جاڭالىقتار

ەلباسىنىڭ «جاستىق شاعىمەن» قاۋىشتى

تۇڭعىش پرەزيدەنت كۇنى قارساڭىندا ەلباسى كىتاپحاناسىندا كينو اپتالىعىنىڭ اشىلۋ سالتاناتى ءوتتى. وندا پارلامەنت ءماجىلىسىنىڭ دەپۋتاتى, اكتەر نۇرلان ءالىمجانوۆ استانالىق جاستارمەن كەزدەستى.كەزدەسۋ بارىسىندا نۇرلان ءالىمجانوۆ ەلباسىنىڭ ءومىر جولى نەگىزىندە تۇسىرىلگەن «بالالىق شاعىمنىڭ اسپانى» ءفيلمى تۋرالى اڭگىمەلەپ بەردى.
«ءتۇسىرىلىم بارىسىندا اكتەرلىك شەبەرلىكتىڭ ۇلكەن مەكتەبىنەن ءوتىپ, كينو مايتالماندارىمەن تانىستىم. نۇرجۇمان ىقتىمباەۆ, ناتاليا ارىنباساروۆا سياقتى بەلگىلى ونەر ادامدارىمەن قاتار, ەۆگەني سيديحين, ەۆگەني ستىچكين, ۆالەنتين گافت, ۆلاديمير ستەكلوۆ, كسەنيا راپپوپورت سىندى رەسەيدىڭ بەتكەۇستار ازاماتتارىمەن ءتىل تابىسىپ, كەڭەستەرىن تىڭدادىم. شىنى كەرەك, بىرقاتار تۋىندىنىڭ تۇسىرىلىمىنە قاتىسىپ ۇلگەرسەم دە, اتالمىش ءفيلمنىڭ باستى كەيىپكەرىن, ەلباسىنىڭ ءرولىن سومدايتىنىم ءوزىمدى قامشىلاي تۇسۋگە تۇرتكى بولدى. ءتۇسىرىلىم توبىنىڭ ماعان ارتىپ وتىرعان ءۇمىتى مەن سەنىمىن, جەكە باسىمنىڭ زور جاۋاپكەرشىلىگىن سەزىندىم. كۇن ءتارتىبىن دۇرىس جۇيەلەپ, ۋاقىتىلى ۇيىقتاپ, دەنەنى شىنىقتىرىپ, ويىمدى سەرگەك ۇستاۋعا داعدىلاندىم. ەڭبەگىمنىڭ باستى جەمىسى رەتىندە تۇڭعىش پرەزيدەنتتىڭ ريزاشىلىعىن ەستىپ قۋانعانىم بار» دەدى ول.
نۇرلان ءالىمجانوۆتىڭ ايتۋىنشا, كينوعا تۇسكەن اكتەرلەرگە كەيدە ءوز كەيىپكەرلەرىنىڭ قانداي دا ءبىر قاسيەتى نەمەسە «ەنەرگەتيكاسى» جۇعىپ كەتۋى مۇمكىن. «ەلباسىنىڭ ءرولىن سومداۋدان العان اسەرىم ومىرىمە دە وڭ اسەرىن بەرىپ ءجۇر. بۇل – مەنىڭ تاعدىرىمداعى ۇلكەن ءبىر بەلەس, ءومىر جولىمداعى, ونەرىمدەگى ۇلكەن شىڭداردىڭ ءبىرى» دەپ اعىنان اقتارىلدى اكتەر.

تاعىدا

ۇقساس جاڭالىقتار

پىكىر ۇستەۋ

Back to top button