بىرىككەن اراب امىرلىكتەرىندە وتكەن دۇنيەجۇزىلىك يسلام ەكونوميكالىق فورۋمى اياسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ Global Islamik Finance Awards ۇيىمىنىڭ «يسلامدىق قارجى بويىنشا جاھاندىق كوشباسشى» سىيلىعىمەن ماراپاتتالدى.
بۇل – يسلام قارجى نارىعىن حالىقارالىق دەڭگەيدە دامىتۋعا اسا زور ۇلەس قوسقان مەملەكەت قايراتكەرلەرىنە بەرىلەتىن مارتەبەلى سىيلىق. ماراپاتتاۋ ءراسىمى كەزىندە نۇرسۇلتان نازارباەۆ «قازاقستان 2009 جىلدان بەرى يسلامدىق قارجىلاندىرۋ قاعيداتتارىن زاڭنامالىق تۇرعىدان ەنگىزۋ جونىنەن تمد مەن ورتالىق ازيادا كوشباسشى سانالادى. قازىرگى ۋاقىتتا قازاقستاندا يسلام بانكينگى, ساقتاندىرۋ جانە ليزينگ سالاسىندا ءوز قىزمەتتەرىن ۇسىناتىن يسلامدىق قارجى ينستيتۋتتارىنىڭ تۇتاس ءبىر شوعىرى جۇمىس ىستەيدى» دەپ اتاپ ءوتتى. سونىمەن قاتار, ەلباسى قازاقستاننىڭ حالىقارالىق يسلام ۇيىمدارىنىڭ قىزمەتىنە بەلسەنە ارالاساتىنىن, يسلامدىق قارجىلاندىرۋدى دامىتۋداعى ءرولى كۇشەيە بەرەتىنىن دە جەتكىزدى.
كەشە استاناداعى ورتالىق كوممۋنيكاتسيالار ورتالىعىندا مەملەكەت باسشىسىنىڭ مارتەبەلى سىيلىقپەن ماراپاتتالۋىنا بايلانىستى ءبىر توپ مەملەكەت جانە قوعام قايراتكەرلەرى بريفينگ وتكىزدى.
اناتولي باشماكوۆ, ءماجىلىس دەپۋتاتى:
– ەلباسىمىز نۇرسۇلتان نازارباەۆتىڭ «يسلامدىق قارجى بويىنشا جاھاندىق كوشباسشى» سىيلىعىنىڭ لاۋرەاتى بولعانى – ءبىزدىڭ ەلىمىزدىڭ سىرتقى ساياساتىنىڭ كوپۆەكتورلىعىن تاعى ءبىر ايقىنداعانداي بولدى. نەگىزى يسلامدىق قارجىلاندىرۋ ەكونوميكامەن عانا شەكتەلىپ قالمايدى, سونىمەن قاتار ءبىلىم, مادەنيەت, جالپى گۋمانيتارلىق دامۋدى قولداپ وتىرعان ينستيتۋت. ونىڭ حالىقارالىق ءمانى دە, مارتەبەسى دە وتە زور. ال نۇرسۇلتان نازارباەۆ وسى باعىتتاعى جۇمىستى جانداندىرا تۇسكەنىن تەك قانا يسلام ەلدەرى عانا ەمەس, الەمدىك قوعامداستىق تا جاقسى بىلەدى. سوندىقتان بۇل ناگرادانىڭ ءبىزدىڭ پرەزيدەنتىمىزگە بەرىلۋىن ءبىزدىڭ مەملەكەتىمىزگە دەگەن حالىقارالىق سەنىمنىڭ ارتۋىمەن بايلانىستىرامىن.
تولەۋتاي سۇلەيمەنوۆ, مەملەكەت جانە قوعام قايراتكەرى, قازاقستان رەسپۋبليكاسىنىڭ تۇڭعىش سىرتقى ىستەر ءمينيسترى:
– مەملەكەت باسشىسى نۇرسۇلتان نازارباەۆتىڭ وسى ناگرادانى العانىن ۇلكەن وقيعا دەپ سانايمىن. بۇل – ەلباسىمىزعا عانا ەمەس, ەلىمىزگە كورسەتىلگەن زور قۇرمەت.
وزدەرىڭىز بىلەسىزدەر, ءبىزدىڭ ەلىمىزدىڭ ساياسي ۇستانىمى جان-جاقتى. ءتورتكۇل دۇنيەدەگى بارلىق ەلدەرمەن ىنتىماقتاستىقتى ءارى ىسكەرلىك قارىم–قاتىناستى ۇستاپ كەلەمىز. سونىڭ ءناتيجەسىندە قازاقستان بۇكىل الەمگە سەنىمدى سەرىكتەس رەتىندە تانىلىپ وتىر. وسىنىڭ ءبارى – نۇرسۇلتان نازارباەۆتىڭ ساليقالى ساياساتىنىڭ جەمىسى.
«يسلامدىق قارجى بويىنشا جاھاندىق كوشباسشى» سىيلىعى يسلام الەمىندەگى جوعارى ناگرادالاردىڭ ءبىرى بولىپ تابىلادى. بۇل تەك قانا قارجى سالاسى بويىنشا بەرىلەتىن سىيلىق ەمەس, جالپى العاندا ەكونوميكالىق تابىستار, گۋمانيتارلىق جەتىستىكتەر, تاعى باسقا دا سالالاردى دامىتۋ ءۇشىن زور ۇلەس قوسقان مەملەكەت قايراتكەرلەرىنە, سونىمەن قاتار سول مەملەكەتكە بەرىلگەن جوعارى باعا جانە سەنىم دەپ بىلەمىن.
روزاقۇل حالمۇرادوۆ, قازاقستان حالقى اسسامبلەياسىنىڭ مۇشەسى, ءماجىلىس دەپۋتاتى:
– ەلباسىمىز نۇرسۇلتان نازارباەۆتىڭ يسلام الەمىنىڭ جوعارى ناگراداسىن العانىن ەستىگەندە كەرەمەت قۋاندىم. وسىنداي باسشىسى بار, وسىنداي ماڭگىلىك ەلدىڭ ازاماتى بولعانىما قۋاندىم. ەلباسىمىزدىڭ وسىنداي مارتەبەلى سىيلىقپەن ماراپاتتالۋى ءبىزدىڭ ەلىمىزگە دەگەن قۇرمەتتىڭ دە, سەنىمنىڭ دە ارتقانىن بىلدىرەدى. ەلباسى مەرەيى – ەل مەرەيى دەگەن وسى. شىنىمەن دە بۇگىنگى قازاقستان قاي جاعىنان الىپ قاراساڭىز دا دامۋدىڭ داڭعىل جولىمەن كەلەدى. ەۋروپا مەن ازيا, باتىس پەن شىعىس ەلدەرىمەن جاقسى قارىم–قاتىناس ۇستاپ وتىرمىز. ءوز ەلىمىزدە قانشاما ۇلت وكىلدەرى بىرلىك پەن بەرەكەنى جاقتاپ ءومىر سۇرەمىز. قازاقستان حالقىنىڭ اسسامبلەياسى
جاساپ جاتقان جۇمىستار باسقا ەلدەرگە ونەگە بولىپ تا وتىر. وسىنىڭ ءبارىن الەم جۇرتى بىلەدى.
قازاقستاندا يسلام ازىق-تۇلىك قاۋىپسىزدىگى ۇيىمى جۇمىس ىستەيدى. بانكتەر قىزمەت جۇرگىزەدى. جالپى, ءبىزدىڭ مەملەكەت يسلام الەمىندەگى حالىقارالىق ۇيىمدارمەن جاقسى ءارىپتەستىك ورناتقان. وسىنىڭ ءبارى پرەزيدەنتتىڭ ىقىلاستى قولداۋىمەن جۇرگىزىلىپ جاتىر. استانا تورىندە سالىنىپ جاتقان «ابۋ-دابي پلازا» كەشەنى سول ىنتىماقتى قارىم–قاتىناستىڭ بەلگىسى دەسە بولادى.
وسىنداي اقجولتاي ويلارى مەن پىكىرلەرىن پارلامەنت دەپۋتاتتارى ەگور كاپپەل مەن احمەت مۇرادوۆ تا ورتاعا سالدى. مەملەكەت جانە قوعام قايراتكەرلەرىنىڭ «ەلباسى مەرەيى – ەل مەرەيى» دەگەن جۇرەكجاردى لەبىزدەرىنە ءبىز دە قوسىلدىق.
عالىم قوجابەكوۆ
