Sport

دۇنيەنIڭ ءدۇلدۇلIسIڭ, دانيار

بوكستان قازاقستان ۇلتتىق قۇراماسىنىڭ كاپيتانى دانيار ەلەۋسىنوۆ ەكىنشى رەت قاتارىنان ايبا (حالىقارالىق اۋەسقوي بوكس قاۋىمداستىعى) تاڭداۋىمەن الەمنىڭ ۇزدىك بوكسشىسى اتاندى. شارشى الاڭدا جەكپە-جەككە شىققاندا كەرەمەت تەحنيكاسىمەن, قايتپاس قايسارلىعىمەن كوزگە تۇسەتىن قازاق جىگىتىنە الەمدىك بوكس ماماندارى وسىنداي باعا بەرىپ وتىر. حالقىنىڭ باعىنا تۋعان اردا ۇلدى ءبىز دە جوعارى مارتەبەلى اتاعىمەن قۇتتىقتايمىز.

بوكسشى اكەسى مارات ءتالىپۇلىنا, بوكسشى اعاسى داۋرەنگە ەلىكتەپ وسكەن بالا دانياردىڭ دا بوكستان باسقا تاڭداۋى بولماعانى زاڭدىلىق. «ۇيادا نە كورسەڭ, ۇشقاندا سونى ىلەسىڭ» دەگەن وسى شىعار.

قولىنا بىلعارى قولعاپ كيگەلى دانيار ءبىر-اق باعىتتى ۇستاندى. ارىدە قوناقباەۆ, بەرىدە ساپيەۆ سەكىلدى بوكس­شى بولعىسى كەلدى. قۇدايعا شۇكىر, وسى باعىتىنان, وسى ماقساتىنان ءالى دە اينىماي, ءالى دە قايتپاي كەلەدى. قايتا جىل وتكەن سايىن مەجەسى دە, مىندەتى دە بيىكتەي بەردى.

دانيار سپورت ارقىلى مارتەبەگە بولەنۋدىڭ ءمانىسىن 2006 جىلى كادىمگىدەي سەزىندى. جاسوسپىرىمدەر اراسىنداعى رەسپۋبليكا بىرىنشىلىگىن ۇتىپ العاننان كەيىن كادەتتەردىڭ الەم چەمپيوناتىنا جولى ءتۇستى. ءبىرىنشى رەت شەتەل استى. ءساتىن سالىپ جاسوسپىرىمدەر اراسىنداعى الەم بىرىنشىلىگىنىڭ التىن جۇلدەگەرى اتاندى. ارادا ەكى جىل وتكەندە جاس­تار اراسىنداعى الەم دوداسىندا باق سىنادى. بۇل جولى العاش رەت ادىلەتسىزدىكتىڭ اششى ءدامىن تاتقانداي بولدى. ولاي دەيتىنىمىز, فينالدىق جەكپە-جەكتە قارسىلاسىنان باسىم تۇسكەنىمەن, تورەشىلەر بۇرا تارتىپ جىبەرگەن ەكەن. ءسويتىپ, كۇمىس مەدال الۋعا تۋرا كەلگەن. جىل وتكەن سايىن ءتۇرلى جارىستارعا قاتىسىپ, قاناتى قاتايعان جاس بوكسشى 2010 جىلى ەرەسەكتەر اراسىنداعى قازاقستان چەمپيوناتىنا قوسىلدى. استانا تورىندە وتكەن بىرىنشىلىكتە چەمپيون اتانىپ قانا قويماي, جارىستىڭ ۇزدىك بوكسشىسى بولىپ تانىلدى. سودان ۇلتتىق قۇرامانىڭ باسشىلارى كوپ ويلانباستان دانياردى ازيا ويىندارىنا اپاردى. الىپ قۇرلىقتىڭ الامان بايگەسىندە دە التىن مەدال الىپ قانا قويماي, ۇزدىك بوكسشى اتاندى. وسى جارىستان كەيىن-اق دانيار ەلەۋسىنوۆ ءوزىنىڭ جاستىعىنا قاراماي ۇلتتىق قۇرامانىڭ نەگىزگى مۇشەسىنە اينالدى. 2011 جانە 2012 جىلدارى دا قازاقستان چەمپيوناتىندا الدىنا جان سالمادى. لوندون وليمپياداسىنان كەيىن ۇلتتىق قۇراما باسشىلىعى وسى ويىنداردا چەمپيون اتانىپ, باركەر كۋبوگىن قوسا ۇتىپ العان سەرىك ساپيەۆتىڭ ورنىنا كوماندا كاپيتانى ەتىپ دانياردى تاڭداۋدى ۇسىنادى. ال, كوماندالاس سەرىكتەرى بۇل شەشىمدى ءبىراۋىزدان قۇپتايدى.

2013 جىل سالماق دارەجەسىن 64 كەلىدەن 69 كەلىگە اۋىستىرعان دانيار ەلەۋسىنوۆتىڭ ومىرىنە وتە ۇلكەن وزگەرىستەر اكەلدى. كوكتەمدە ازيا بىرىنشىلىگىندە توپ جاردى. «استانا ارلاندارى» ساپىندا ءبىر جەكپە-جەك وتكىزىپ, جەڭىسكە جەتتى. ال كۇزدە الەم بىرىنشىلىگىندە چەمپيون اتاعىن جەڭىپ الدى. الماتى تورىندە وتكەن الەمدىك دودادا دانيار ەلەۋسىنوۆ سول كەزدەگى ەڭ مىقتى دەگەن بوكسشىلاردىڭ بارىنەن باسىم بولدى. لوندوندا جولىن كەسكەن يتاليالىق پيكارەنى دە, كۋبالىق دەسپەيندى دە ءسوزسىز تىزە بۇكتىردى. وسىلايشا قاتارىنان وتكەن قوس جارىستان قوس التىن العان قازاق بوكسشىسىنا ايبا  2013 جىلدىڭ ۇزدىك بوكسشىسى اتاعىن بەرگەن ەدى. مەملەكەت باسشىسى ن.نازارباەۆتىڭ جارلىعىمەن  كوماندالاس سەرىكتەرى ءبىرجان جاقىپ, مەرەي اقشالوۆ, جانىبەك الىمحانۇلىمەن بىرگە «قۇرمەت» وردەنىمەن ماراپاتتالدى.

بيىل دا دانيار بوكسشى بايراقتى باسەكەنىڭ بيىگىنەن كورىندى. جاقىندا عانا وڭتۇستىك كورەيانىڭ ينچحون قالاسىندا وتكەن ءحVىى ازيا ويىندارىندا جەڭىس تۇعىرىنىڭ ەڭ بيىك ساتىسىنان قول بۇلعادى. بۇل دانياردىڭ ءتورت جىلدا ءبىر وتەتىن ازيا ويىندارىندا ەكىنشى رەت قاتارىنان جەڭىسكە جەتۋى.

– دانيار ەلەۋسىنوۆتىڭ ازيا ويىندارىندا قاتارىنان ەكىنشى رەت جەڭىسكە جەتۋى تەگىن ەمەس. بۇل ءتورت جىلدا ءبىر رەت وتەتىن ۇلكەن جارىس. قۇرلىقتىڭ وليمپياداسى دەپ تە ايتادى. دانيار ءوز ىسىنە وتە جاۋاپكەرشىلىكپەن قارايتىن جىگىت. مەن ونىڭ وليمپيادا شىڭىنا دا شىعاتىنىنا سەنەمىن. ويتكەنى, ونىڭ بويىندا ماقساتىنا جەتۋ ءۇشىن قانداي قيىندىق بولسا دا قايتپايتىن مىنەزى بار, – دەيدى بىزبەن اڭگىمەسىندە قازاقستان ۇلتتىق قۇراماسىنىڭ مەملەكەتتىك جاتتىقتىرۋشىسى بولات ابدراحمانوۆ.

ەندى, مىنە, التىن اسىقتاي اردا ۇلدىڭ تاعى ءبىر اقجولتاي مارتەبەسىنە قۋانىپ وتىرمىز. ايبا باسشىلىعى د. ەلەۋسىنوۆتى تاعى دا «جىلدىڭ ۇزدىك بوكسشىسى»  اتاعىمەن ماراپاتتالعانىن جاريالادى. سونداي-اق, تاعى ءبىر قۋانعانىمىز قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ تا «جىلدىڭ ۇزدىك باپكەرى» اتاندى.

الدا ليتسەنزيالىق الەم چەمپيوناتى كۇتىپ تۇر. وسى جارىستا ريو دە جانەيرو وليمپياداسىنا جولدامالار بەرىلەدى. سوندىقتان دا بۇل جارىس دانيار ەلەۋسىنوۆتىڭ باستى مەجەسى بولماق. چەمپيوندىق اتاقتى دا قورعاپ قالۋ كەرەك. سول ءۇشىن دە بۇگىن ءبىر ماقساتقا اربالعان ءبىرجان جاقىپ, ءىلياس سۇلەيمەنوۆ, جانىبەك ءالىمحانۇلى, انتون پينچۋك, ادىلبەك نيازىمبەتوۆ, يۆان دىچكو جانە باسقا دا كوماندالاس ارىپتەستەرىمەن جۇيەلى جاتتىعۋدان قول ۇزبەي ءجۇر.

ولاي بولسا, «جولىڭ بولسىن, باپكەرىڭ – اكەڭ مارات ءتالىپۇلىنىڭ التىن قولى امان بولسىن!» دەمەكپىز وليمپ شىڭىنا ۇمتىلعان قازاق بالاسىنا. قازاق جانكۇيەرىن جەڭىسىڭمەن قۋانتا بەرشى, دانيار!

 

عالىم قوجابەكوۆ

تاعىدا

عالىم قوجابەكوۆ

«استانا اقشامى» گازەتى باس رەداكتورىنىڭ ورىنباسارى

ۇقساس جاڭالىقتار

پىكىر ۇستەۋ

Back to top button