جاڭالىقتار

ەلدىگىمىزدىڭ جۇرەگى, ازاتتىعىمىزدىڭ ايناسى

كەشە «استانا-وپەرا» مەملەكەتتىك وپەرا جانە بالەت تەاترىندا استانا كۇنىنە وراي سالتاناتتى جيىن ءوتتى. وعان ەلباسى نۇرسۇلتان نازارباەۆ قاتىسىپ, كۇللى قازاقستاندىقتاردى مەرەكەسىمەن قۇتتىقتادى.

– ءبىز ءدۇيىم دۇنيەگە قازاق ەلىنىڭ جاڭا استاناسىن پاش ەتىپ, بەتاشارىن جاساعان كۇن كەشە عانا سياقتى ەدى. 1998 جىلى استانا ەسىلدىڭ وڭ جاعالاۋىنا ءيىن تىرەسكەن, ەسكى ۇيلەردەن تۇراتىن شاعىن عانا شاھار بولعانى ەسىمىزدە. نەبارى 15 جىلدا ءسانى مەن ساۋلەتى كەلىسكەن زاماناۋي قالاعا اينالدى, – دەدى پرەزيدەنت.

ەلباسى «قازاقستان – 2050» ستراتەگياسىندا ايتىلعان ۇرپاقتار ساباقتاستىعى يدەياسى استانا شەجىرەسىنەن كورىنىس تاپقانىن ايتا كەلىپ, الا­تاۋدان ارقاعا بەت العان ۇلى كوش – تاۋەكەل تاۋەل­سىزدىگىمىزدى نىعايتۋدا تاريحي قادام بولعانىن, تۇتاس ەل بولىپ جۇزەگە اسىرعان وسىناۋ ءۇردىستى بەيبىت كۇندەگى ەرلىك دەپ باعالاۋعا بولاتىنىن اتاپ ءوتتى.

ول ەگەمەندىگىمىزدىڭ تىرەگى, ەلدىگىمىزدىڭ جۇرەگى, ازاتتىعىمىزدىڭ ايناسى – استانانىڭ قارقىندى دامۋىن ناقتى دالەلدەرمەن ايشىقتادى.

سوڭعى 15 جىلدا ەلىمىزدىڭ جالپى ىشكى ونىمىندەگى استانانىڭ ۇلەسى 45 پايىزعا وسكەن. 2009-2012 جىلدار ارالىعىندا ەلوردادا جىل سايىن 17-18 مىڭ جاڭا جۇمىس ورنى اشىلعان. ەلوردالىقتاردىڭ ورتاشا جالاقىسى 10 ەسە ءوسىپ, 140 مىڭ تەڭگەگە جەتكەن.

قالادا بوي كوتەرگەن حالىقارالىق ءبىلىم وردالارى مەن زياتكەرلىك مەكتەپتەرى دە كوپ. بۇگىندە باس شاھارداعى 14 جوعارى وقۋ ورنىندا 15 مىڭعا جۋىق ستۋدەنت وقيدى, 1,5 مىڭ جاس ورەن الەمدىك دەڭگەيدەگى عىلىم مەن ءبىلىم ورتالىعى – نازارباەۆ ۋنيۆەرسيتەتىندە ءبىلىم الۋدا.

ەگەر 1998 جىلى استانادا نەبارى 200 مىڭ تۇرعىن بولسا, بۇل 15 جىلدا 4 ەسەگە ءوسىپ, 800 مىڭنان استى. جالپى ەسەپ بويىنشا 1 ميل­ليونعا جەتىپ قالۋى دا ىقتيمال. باس قالانىڭ قان­شالىقتى دامىپ كەلە جاتقانىن وسى ەكى كورسەتكىش ايعاقتايتىنىن ايتقان نۇرسۇلتان نازارباەۆ بۇگىندە مىڭجىلدىق قالانىڭ ىرگەتاسى بەرىك ورنىققانىن اتاپ ءوتتى.

ەلباسىنىڭ ايتۋىنشا, ەندى جاس استانامىزدىڭ قالاسى دا, ونىڭ تۇرعىندارىنىڭ ساناسى دا جاڭا زامانعا لايىق بولۋى كەرەك. سوندا عانا شىعار شىڭىمىز شىرقاۋ بيىكتە بولادى.

«حالقىمىزدىڭ جاڭا عاسىرداعى جارقىن شەجىرەسى ءدال وسى جەردە جازىلىپ جاتىر, جازىلا بەرەدى. جاسامپازدىقتىڭ جارقىن ۇلگىسى, بەيبىتشىلىكتىڭ بەسىگى – استانامىز ماڭگىلىك ەلدىڭ ارقاۋى بولىپ جاساي بەرسىن!» دەگەن ەلباسى بارشا قازاقستاندىقتى مەملەكەتتىك مەرەكە – استانا كۇنىمەن قۇتتىقتاپ, يگى تىلەگىن ايتتى.
سالتاناتتى جيىننىڭ سوڭى مەرەكەلىك كونتسەرتكە ۇلاستى.

قىمبات نۇرعالي

تاعىدا

ۇقساس جاڭالىقتار

پىكىر ۇستەۋ

Back to top button