كۇللى الەمدى الاڭداتىپ وتىرعان ەبولا ۆيرۋسى ەلىمىزدى دە بەي-جاي قالدىرمادى. بۇگىندە قازاقستاندا ەبولا قىزباسىنان ساقتانۋ, ونىڭ الدىن الۋ شارالارى قاتاڭ جۇرگىزىلىپ جاتىر.
ەبولا ۆيرۋسى – تەز جۇعاتىن, وتە قاۋىپتى ىندەت. ۆيرۋس العاش رەت 1976 جىلى باتىس افريكانىڭ ەبولا وزەنىنىڭ جانىندا ورنالاسقان ەلدى مەكەندەردە انىقتالعاندىقتان اۋرۋدىڭ اتاۋى سولاي اتالعان. ەبولا ۆيرۋسىنىڭ وسى ەلدەردەگى شىعۋ كوزى جارقاناتتار بولىپ تابىلادى. قازىر بۇل اۋرۋ باتىس افريكانى بىلاي قويىپ, ەۋروپا مەن امەريكاعا دا جەتىپ وتىر. سوندىقتان ءاربىر ازامات قاۋىپتى بەزگەك سىرقاتى جونىندە بىلە جۇرگەنى ءجون.
ەبولا قىزباسىنىڭ العاشقى بەلگىلەرى دەنە قىزۋىنىڭ 39وس – 40وس دەيىن كەنەتتەن كوتەرىلۋى, قاتتى السىزدىك, باستىڭ جانە اياق بۇلشىق ەتتەرىنىڭ اۋرۋىمەن بىلىنەدى. بۇدان كەيىن ءىش ءوتىپ, دەنەدە بورتپە پايدا بولادى, باۋىر مەن بۇيرەك قىزمەتىنىڭ بۇزىلۋىنان ىشكى جانە سىرتقى قان كەتۋلەر بولادى. اۋرۋدىڭ باستاپقى بەلگىلەرى تۇماۋعا ۇقساس بولعانىمەن, كوز بەن قىزىل يەك قانتالايدى.
ۆيرۋستىڭ ءورشۋ كەزەڭى 2-دەن 21 كۇن ارالىعىن قۇرايدى. اۋرۋ جۇقتىرعان جاعدايدا ونىڭ كورسەتكىشى
90 پايىزىندا ءولىم جاعدايىنا اكەلىپ سوعادى.
ازىرشە ەبولا قىزباسىنا قارسى ەم بولماي تۇر. تەك الدىن الا ساقتانۋ شارالارىن جاساۋ قاجەت.
قر دەنساۋلىق ساقتاۋ جانە الەۋمەتتىك دامۋ مينيسترلىگى اۋرۋدىڭ الدىن الۋ, قانداي دا ءبىر قاۋىپ تونە قالعان جاعدايدا جەدەل ارەكەت ەتۋ ماقساتىندا مىناداي شارالاردى جاساۋ قاجەتتىگىن ەسكەرتەدى: ەبولا قىزباسىنا كۇدىكتەنگەن جاعدايدا بۇل تۋرالى شۇعىل تۇردە قر ۇلتتىق ەكونوميكا مينيسترلىگىنىڭ تۇتىنۋشىلاردىڭ قۇقىعىن قورعاۋ كوميتەتى مەن قر دەنساۋلىق ساقتاۋ جانە الەۋمەتتىك دامۋ مينيسترلىگىنە حابارلاۋ قاجەت; دەنساۋلىق ساقتاۋ ۇيىمدارى ەبولا ۆيرۋسىن جۇقتىردى دەگەن كۇدىگى بار ادامداردى ەمدەۋ ءۇشىن مامانداندىرىلعان توسەكتەرمەن, ءتيىستى ءدارى-دارمەكپەن قامتاماسىز ەتىلۋگە ءتيىس جانە سىرقات اداممەن بايلانىستا بولعان ادامداردى وقشاۋلاۋعا ارنالعان ورىن بولۋى كەرەك. ەمدەۋ مەكەمەلەرىندە اۋرۋدان قورعايتىن بارلىق قۇرال-جابدىقتار, اتاپ ايتقاندا, قورعانىش كوزىلدىرىگى مەن ارناۋلى كيىمى جانە سىرقات ادامنان ءتيىستى ساراپتاما الۋ ءۇشىن ارنايى جابدىقتارى بولۋى شارت. ءبىر سوزبەن ايتقاندا, قانداي جاعدايدا دا مەديتسينالىق ۇيىمدار ساقاداي ساي بولۋى قاجەت.
