ەلزا مەن اننا قازاقشا سويلەيدى

«ديسنەي» كينوستۋدياسىنىڭ «مۇزدى ولكە-2» انيماتسيالىق ءفيلمى قازاقستاندىق پروكاتقا شىقتى. اتالعان تۋىندى «بولاشاق» كورپوراتيۆتىك قورى مەن «مەلومان» كومپانياسىنىڭ بىرلەسۋىمەن جۇزەگە اسىرىلىپ جاتقان «وزىڭنەن باستا» جوباسى اياسىندا قازاق تىلىندە دۋبلياجدالدى.دۋبلياج كاستينگىنە 40-تان اسا اكتەر قاتىسقان. ناتيجەسىندە اننانىڭ ءرولىن دىبىستاۋعا – ­نازەركە سەرىكبولقىزى, ەلزا رولىنە – بەگىمنۇر حاليلا مەن گۇلسىم مىرزابەكوۆا, اققالا ولافتىڭ رولىنە – ­شاح-مۇرات ورداباەۆ, كريستوف رولىنە – ولجاس جاقىپبەك, يدۋنا پاتشايىم رولىنە – دينارا ­سۇلتان, ەلەنا رولىنە جانات ­چايكينا بەكىتىلگەن.
– بيىل «وزىڭنەن باستا» جوباسى اياسىندا التى ءفيلمدى قازاقشالادىق. بۇل جۇمىسقا 50 ميلليون تەڭگەدەي قارجى جۇمسالدى. «ديسنەيدىڭ» دۋبلياجعا قويار تالاپتارى وتە جوعارى. ماسەلەن, شىعارما­شىلىق توپ قۇرامىندا 70 شاقتى ماماندىق وكىلى بولۋى كەرەك, ونىڭ ىشىندە رەجيسسەر, اكتەر, اۋدارماشى, دىبىس رەجيسسەرى بار دەگەندەي. كاستينگتەن وتكەن اكتەرلەر داۋىس جازىپ بولعان سوڭ, مۇنىڭ ءبارى لوندوندا قارالىپ, تۇپكىلىكتى شەشىم سوندا قابىلداندى, – دەيدى «بولاشاق» كورپوراتيۆتىك قورىنىڭ قامقورشىلىق كەڭەسى ءتورايىمى دينارا ءشايجۇنىسوۆا.
فيلمدەگى باستى قاھارمانداردىڭ ءبىرى اننانى دىبىستاعان نازەركە سەرىكبولقىزى – ەلورداداعى «جاستار» تەاترىنىڭ اكتريساسى. ول بۇعان دەيىن دە موانا, راپۋنتسەل, بەلل سەكىلدى «ديسنەي» كەيىپكەرلەرىن قازاقشا «سويلەتىپتى».
دۋبلياج رەجيسسەرى ­شاح-مۇرات ورداباەۆتىڭ ايتۋىنشا, فيلم ميۋزيكل جانرىندا بولعانى سەبەپتى ءان ماتىندەرىنە ەرەكشە كوڭىل اۋدارىلعان. تۋىندىنى لوكاليزاتسيالاۋ ماقساتىندا كەيبىر ەپيزودتاردا اباي ولەڭدەرىنەن ۇزىندىلەر, قازاقى ءسوز ورامدارى قولدانىلعان.
ەندىگى ماسەلە قازاقشا دۋبلياجدالعان ءفيلمدى كينوتەاترلاردىڭ ىڭعايلى ۋاقىتقا قويۋى بولىپ وتىر. ويتكەنى بۇعان دەيىن قازاق ءتىلدى كورەرمەندەر تاراپىنان اتالعان ماسەلەگە قاتىستى شاعىمداردىڭ ءجيى ايتىلعانى بەلگىلى.
ايتا كەتەيىك, «مۇزدى ولكە-2» ءفيلمى – «وزىڭنەن باستا» جوباسى اياسىندا قازاقشا دۋبلياجدالعان 33-تۋىندى. وعان BI Group كومپانياسى دەمەۋ­شىلىك كورسەتىپ كەلەدى. جوبانىڭ ارقاسىندا 100 وتاندىق اكتەر «ديسنەي» كومپانيا­سىنىڭ دىبىستىق بازاسىندا تىركەۋلى تۇر. قازاق ءتىلى – وسى كومپانيانىڭ دۋبلياج تاريحىنداعى 39-ءتىل.