ەلورداداعى №67 مەكتەپ-گيمنازيادا «مەنىڭ ومىرلىك ەكو-مەكتەبىم» اتتى جوبانىڭ تۇساۋى كەسىلدى.
– اتالعان جوبا بالالاردى جىلۋ جانە ەلەكتر ەنەرگياسى, سۋ سەكىلدى تابيعي رەسۋرستاردى ۇنەمدەۋگە, قوقىستى سۇرىپتاۋعا نەمەسە قايتا كادەگە جاراتۋعا باعىتتالعان داعدىلارعا ۇيرەتەدى. بۇكىل وقۋ جىلى بويى شاكىرتتەردى وسىنداي يگى ىسكە ىنتالاندىرۋ ءۇشىن بايقاۋلار ۇيىمداستىرىلادى, – دەيدى ءىس-شارا بارىسىندا ءسوز العان قر ەكولوگيا, گەولوگيا جانە تابيعي رەسۋرستار مينيسترلىگىنىڭ دەپارتامەنت ديرەكتورى ءاليا شالابەكوۆا.
جيىن بارىسىندا قاتتى قالدىقتاردى وڭدەۋگە ارنالعان «EcoTruck» جىلجىمالى زاۋىتى دا كوپشىلىككە تانىستىرىلدى. «رەسايكلينگ ي ك» كومپانياسى ويلاپ تاپقان بۇل كولىكتىڭ ىشىندە قوقىستى بولەك جيناۋعا ارنالعان كونتەينەر مەن كۇنىنە 5-6 توننا پلاستيكتى ۇساقتاۋعا قاۋقارلى اپپارات بار. ونىڭ كومەگىمەن پلاستيك قالدىقتار ۇگىتىلىپ, كەيىن ولاردى قايتا وڭدەۋگە جىبەرەدى. سونداي-اق جىلجىمالى زاۋىتتىڭ ىشىندە پلاستيكتى قايتا وڭدەۋ پروتسەسىن كورسەتەتىن ستانوكتار دا ورنالاستىرىلعان.
«EcoTruck» كولىگى قاراشانىڭ سوڭىنا دەيىن ەلورداداعى 26 مەكتەپتى ارالايدى.
