استانادا تۇڭعىش رەت «ەكسپو-2017» كۋبوگى جولىندا ءجاسوسپىرىم سپورتشىلار اراسىندا قار ۇستىندەگى فۋتبولدان تۋرنير ۇيىمداستىرىلدى. ق.مۇڭايتپاسوۆ اتىنداعى ستاديوندا وتكەن جارىسقا بالالار جانە جاسوسپىرىمدەر سپورت مەكتەپتەرى اتىنان 6 كوماندا قاتىسىپ, قاتتى ايازعا قاراماستان بارلىعى جەڭىسكە جىگەرلەنە ۇمتىلدى.
حالىقارالىق «ەكسپو» كورمەسىن ناسيحاتتاۋعا ارنالعان جارىستىڭ باستى ماقساتى دا ەلدىڭ بولاشاعى سانالاتىن جاستارعا ناقتى باعىت سىلتەۋ بولاتىن. 14-17 جاسار جاسوسپىرىمدەردىڭ اراسىنان ءبىرىنشى ورىندى, ياعني, «ەكسپو-2017» كۋبوگىن №8 بالالار جانە جاسوسپىرىمدەرگە ارنالعان سپورت مەكتەبى يەلەنسە, كۇمىس جانە قولا جۇلدەلەر «استانا-1964» كومانداسىنىڭ ەكى قۇراماسىنا بەرىلدى. سايىس سوڭىندا جۇلدەگەرلەرگە مەدالدار مەن 2017 جىلى استانادا وتەتىن حالىقارالىق كورمەنىڭ قۇرمەتىنە جاسالعان ارنايى سىيلىقتار سالتاناتتى تۇردە تاپسىرىلدى.
سونىمەن قاتار, «استانا ەكسپو-2017» ۇلتتىق كومپانياسىنىڭ وكىلدەرى بۇل ءتۋرنيردى قالاداعى بالالار مەن جاسوسپىرىمدەر اراسىندا جىل سايىن وتكىزىپ تۇرۋعا ۋادە بەردى.
