ەل جۇرەگىنە اينالعان استانا بۇگىندە مەرەكە قارساڭىندا. قالا جۇرتشىلىعى استانا كۇنىن اسىعا كۇتەتىن بولدى. بيىل 18 جىلدىعىن اتاپ وتەتىن ەلوردامىز بارشا قازاقتىڭ, بۇكىل قازاقستاننىڭ باس قالاسىنا اينالىپ ۇلگەردى.
ەلباسى قازىعىن قاققان استانا بۇگىندە ساياسي, ەكونوميكالىق, مادەني, رۋحاني ءومىردىڭ ورتالىعى بولىپ قانا قويماي, ادامدارىنىڭ سانى كۇن ساناپ ارتا تۇسكەن قۇتتى مەكەنگە اينالدى. استانا جاستاردىڭ, جەتكىنشەك بالالاردىڭ قالاسىنا اينالا تۇسكەن. بۇل قالادا جىل سايىن قانشاما بالاباقشالار مەن مەكتەپتەر پايدالانۋعا بەرىلىپ جاتىر. ەلىمىزدىڭ تۇكپىر-تۇكپىرىنەن تالانتتى جاستار مەن ءبىلىم ىزدەگەن ستۋدەنتتەر دە وسىندا اعىلۋدا.
استانادا ونەركاسىپ يندۋسترياسى, كولىك ينفراقۇرىلىمى, مەديتسينا كلاستەرى قارقىندى دامىپ كەلەدى. ال شاعىن جانە ورتا بيزنەس ءۇشىن تىپتەن قولايلى جاعداي جاسالۋدا. سونىڭ ناتيجەسىندە كاسىپكەرلەر قاتارى كوبەيىپ وتىر. ەلوردامىز حالىقارالىق ونەر جانە سپورت سايىستارىن ۇيىمداستىرۋ ارقىلى دا تورتكۇل دۇنيەگە تانىلدى.
تۇيىندەپ ايتقاندا, ەل جۇرەگىنە بالانعان استانا بولاشاققا نىق قادام باسىپ كەلەدى.
استانا كۇنى – ەلوردامىزدىڭ ەرەكشە مەرەكەسى. ولاي بولسا, مەرەكە اياسىنداعى شارالارعا قاتىسىپ, باس قالامىزدىڭ بەرەكەسىن ەسەلەۋگە ۇلەس قوسىڭىزدار, ارداقتى استانالىقتار.
