كەشە ەلباسى نۇرسۇلتان نازارباەۆ «استانا وپەرا» مەملەكەتتىك وپەرا جانە بالەت تەاترى الدىندا ورناتىلعان ەلىمىزدەگى باس شىرشانىڭ شامدارىن جاعىپ, بۇكىل قازاقستاندىقتاردى جەلتوقسانداعى مەرەكەلەرىمەن قۇتتىقتادى.
«قۇرمەتتى بالالار, بۇگىن – تۇڭعىش پرەزيدەنت كۇنى. ول – مەن ءۇشىن جاسالعان مەرەكە ەمەس, ەلىمىزدىڭ تاۋەلسىزدىگىمەن ساباقتاس مەرەكە. وسىدان 23 جىل بۇرىن 1 جەلتوقساندا ءبىزدىڭ ەلىمىز بۇكىل حالىق بولىپ تۇڭعىش رەت ءوز پرەزيدەنتىن سايلاعان بولاتىن جانە سول كەزدە حالىقتىڭ 98 پايىزى ماعان داۋىس بەردى. سول داۋىسقا سۇيەنە وتىرىپ, مەن تاۋەلسىزدىك جاريالاۋدى وزىمە مىندەت ەتتىم. ەكى مەيرامدى ەگىز دەيتىنىم سول. سودان بەرى قازاقستانىمىز وركەندەپ ءوستى, دۇنيەجۇزىنە بەلگىلى بولدى, ەلدىڭ ءال-اۋقاتى ءوستى.
بارلىق جاساپ جاتقان شارۋامىز – سەندەر ءۇشىن, بالالار! سەندەر وقىسىن دەپ مەكتەپ, بالاباقشا جانە ۋنيۆەرسيتەتتەر سالىپ جاتىرمىز. دەنساۋلىقتارىڭ مىقتى بولسىن دەپ سپورت كەشەندەرىن دە تۇرعىزدىق. اتا-انالارىڭا دا جۇمىس بەرىپ جاتىرمىز. وسىنىڭ بارلىعى – ەلدىڭ قامقورلىعى. بالالار باقىتتى بولسا – ەل باقىتتى.
بۇگىن ءبىز ەلىمىزدىڭ ەڭ نەگىزگى شىرشاسىن جاققالى وتىرمىز. جاڭا جىل – ەرتەگى, جاڭا جىل – ارمان. ول – ىزدەپ, كۇتىپ وتىراتىن باقىت. سوندىقتان كەلە جاتقان جاڭا جىلدارىڭىز قۇتتى بولسىن! باقىتتى بولىڭدار, بالالار!» دەگەن نۇرسۇلتان نازارباەۆ بارشا قازاقستاندىق بالالار مەن ولاردىڭ اتا-انالارىنا جۇرەكجاردى تىلەگىن ايتتى.
«استانا وپەرا» مەملەكەتتىك وپەرا جانە بالەت تەاترىنىڭ الاڭىندا قۇرىلعان ەلىمىزدىڭ بيىلعى باس شىرشاسىنا «باقىت قۇسى» اتاۋى بەرىلىپ وتىر. شىرشانىڭ بيىكتىگى – 25, ال ديامەترى 16 مەتردى قۇرايدى. ونى جاساندىرۋ ءۇشىن 7650 مەترلىك بەزەندىرۋ زاتتارى, 2020 ويىنشىق, 4000-نان اسا ءتۇرلى-ءتۇستى شامدار جانە وزگە دە اشەكەيلەر قولدانىلعان. جالپى, بيىل استانا قالاسىندا 19 شىرشا تىگىلىپ, ولاردى قۇرۋعا شاعىن جانە ورتا بيزنەس سۋبەكتىلەرى تارتىلىپ وتىر.
سالتاناتتى راسىمگە الەۋمەتتىك از قامتىلعان جانە كوپبالالى وتباسىلاردان شىققان, سونداي-اق, اتا-انانىڭ قامقورلىعىنسىز قالعان بالالار قاتىستى.
نۇريسلام قۇسپانعالي
