قۇدايعا شۇكىر, بۇگىندە ەلوردا اۋماعىندا ساۋلەتى مەن داۋلەتى جاراسقان بىرنەشە مەشىت بوي كوتەرگەن. سولاردىڭ قاتارىنداعى س.عىلماني مەشىتى – قالانىڭ بايىرعى ءمىناجات ورنى. يماندىلىق ۇياسىنا اينالىپ وتىرعان ايتۋلى مەشىتتە بيىل قازاقستان مۇسىلماندارى ءدىني بىرلەستىگىنىڭ باستاماسىمەن مۇراجاي اشىلىپ, جاماعاتتى ءبىر قۋانىشقا بولەگەن ەدى.
قازىر وسى مۇراجايعا كەلۋشىلەر كوبەيە تۇسكەن. 1952 – 1972 جىلدار ارالىعىندا ورتا ازيا مەن قازاقستان ءدىني باسقارماسىنىڭ ۋاكىلەتتى وكىلى, سونىمەن قازاقستاننىڭ قازيى بولعان سادۋاقاس عىلماني اتىنداعى وسىناۋ مۇراجايدىڭ ىشىنە كىرگەننەن-اق ادام بويىندا ەرەكشە ءبىر يماندىلىق پەن سابىرلىق پايدا بولاتىنداي. مۇراجاي ديرەكتورى باحىتحان سۇلتانبايۇلى كەلۋشىلەر كۇن ساناپ كوبەيىپ جاتقانىن ايتىپ: «ءدىن قايراتكەرى سادۋاقاس عىلمانيدىڭ ونەگەلى ءومىرى تۋرالى بىلگىسى كەلەتىن جاماعاتقا وسىنداعى قۇجاتتار مەن دۇنيەلەردى كورسەتىپ قانا قويماي, ءوز تاراپىمىزدان قوسىمشا مالىمەتتەر بەرىپ, ەل اۋزىندا ساقتالعان اڭگىمەلەردى بايانداپ بەرەمىز», – دەيدى.
ءبىز بارعان كۇنى استانالىق زەينەتكەر ەلەمەس مۇقاتوۆا اپاي مۇراجايعا نەمەرەلەرىن, اعايىن-تۋىستارىن ەرتىپ كەلىپ, ارالاپ ءجۇر ەكەن. نايب-يمام مامليۋك مۇساەۆ ارنايى كەلگەن قوناقتاردى جىلى شىرايمەن قارسى الىپ, ارداقتى انانىڭ مۇراجايعا الىپ كەلگەن ەستەلىك دۇنيەلەرى ءۇشىن العىسىن ايتتى. ەلەمەس اجەنىڭ اكەسى كەزىندە اقمولا وبلىستىق «ستالين تۋى» گازەتىندە قىزمەت اتقارعان عالىمجان مۇقاتۇلى ءدىن قايراتكەرى سادۋاقاس عىلمانيدىڭ شاكىرتى بولعان ەكەن. وسى ورايدا ءباسپاسوز ارداگەرى مەن ءدىن قايراتكەرى اراسىنداعى رۋحاني جاقىندىق جايلى مۇراجايعا ارنايى كەلگەن ەڭبەك ارداگەرى-زەينەتكەر قۋاندىق تاجەنوۆ اسەرلەپ اڭگىمەلەپ بەردى. سادۋاقاس عىلمانيدىڭ ءدىنىمىزدى ۇلىقتاۋ, ناسيحاتتاۋ جونىندە جۇرگىزگەن جۇمىسى وشپەس ونەگە ەكەنىن جەتكىزدى. بۇل رەتتە عالىمجان مۇقاتۇلىنىڭ ءدىن قايراتكەرىنە سەنىمدى سەرىكتەس بولعانىن دا ايتىپ, ءوزى كورىپ-ەستىگەن ءبىراز وقيعالاردى ەسكە ءتۇسىردى.
جاقسى جۇزدەسۋمەن باستالىپ, عيبراتتى سىرلاسۋمەن تامامدالعان وسى كەزدەسۋدىڭ سوڭىندا مۇراجاي ديرەكتورى ءۇرىم-بۇتاعىن, تۋىس-جاقىندارىن ارنايى ەرتىپ كەلگەن ەلەمەس اپاعا اق پەيىلى ءۇشىن العىسىن ايتتى. وسىنداي كوڭىل كونشىتكەن كەزدەسۋگە كۋا بولعان بىزدەر دە ءبىر مارقايىپ قالدىق.
عالىم قوجابەكوۆ
