الدا بولاتىن استانا تويىن بيىل 70-تەن استام شارا ايشىقتاماق. بۇگىننەن باستاپ گازەتىمىزدىڭ ءار سانى ارقىلى مەرەكە اياسىندا ۇيىمداستىرىلاتىن ءتۇرلى مادەني جانە سپورتتىق شارالارمەن وقىرماندارىمىزدى تانىستىرماقپىز.
«ازيا جاڭعىرىعى»
استانالىق تسيرك ارەناسىندا 1 شىلدە كۇنى «ازيا جاڭعىرىعى» اتتى حالىقارالىق تسيرك ونەرى فەستيۆالىنىڭ شامدارى سەگىزىنشى مارتە جاعىلادى. جىل سايىن مىڭداعان كورەرمەندى جينايتىن فەستيۆالگە بيىل قازاقستان, رەسەي, ۋكراينا, بەلارۋس, لاتۆيا, يسپانيا جانە كۋبا مەملەكەتتەرىنىڭ ۇزدىك ارتىستەرى قاتىسادى.
ءبىر اپتاعا سوزىلاتىن فەستيۆال باعدارلاماسىنا افريكالىق ارىستاندار, عاجايىپ ترانسفورماتسيا, ەرجۇرەك ەكۆيليبريستەر, شارعى مىنگەن ونەرپازدار, اۋەدە باس اينالدىرار تريۋكتەردى جاسايتىن جانە ارەناعا ورىس تاياقتارىن الىپ شىعاتىن گيمناستتار, ەرەكشە حۋلا-حۋپتار, باتىل وسەتين جىگىتتەرى مەن كوڭىلدى سايقىمازاقتار كورسەتەتىن ءارتۇرلى قىزىقتى نومەرلەر ەنگىزىلىپ وتىر.
فەستيۆال كوركىن «كاۆالكادا», ياعني شاراعا قاتىسۋشىلاردىڭ شەرۋى اشا تۇسپەك. ولار ۇرمەلى اسپاپتار وركەسترىنىڭ سۇيەمەلدەۋىمەن «تسيرك – «نۇر استانا» مەشىتى – سىعاناق كوشەسى – بايتەرەك – كەرۋەن – قابانباي باتىر كوشەسى – تسيرك» باعىتىمەن ءجۇرىپ وتپەك.
ASTANA ARTFEST فەستيۆالى
4-6 شىلدە ارالىعىندا سۋلى-نۋلى جاسىل جەلەكجولدا ونەر مەن ارحيتەكتۋرانى, ديزاين مەن جاڭا تەحنولوگيالاردى ءبىر ارناعا توعىستىراتىن Astana ArtFest فەستيۆالى ءوتىپ, زاماناۋي ينستاللياتسيالار, دالا تەاترلارىنىڭ قويىلىمدارى مەن بالالار شىعارماشىلىعى «ەكسپو-2017» حالىقارالىق كورمەسى جايلى سىر شەرتىپ, ونىڭ تاقىرىبىن اشا تۇسەدى.
اشىق اسپان استىندا وتەتىن فەستيۆال الاڭقايى «وت ەنەرگياسى», «سۋ ەنەرگياسى» جانە «اۋا ەنەرگياسى» سياقتى تاقىرىپتىق ايماقتارعا بولىنەدى. كورمە قوناقتارى فرانتسيا سۋرەتشىسى الەكساندرە كالينكانىڭ بىرەگەي ساندىق ينستاللياتسياسىن, گەرمانيا مەن گوللانديا ينستاللياتورلارى رەفانك ستيلىندە جاساعان الەمدەگى جالعىز كيىز ءۇيدى, يتاليالىق ساۋلەتشى دجورجيو ءپينيدىڭ ۆيرتۋالدى الەم شلەمىندەگى ارحيتەكتۋرالىق جوباسىن تاماشالاي الادى.
ارت-فەستيۆالگە ارلەندىرىلگەن WI-FI اعاشتار, قازاقستاندا تۇراتىن ەتنوستاردىڭ ويۋلارىمەن ورنەكتەلگەن جىلقىلاردىڭ مۇسىندەرى كورىك بەرە تۇسەدى.
شارانىڭ كىشكەنتاي كورەرمەندەرىن ارت-نىساندار, دالا قويىلىمدارى جانە وزگە دە جارقىن كورىنىستەر قىزىقتىرادى. شىعارماشىلىق كورمەنىڭ مەيماندارىن جەلەكجول اسفالتىنداعى ءۇش قاباتتى سۋرەتتەر بەيجاي قالدىرمايدى. وندا رەسەيلىك ستريتارتشىلار فۋتۋريستىك عيماراتتار مەن ۇشاتىن كولىكتەردى سالىپ, استانانىڭ كەلەشەگىن بەينەلەمەك.
«جۇرەگىم مەنىڭ»
ەلوردادا استانا كۇنى مەرەكەسىنىڭ اياسىندا ايگىلى كومپوزيتورلارىمىزدىڭ شىعارماشىلىعىنا ارنالعان كونتسەرت وتكىزۋ داستۇرگە اينالىپ كەلەدى. بىلتىر «ءانىم سەن ەدىڭ» كونتسەرتىندە ۆالس كورولى ءشامشى قالداياقوۆتىڭ اندەرى شىرقالسا, بيىل مۋزىكانىڭ سان الۋان جانرىندا ەڭبەكتەنگەن نۇرعيسا تىلەنديەۆتىڭ 90 جىلدىعىنا وراي شىلدەنىڭ 6-سى كۇنى «قازاقستان» ورتالىق كونتسەرت زالىندا جۇرەگىم مەنىڭ» كونتسەرتى وتەدى.
كونتسەرتتە كومپوزيتوردىڭ كوپكە تانىمال تۋىندىلارىن سيمفونيالىق وركەستر مەن ن.تىلەنديەۆ اتىنداعى «وتىرار سازى» فولكلورلىق-ەتنوگرافيالىق وركەسترى ورىندايدى. وعان كومپوزيتوردىڭ قىزى, قر ەڭبەك سىڭىرگەن قايراتكەرى ءدىنزۋحرا تىلەنديەۆا ديريجەرلىك ەتەدى.
كەشتە روزا رىمباەۆا, مايگۇل قازتۇرعانوۆا, ەركىن شۇكىمانوۆ, سۇندەت بايعوجين, ءمادينا سادۋاقاسوۆا, «مۋزارت» توبى, ت.ب. وتاندىق ەسترادا جۇلدىزدارى بارشا قازاققا سۇيىكتى اندەردى ايتادى.
سونداي-اق, نۇرعيسا تىلەنديەۆ تۋرالى بەينەبايان كورسەتىلەدى.
ۆەلوجارىس وتەدى
الداعى جەكسەنبى كۇنى ەلوردادا ۆەلوجارىس وتەدى. وعان قاتىساتىندار سالتانات سارايى – «استانا-ارەنا» ستاديونى باعىتىمەن 4600 مەتر قاشىقتىقتى ءجۇرىپ وتەدى. شارادا ەلىمىزدى الەمگە تانىتىپ جۇرگەن ۆەلوشاباندوزدار, بەلگىلى سپورتشىلار مەن ەسترادا جۇلدىزدارى, مادەنيەت قايراتكەرلەرى, قوعامدىق قۇرىلىمداردىڭ وكىلدەرى بوي كورسەتپەك.
جارىسقا كەز كەلگەن ازامات قاتىسا الادى. اتاپ وتەر جايت, ۆەلوسيپەدتەردى جالعا الۋعا بولادى. باعىت بويىندا مەديتسينالىق كومەك كورسەتۋ بەكەتتەرى جۇمىس ىستەيدى. جەڭىمپازدار مەن بەلسەندى قاتىسۋشىلار ارنايى سىيلىقتارمەن ماراپاتتالادى. بۇعان قوسا كونتسەرت ۇيىمداستىرىلادى. ۆەلوجارىسقا قاتىسۋشى رەتىندە سول كۇنگى ساعات 9.00-دەن ساعات 10.00-گە دەيىن تىركەلۋگە بولادى.
ستيۆەن سيگال كەلەدى
استانادا بيىل تۇڭعىش رەت جاۋىنگەرلىك ونەر سايىسىنان حالىقارالىق فەستيۆال ۇيىمداستىرىلادى.
فەستيۆالگە قازاقستاننان, امەريكادان, قىتايدان, رەسەيدەن, چەحيادان, وڭتۇستىك كورەيا مەن جاپونيادان ايقاس تۇرلەرىنىڭ مايتالماندارى – ەڭ جوعارعى بەلبەۋ جانە دان يەگەرلەرى جينالادى. كورەرمەندەر ايكيدو, دجيۋ-دجيتسۋ, كاپوەيرا, بۋدزينكان, تاي بوكسى, كاراتە گودزيۋ-ريۋ, شين كالي, كەندو, تاەكۆوندو, ۆين-چۋن, شاولين جانە قويان-قولتىق ايقاس سىندى ءتۇرلى ۇرىس تۇرلەرىن تاماشالايدى.
بەلگىلى گولليۆۋد اكتەرى, ايكيدو ايكيكايدان 7 دان يەگەرى ستيۆەن سيگال, اكتەر, كاسىبي سپورتشى, «بوكس الەمى», «قاھارماندار ەلى» تەلەجوبالارىنىڭ جۇرگىزۋشىسى سەرگەي باديۋك, رەسەيلىك كوكبوكسشى, كاسىپقويلار اراسىندا كوپ مارتە الەم چەمپيونى اتانعان باتۋ حاسيكوۆ فەستيۆالدىڭ قۇرمەتتى قوناقتارى بولادى.
جاسىل الاڭدا – ەسترادا جۇلدىزدارى
2 شىلدە كۇنى قاجىمۇقان مۇڭايتپاسوۆ اتىنداعى ستاديوندا قازاقستان مەن رەسەي ەستراداسىنىڭ جۇلدىزدارى فۋتبولدان جولداستىق كەزدەسۋ وتكىزەدى.
قازاقستاندىق «الاتاۋ» كومانداسىنىڭ قۇرامىندا «مۋزارت», «نۇر-مۇقاسان», «Rin’Go», «Mysterions», «اراي» توپتارىنىڭ جىگىتتەرى, جۇبانىش جەكسەنۇلى, نۇرجان كەرمەنباەۆ, ابدۋلكارىم كارىموۆ, عادىلبەك جاناي, مەلس ساعاتۇلى, تاۋەكەل ءمۇسىلىم بار. ال, رەسەيلىك «Starco» كومانداسى يراكلي پيرتسحالاۆا, يليا اۆەربۋح, ەدگارد زاپاشنىي, يليا گليننيكوۆ, ميحايل گرەبەنششيكوۆ, پەر نارتسيسس, ۆيكتور زينچۋك, سەرگەي كرىلوۆ جانە ت.ب. جۇلدىزداردان قۇرالعان. ويىندى بەلگىلى رەسەيلىك سپورت كوممەنتاتورى ۆيكتور گۋسەۆ جۇرگىزەدى.
ءار تايمى 35 مينۋتتان بولىپ, ەكىارالىق ۇزىلىستە جانە ويىننان كەيىن ەكى كوماندانىڭ جۇلدىزدارى كورەرمەندەرگە ارناپ كونتسەرت قويادى.
بەتتى دايىنداعان: امانعالي قالجانوۆ
