كۇمىسبەكوۆتەن كۇي كەتەر كوكتەم كەلسە…
دۋمان ماماەۆ:
– قايىرلى كۇن! وسى ەلدىڭ سالىق تولەپ جۇرگەن ءارى الداعى ۋاقىتتا دا تولەي بەرەتىن ازاماتى رەتىندە وزىمدى ابدەن اشىندىرعان ماسەلەنى قاۋزاعىم كەلەدى. بيىل نەمەسە وسى عاسىردا كۇمىسبەكوۆ كوشەسىنە بىردەڭە ىستەلە مە؟ ماڭايىندا جەر كوپ ەكەنىنە قاراماستان, كوشە جولى وتە تار ءارى ويدىم-ويدىم, قۇددى اسپاننان مەتەوريت جاۋعانداي. ال, كولىك كەپتەلىسى جونىندە ايتىپ جاتپاي-اق قويايىن. جىل سايىن توسەيتىن اسفالت قاباتى قارمەن بىرگە ەرىپ كەتەدى, دۇرىس, ساپالى جول سالا الاتىن دەنى دۇرىس مامان تابىڭىزدار! بۇل – استانا عوي!..
1 ساۋىردە تۇسكەن شاعىمعا 5 كۇندە جاۋاپ بەرىلدى.
كوممۋنالدىق شارۋاشىلىق باسقارماسى:
– ءسىزدىڭ شاعىمىڭىزعا بايلانىستى «كەنەسارى- كۇمىسبەكوۆ كوشەلەرى-بوگەنباي باتىر-سارىارقا داڭعىلدارى شەگىندەگى ا,ب, سلابودكا اۋدانىنىڭ جوسپارلانعان ينجەنەرلىك جەلىلەرى مەن جولدارى» جوباسىن جۇزەگە اسىرۋعا تاپسىرىس بەرۋشى استانا قالاسى كوممۋنالدىق شارۋاشىلىق باسقارماسى ەكەنىن حابارلايمىز. بولىنگەن قارجىنىڭ تاپشىلىعىن ەسكەرە وتىرىپ, بيىل جانگەلدين كوشەسىنىڭ سارىارقا داڭعىلىنان كۇمىسبەكوۆ كوشەسىنە دەيىنگى بولىگىن قايتا جوندەۋ جوسپارلانىپ وتىر. ول 2015 جىلدىڭ قازان ايىندا اياقتالۋعا ءتيىس. ايتا كەتەرلىك ءجايت, «تسەلينوگراد» جانە «جىبەك جولى» تۇرعىن ءۇي كەشەندەرىنىڭ كىرەبەرىسىنە جانگەلدين كوشەسىنىڭ كۇمىسبەكوۆ كوشەسىنەن بەيسەكوۆ كوشەسىنە دەيىنگى بولىگىنە قۇرىلىس جۇمىستارىن جۇرگىزۋ بارىسىندا جول توسەلەدى, استانا قالاسى جولاۋشىلار كولىگى جانە اۆتوموبيل جولدارى باسقارماسى تاپسىرىس بەرىپ وتىرعان بۇل جوبا 2016-2017 جىلدارى جۇزەگە اسىرىلادى.
كۇل-قوقىس جايلاپ الدى كوشەمىزدى
ارحات ەسقاليەۆ:
– قۇرمەتتى ادىلبەك رىسكەلدىۇلى! قالانىڭ «وڭتۇستىك-شىعىس» شاعىن اۋدانىنداعى جانكەنت پەن تولەباەۆ كوشەلەرىنىڭ قيىلىسىنا قونىس تەپكەن تۇرعىنداردىڭ تازالىقتى ساقتاۋ ماسەلەسىنە كوز قىرىنىزدى سالعانىنىزدى وتىنەمىز. اتالعان كوشەلەرگە وتكەن, ياعني, 2014 جىلى تاس جول توسەپ, اسفالتتاعان ەدى. بىراق تۇرعىنداردىڭ وسى يگىلىكتى دۇرىس پايدالانىپ, قادەگە اسىرا الماي وتىرعانى ەرىكسىز قىنجىلتادى. وسىعان وراي كورسەتىلگەن مەكەنجايعا ءوز وكىلدەرىڭىزدى جىبەرۋىڭىزدى وتىنەمىز.
ماسەلە 6 كۇن ىشىندە شەشىمىن تاپتى.
الماتى اۋدانى اكىمىنىڭ اپپاراتى:
– قۇرمەتتى ارحات! الماتى اۋدانى اكىمىنىڭ اپپاراتى ءسىزدىڭ شاعىمىڭىزدى تەكسەرە كەلىپ, بۇگىنگى تاڭدا جانكەنت پەن تولەباەۆ كوشەلەرىنىڭ قيىلىسى كۇل-قوقىستان تازارتىلعانىن حابارلايدى. قوسىمشا ايتارىمىز: اتالعان كوشەلەردىڭ سانيتاريالىق احۋالىنا جاۋاپتى مەردىگەر ۇيىمنىڭ جەتەكشىسىنە مۇنداي جاعدايعا جول بەرۋگە بولمايتىندىعى ءتۇسىندىرىلدى, كۇل-قوقىس پەن قاتقىل تۇرمىس قالدىقتارىن ۋاقتىلى تاسىپ شىعارماۋ كەمشىلىگى تاعى دا قايتالانعان رەتتە اتالعان مەردىگەر ۇيىمعا ايىپپۇل سالىنادى.
…سانيتارياعا ساڭعىپ جۇر قۇستار
نيكولاي سوروكوپۋد:
– «Green» سۋپەرماركەتىندە ىلعي پايدالانۋ مەرزىمى ءوتىپ كەتكەن نەمەسە وتۋگە تايالعان تاۋارلار ساتىلادى. ال, عيمارات ىشىندە قۇستار – تورعايلار ۇشىپ, ءبىزدىڭ ساتىپ الاتىن تاعامىمىزعا ساڭعىپ جۇرەتىنى ءبىر بولەك اڭگىمە… سانيتاريالىق-ەپيدەميولوگيالىق قاداعالاۋدىڭ قايدا قارايتىنى تۇسىنىكسىز. الدەبىر ولار دا بارشامىزعا بەلگىلى نورما اتاۋلىعا پىسقىرماي ما؟
ماسەلە 8 كۇن ىشىندە شەشىمىن تاپتى.
مەملەكەتتىك سانيتاريالىق-ەپيدەميولوگيالىق قاداعالاۋ دەپارتامەنتى:
– قۇرمەتتى نيكولاي ۆاسيلەۆيچ! «Green» سۋپەرماركەتىندە پايدالانۋ مەرزىمى ءوتىپ كەتكەن نەمەسە وتۋگە تايالعان تاۋارلار ساتىلاتىندىعىن حابارلاعان اۋەلگى شاعىمىڭىزدا نىساننىڭ مەكەنجايى كورسەتىلمەگەن ەدى. 30 ناۋرىزدا دەپارتامەنتكە ءوزىڭىز اياقتاي كەلگەن كەزىڭىزدە شاعىم جازۋدىڭ جانە ونى قاراۋدىڭ ءتارتىبىن تۇسىندىردىك, سودان سوڭ سۋپەرماركەتتىڭ ءتيىستى دەرەكتەرى مەن شاعىمدانۋعا تۇرتكى بولعان سەبەپتەر جازباشا تۇردە رەسىمدەلدى. قازىرگى كەزدە 2015 جىلعى 31 ناۋرىزدا تۇسكەن № س-419 جازباشا شاعىمىڭىزعا سايكەس تەكسەرىس تاعايىنداۋ تۋرالى اكتى قر باس پروكۋراتۋراسى قۇقىقتىق ستاتيستيكا جانە ارناۋلى ەسەپكە الۋ كوميتەتىنىڭ الماتى قالاسى بويىنشا باسقارماسىندا تىركەلۋدە. سىزگە زاڭدا بەلگىلەنگەن مەرزىمدە جاۋاپ قايتارىلادى.
«ايالدامادان اسىپ كەتكەنى, نە ەتكەنى؟!.»
باعدات ءامىرينا:
– 2015 جىلعى 29 ناۋرىزدا (ساعات 14.10-دە) № 40 (مەمل.نومەرى z182cw) اۆتوبۋستا كەلە جاتتىم. مەن جانە تاعى ءۇش جولاۋشى» بەيسەكباەۆ» (بۇرىنعى «جۋكوۆكا») ايالداماسىنا تۇسۋگە دايىندالدىق. اۆتوبۋس زىمىراعان كۇيىندە ايالداماعا توقتاماستان وتە شىقتى, كولىكتى توقتاتۋ تۋرالى ءوتىنىشىمىزدى قۇلاعىنا ىلگەن دە جوق. كەنەسارى – سەمبينوۆ كوشەلەرىنىڭ قيىلىسىندا جۇرگىزۋشى ەسىكتى اشىپ, جولاۋشىلاردى تۇسىرىپ, ءارى قاراي جونەي بەردى. بىزدە جۇرگىزۋشىلەر قاشاننان بەرى جولاۋشىلار تاسىمالداۋ ەرەجەسىن وزدەرىنشە بەلگىلەيتىن بولدى؟
استانا قالاسىنىڭ ارقيلى اۆتوپاركىنە بىرنەشە رەت تەلەفون شالىپ, № 5 (مەمل.ءنومىرى 193 AH 01), № 20 (مەمل.ءنومىرى Z 737 CN) مارشرۋتتارىنا قاتىستى شاعىم ايتتىم, بىراق ديسپەتچەر ولارعا ەش شارا قولدانىلمايتىنىن جۇقالىپ جەتكىزدى; تاسىمالداۋ ءبولىمىنىڭ باستىعىمەن دە سويلەستىم, ودان دا تۇك ناتيجە شىققان جوق. سوندا باسشىسىن قوسشىسى بيلەگەنى مە؟
ماسەلە 8 كۇندە شەشىمىن تاپتى.
جولاۋشىلار كولىگى جانە اۆتوموبيل جولدارى باسقارماسى:
– باعدات, كەز كەلگەن ءتارتىپ بۇزۋشىلىق تالقىعا سالىنىپ, دەرەگى دالەلدەنگەن شاقتا اكىمشىلىك شارا قولدانىلادى. 29 ناۋرىز كۇنى № 40 مارشرۋت بويىنشا قىزمەت كورسەتكەن Z 182 CW ءنومىرلى اۆتوبۋستىڭ ايالداماعا توقتاماي كەتكەنى تۋرالى ءسىز كورسەتكەن دەرەك دالەلدەنىپ, جولاۋشىلار مەن جۇك تاسىمالداۋ ەرەجەسىن بۇزعانى ءۇشىن م.ايتەكەەۆ جۇمىستان بوساتىلدى, كولىك ماماندارىنىڭ بىلىكتىلىگىن ارتتىرۋ ورتالىعىنا قايتا اتتەستاتسيادان وتۋگە جىبەرىلدى. ال, 2015 جىلعى 1 قاڭتارى مەن 31 ناۋرىز ارالىعىندا Z 031 CM ءنومىرلى اۆتوبۋسقا قاتىستى شاعىم ەش جەردە تىركەلمەگەن. № 2 اۆتوبۋس پاركىندە جولاۋشىلار مەن جۇك تاسىمالداۋ ەرەجەسىنە بايلانىستى قوسىمشا تۇسىنىك بەرۋ جۇمىستارى جۇرگىزىلدى.
ارينە, وسى سالادا جۇمىستى ۇيىمداستىرىپ, باقىلاۋ ورناتۋدىڭ قولدانىستاعى جۇيەسى ويداعىداي ناتيجە بەرمەي وتىرعانى راس. وسىعان وراي قازىرگى كەزدە قوعامدىق كولىك جۇمىسىن جەتىلدىرىپ, جولاقى تولەۋدىڭ ەلەكتروندى جۇيەسى ەنگىزىلۋدە.
تىيىم بەلگىسىن تۇراقجاي جاساپ…
Tal Albiev:
– قايىرلى كۇن! تۇركىستان كوشەسىندەگى 33/1- مەكەنجايدا ورتا مەكتەپ ورنالاسقان; ساباق باستالار جانە اياقتالار كەزدە بالالاردى وقۋ ورنىنا جەتكىزىپ, الىپ كەتەتىن اۆتوموبيلدەر ءيىن تىرەسىپ, كوشەنى كەپتەپ تاستايدى. جول وسى بولىگىنە ايالداۋعا تىيىم سالاتىن بەلگى تۇر, بىراق مەكتەپكە كەلەتىن كولىكتەر ونى تۇراقجايعا اينالدىرعان. سوندىقتان, وقۋ ورنى باسشىلىعىمەن جانە جپپ قىزمەتكەرلەرىمەن ارنايى اڭگىمە وتكىزىپ, جول بويىن بىتەپ تاستاعانشا, مەكتەپ اۋلاسىنىڭ قاقپاسىن اشىپ قويۋ كەرەك دەپ ويلايمىن; ەكىنشىدەن, ۇنەمى تۇركىستان-سارايشىق كوشەلەرىنىڭ قيىلىسىندا تۇراتىن جپپ قىزمەتكەرلەرىنە ساباق باستالار كەزدە (ساعات 12.30 – 14.00-دە) مەكتەپ ماڭايىنداعى كوشەلەردە كەپتەلەك تۋىنداتاتىن قۇبىلىستاردىڭ الدىن الۋدى, جول ءجۇرۋ ءتارتىبىن بۇزعانداردى اكىمشىلىك جاۋاپكەرشىلىككە تارتۋدى مىندەتتەۋ كەرەك.
ماسەلە 18 كۇندە شەشىمىن تاپتى.
ىشكى ىستەر دەپارتامەنتى:
– استانا قالاسى ءىىد اكىمشىلىك پوليتسيا باسقارماسى ءسىزدىڭ شاعىمىڭىزعا وراي № 66 مەكتەبىنە تاياۋ تۇركىستان كوشەسى باقىلاۋعا الىندى. ساپ ءتۇزۋ بولىمشەلەرىنىڭ قىزمەتكەرلەرى قاربالاس شاقتا (تاڭعى, تۇسكى جانە كەشكى مەزگىلدە) جۇرگىزۋشىلەردىڭ كولىككە جولاۋشىلاردى مىنگىزىپ-تۇسىرگەندە ايالداۋ ەرەجەلەرىن بۇزۋىنا جول بەرمەۋ ءۇشىن جۇمىستانۋدا. جىل باسىنان بەرى وسى كوشەدە كولىك قۇرالدارىن قاڭتارۋدىڭ 40-تان اسا دەرەگى تىركەلدى. مەكتەپ ماڭىنداعى اۋماقتى ۋاقىتشا ايالداما – ماشينا قاڭتاراتىن جەر رەتىندە پايدالانۋ ماقساتىندا قاقپانى اشىپ قويۋ ماسەلەسىن ءبىز ەسىل اۋدانىنىڭ اكىمدىگىمەن بىرنەشە رەت تالقىلادىق. سونىڭ قورىتىندىسى بويىنشا ايتارىمىز, قورشاۋ ىشىندەگى اۋماقتاعى وقۋشىلاردىڭ قاۋىپسىزدىگىنە وقۋ ورنى باسشىلىعى جاۋاپ بەرەدى. مىنە, سوندىقتان, № 66 ورتا مەكتەپ توڭىرەگىندەگى اۋماقتى ورتاق پايدالانىمعا ارنالعان تۇراقجايعا اينالدىرۋ جونىندەگى ۇسىنىسىڭىزدى جۇزەگە اسىرۋدىڭ مۇمكىندىگى بولماي تۇر.
دايىنداعان ماقسوت ىزىمۇلى
- دەرەكتەر www.astana.kz سايتىنىڭ «حالىقتىق باقىلاۋ» جانە استانا قالاسى اكىمدىگىنە قاراستى مەملەكەتتىك مەكەمەلەر مەن كوممۋنالدىق قازىنالىق كاسىپورىندار سايتتارىنىڭ «سۇراق-جاۋاپ» بولىمىنەن ىرىكتەلىپ الىندى.
