استانا اكىمى ادىلبەك جاقسىبەكوۆ حالىقارالىق كورمەلەر بيۋروسىنىڭ باس حاتشىسى ۆيسەنتە گونسالەس لوسسەرتالەسپەن كەزدەستى. كەزدەسۋ حكب باس حاتشىسىنىڭ ينسپەكتسيالىق ساپارى اياسىندا وتكىزىلدى.
كەزدەسۋ بارىسىندا ءا.جاقسىبەكوۆ ۆ.گ. لوسسەرتالەستى «ەكسپو-2017» كورمەسىنە دايىندىق جۇمىستارىنىڭ بارىسىمەن تانىستىردى, دەپ حابارلادى قالا اكىمنىڭ ءباسپاسوز قىزمەتى.
– استانا اكىمدىگى «ەكسپو» تاقىرىبىنا ساي كەلەتىن جوعارى تەحنولوگيالاردى ەنگىزۋ ارقىلى قالانىڭ جول-كولىك ينفراقۇرلىمىن دامىتۋ جونىندە كەشەندى شارالار جوسپارىن جاسادى, – دەدى ءا.جاقسىبەكوۆ.
استانا اكىمى بۇل باعىتتاعى جۇمىس بىرنەشە كەزەڭ بويىنشا جۇزەگە اساتىنىن اتاپ ءوتتى. سولاردىڭ ىشىندە – قاۋىپسىزدىكتى قامتاماسىز ەتۋ, كورمە قوناقتارىنا قولايلى جاعداي جاساۋ, ۆولونتەرلىك قىزمەتتى ۇيىمداستىرۋ, مادەني, ويىن-ساۋىق شارالارى, اقپاراتتىق جۇمىس, مەديتسينالىق قامتاماسىز ەتۋ جانە تاعى باسقالار بار.
قالا باسشىسى كەشەندى جوسپاردى ىسكە اسىرۋ بارىسىندا بىرقاتار ماڭىزدى قۇرىلىستار جۇرگىزىلەتىنىن ايتتى. اتاپ ايتساق, جول قۇرىلىسى, BRT قۇرىلىسىنىڭ 1 كەزەگى, قالانىڭ باتىس جانە شىعىس كىرەبەرىستەرىندەگى ەكى اۆتوۆوكزال قۇرىلىسى, 10 جەكە اۆتوپاركينگ, تەمىرجول ۆوكزالى قۇرىلىستارى مەن حالىقارالىق اۋەجاي تەرمينالىنىڭ رەكونسترۋكتسياسى.
– وسىعان قوسا استانا قالاسى اكىمدىگىنىڭ باسشىلىعىنان جەكە ينۆەستيتسيالاردى تارتۋ ارقىلى قۋاتى 50مۆت قۇرايتىن كۇن ەلەكتر ستانتسياسى قۇرىلىسىنىڭ جوباسى جۇزەگە اسىرىلۋدا. پايدالانۋعا بەرۋ مەرزىمى – 2016 جىلدىڭ 1 توقسانى, – دەدى
ءا.جاقسىبەكوۆ.
كەزدەسۋ بارىسىندا ۆ.گ. لوسسەرتالەس الداعى ۋاقىتتا ميلاندا وتەتىن «ەكسپو-2015» كورمەسى شەڭبەرىندە «استانا اپتالىعىن» وتكىزۋدى ۇسىندى. اتالمىش شارا قاتىسۋشىلار مەن قوناقتارعا استانانىڭ بىرەگەيلىگىمەن جانە الەمنىڭ قارقىندى دامىپ كەلە جاتقان قالالارىنىڭ ءبىرى رەتىندە تانىستىرۋعا ۇلكەن مۇمكىندىك ەكەنىن ايتتى.
كورمە كەزىندە قوناقتارعا قولايلى جاعداي جاساۋ دا باستى ماسەلەلەردىڭ ءبىرى بولىپ تابىلادى. بولجام بويىنشا كورمەگە شامامەن 2 ملن ادام كەلەدى. ولاردىڭ 85 پايىزى – استانا مەن قازاقستاننىڭ وزگە ايماقتارىنىڭ تۇرعىندارى.
2017 جىلى كورمەنىڭ باستالۋىنا دەيىن كەلەتىن تۋريستەرگە قىزمەت كورسەتۋ ءۇشىن استانا قالاسىندا 5, 4, 3 جۇلدىزدى قوناقۇيلەر پايدالانۋعا بەرىلەدى.
ءوز كەزەگىندە حالىقارالىق كورمەلەر بيۋروسىنىڭ باس حاتشىسى ۆ.گ. لوسسەرتالەس اتقارىلىپ جاتقان جۇمىستارعا وڭ باعاسىن بەردى.
