونەر جۇلدىزدارى مەن رەسەي ەستراداسى وكىلدەرى قاتىسىپ, ءان سالماق.
اڭگىمە وسى جونىندە وربىگەندە ديانا گۋرتسكايا رەسەيگە بارىپ, «مۋز-تۆ» ارناسىنا جەتەكشىلىك ەتىپ, ۇلكەن ءبىر مەملەكەتتىڭ ونەرى مەن مادەنيەتىن دامىتۋعا ىقپال ەتىپ وتىرعان قازاق ازاماتى ارمان داۋلەتياروۆقا ريزاشىلىعىن ءبىلدىردى.
سونىمەن قاتار, «مەن وسى ءبىر مادەني مەرەكە ءۇشىن قازاقستان پرەزيدەنتى نۇرسۇلتان نازارباەۆقا دا العىسىمدى بىلدىرگىم كەلەدى. سەبەبى, ەل دامىپ, وركەندەپ, حالقىنىڭ ەڭسەسى كوتەرىلىپ, ءجۇزى جادىراپ, جاقسى ءومىر سۇرە باستاعاندا عانا «مۋز-تۆ» پرەمياسى سەكىلدى ۇلكەن شارا وتكىزۋگە مۇمكىندىك الادى. بۇل شارا وسى كۇنگە دەيىن رەسەيدە ءوتىپ كەلگەن. ەندى ارمان داۋلەتياروۆتاي ازاماتىنىڭ ارقاسىندا بۇل مەرەكە استاناعا دا شۋاعىن شاشقالى وتىر» دەدى ول.
