اقپارات جانە قوعامدىق دامۋ ءمينيسترى دارحان قىدىرالى «Elorda Aqparat» جشس-كە ارنايى كەلىپ, استانالىق جۋرناليستەردىڭ جاعدايىن ءبىلىپ, سالانىڭ ورتاق ماسەلەسىن تالقىلادى.
پرەزيدەنت قاسىم-جومارت توقاەۆ ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ماقساتىندا مينيستر دارحان قىدىرالى بىرقاتار ءوڭىردىڭ شىعارماشىلىق ۇجىمىمەن كەزدەسىپ, ارىپتەستەرىمەن ەمەن-جارقىن اڭگىمەلەسىپ, ايماقتاعى جۋرناليستەردىڭ تىنىس-تىرشىلىگىمەن تانىسىپ جۇرگەنىن جاقسى بىلەمىز. باس قالانىڭ نەگىزگى اقپارات قۇرالدارىن بىرىكتىرگەن مەدياحولدينگكە كەلۋىنەن سونداي ساباقتاستىقتى كوردىك.
– «Elorda Aqparat» جشس يەلىگىندەگى اقپارات قۇرالدارى باس قالانىڭ رەسمي بيلىگىمەن تىعىز بايلانىستا جۇمىس ىستەپ, حالىققا ساپالى قىزمەت كورسەتىپ كەلەدى. ءبىزدىڭ باسىلىمدار شىعارماشىلىق ۇستاحانا رەتىندە بەلگىلى. جۋرناليست شىعارماشىلىق ىزدەنىستە جۇرەتىن ينتەللەكت يەسى دەسەك, كومپانيا قالامگەرلەرگە جان-جاقتى جاعداي جاساۋدى قاراستىرۋدا, – دەدى ۇجىم باسشىسى ولجاس سىدىقبەك.
قوعامنىڭ بارلىق سالاسىنا تسيفرلاندىرۋ دەندەپ ەنىپ, تەحنولوگيا مەن ينتەرنەت جىلدام دامىعان ۋاقىتتا ءداستۇرلى باسىلىمدار قيىندىقپەن بەتپە-بەت كەلدى. قازىر شىعارماشىلىق ۇجىمدار گازەت-جۋرنالداردى شىعارۋدا ساراپتامالىق ماقالالار مەن جۋرناليستىك زەرتتەۋلەرگە باسىمدىق بەرىپ, وقىرماننىڭ تالعامىنا ساي جۇمىس ىستەۋدە. الايدا باسىلىم تارالىمى ازايىپ, شىعارۋ شىعىنى كوبەيدى. نارىق زاڭدىلىعىنا ساي قاعاز, تاسىمال, ۋاقىت سىندى قۇندىلىقتاردى ءتيىمدى ۇيلەستىرە العان جاڭا مەديانىڭ داۋرەنى ءجۇرىپ تۇر. بۇل – الەمدىك تەندەنتسيا. ءمينيستردىڭ گازەت وندىرىسىنە ءمان بەرىپ, بۇل سالانى قاشاندا قولدايتىنىن ايتقانى كوڭىلىمىزدى جىلىتىپ, سەنىمىمىزدى شىڭداي ءتۇستى.
– گازەتتىڭ جۇمىسى وتە اۋقىمدى ءارى جاۋاپتى. تاسقا باسىلعان قۇندىلىقتىڭ ۋاقىت وتكەن سايىن باعاسى ارتا بەرەدى. ءبىز گازەت-جۋرنالداردىڭ سوڭعى وقىرمانى قالعانىنشا قولداۋدى توقتاتپايمىز. «قازپوچتا» اق-پەن مەموراندۋمعا وتىرىپ, گازەت تاراتۋ ىسىنە سەرگەك قاراۋعا ۋاعدالاستىق. قاعاز شىعىندارىندا دا ازايتۋ باعىتىندا جۇمىس ىستەۋدەمىز, – دەدى دارحان قۋاندىقۇلى.
استانا قالاسىنىڭ تىنىس-تىرشىلىگى تۋرالى جەدەل اقپارات تاراتىپ, جاعىمدى جاڭالىقتىڭ جارشىسىنا, الەۋمەتتىك ماسەلەلەردىڭ تارازىسىنا اينالعان شىعارماشىلىق ۇجىم قىزمەتكەرلەرىنىڭ ەڭبەگىن قالاي دارىپتەسە دە جاراسادى.
– «Elorda Aqparat» تاۋەلسىزدىكپەن تۇستاس قالىپتاسىپ, استانا قالاسىنىڭ ءوسىپ-وركەندەۋىنە, رۋحاني دامۋىنا دەم بەرىپ كەلەدى. ۇلكەن ۇستاحاناعا اينالعان شىعارماشىلىق مەكتەپ. مۇندا شىعارماشىلىعىن شىڭداپ, ەلگە تانىلعان تالعات باتىرحان, بەكەن قايراتۇلى, قىمبات توقتامۇرات, ازامات ەسەنجول, ورىنبەك وتەمۇرات جانە ت. ب. «ەگەمەن قازاقستانعا» اۋىسىپ, ەل گازەتىندە جۋرناليستىك جولىن جالعاستىردى, – دەدى دارحان قىدىرالى.
ەلدەگى قوعامدىق-ساياسي وقيعالارعا جۋرناليستەر بەلسەندى ارالاسىپ, ەلدىكتىڭ جولىندا ادال ەڭبەك ءسىڭىرىپ كەلەدى. 20 قاراشادا وتكەن كەزەكتەن تىس پرەزيدەنت سايلاۋىندا جۋرناليستەر جەدەل جاڭالىق تاراتىپ, ساراپتامالىق ماقالالار جازىپ, ساياسي ناۋقاننىڭ ءمان-ماڭىزىن دارىپتەدى. اقپارات جانە قوعامدىق دامۋ ءمينيسترى دارحان قىدىرالى بەلسەندى, بىلىكتى, بەدەلدى جۋرناليستەردىڭ ەلدىك مۇرات, ۇلتتىق مۇددە جولىنداعى ەڭبەكتەرىن اتاپ, گازەت ءوندىرىسىنىڭ دامۋىنا ايرىقشا ۇلەس قوسىپ جۇرگەن عالىم قوجابەكوۆكە, لاريسا ۋۆاليەۆاعا جانە گۇلشات ساپارقىزىنا «اقپارات سالاسىنىڭ ۇزدىگى» توسبەلگىسىن تابىستادى.
– استانا قالاسىن باسقارعان اكىمدەردىڭ ىشىندە ءبىرىنشى رەت التاي كولگىنوۆ رەداكتسياعا كەلىپ, ەلوردالىق جۋرناليستەرمەن ارنايى جۇزدەسىپ, بىرقاتار قاجەتتىلىكتى شەشۋگە جاردەمدەستى. ەندى سالا مينيسترلەرىنىڭ ىشىندە ءوزىڭىز العاش بولىپ كەلىپ تۇرسىز. بۇل جىل وسىنداي ەرەكشەلىگىمەن ەستە قالاتىن بولدى. ءمينيستردىڭ قولىنان ماراپات العانىمىزعا قۋانىشتىمىز! – دەدى «استانا اقشامى» گازەتىنىڭ قالىپتاسۋ كەزەڭىنەن ەڭبەك ەتىپ كەلە جاتقان عالىم قوجابەكوۆ.
ال «ۆەچەرنيايا استانا» گازەتىنىڭ باس رەداكتورى لاريسا ۋۆاليەۆا باسىلىمدار كۇردەلى كەزەڭدى باستان وتكىزىپ جاتقانىن, وسىنداي كەزدە رەسمي بيلىكتىڭ قولداۋى ماڭىزدى ەكەنىن اتادى. سونداي-اق جەلىدە فەيك اقپاراتتار جەلدەي ەسكەن ۋاقىتتا شىنايى اقپاراتقا سۇرانىس وسكەنىن, ال رەسمي اقپارات كوزى – گازەت ەكەنىن ەسكە سالدى.
– دۇرىس ايتاسىز, قازىر شىنايىلىعى تەكسەرىلگەن اقپاراتقا سۇرانىس جوعارى. قازىر راستالعان اقپاراتتى جەدەل تاراتۋ ماڭىزدى بولىپ تۇر. ماسس-مەديا تۋرالى جاڭا زاڭدا «ۇلتتىق اقپاراتتىق يممۋنيتەتتى» قالىپتاستىرۋ جانە دامىتۋعا باسىمدىق بەرىلەدى. وندا جۋرناليستەردىڭ مارتەبەسىن كوتەرۋ, مەملەكەتتىك قارجىلاندىرۋدى رەفورمالاۋ, مەملەكەتتىك ورگاندارمەن ءوزارا ءىس-قيمىلدى جەتىلدىرۋ, ينتەرنەت-جارنامانى رەتتەۋ, باسىلىمداردى قۇن سالىعىنان بوساتۋ, اقپاراتقا قولجەتىمدىلىكتى ارتتىرۋ سەكىلدى بىرقاتار ارتىقشىلىق كوزدەلۋدە, – دەدى مينيستر.
جۋرناليستەردىڭ قۇقىعىن نىعايتۋ جانە مىندەتىن قايتا قاراۋ, سونداي-اق شىعارماشىلىق وكىلدەرىنىڭ ارتىقشىلىعىن كەڭەيتۋدى قاراستىراتىن زاڭدى جۋرناليستەر قاۋىمى اسىعا كۇتىپ جۇرگەنى انىق.
ءداستۇرلى باسىلىمنىڭ ىشكى جاعدايىن تەرەڭ تۇسىنەتىن دارحان قۋاندىقۇلى رەداكتسياعا كەلىپ, شىعارماشىلىق وكىلدەرىمەن جىلى سۇحبات قۇرعانىنان جۋرناليستەر قاۋىمى شابىتتانا ءتۇستى.
جۋرناليستيكا سالاسىندا گازەتتە قالىپتاسىپ, تەلەارنالاردا شىڭدالىپ, ءباسپاسوز قىزمەتىندە حالىق پەن بيلىكتىڭ دانەكەرى بولعان گۇلشات ساپارقىزى:
– مەملەكەتىمىزدىڭ وركەندەۋى جولىندا جازعان ماقالالارىمىز ارقىلى تيتتەي بولسا دا ءوز ۇلەسىمىزدى قوسا الساق, قاراپايىم حالىقتىڭ جانايقايىن, پروبلەمالارىن قوزعاپ, حالىق پەن بيلىك اراسىنداعى التىن كوپىر بولىپ, تۇرعىنداردىڭ تالاپ-تىلەگىن جەتكىزە الساق – ماقساتىمىزدىڭ ورىندالعانى. وسى باعىتتاعى ەڭبەگىمىزدى باعالاعاندارىڭىز ءۇشىن العىس بىلدىرەمىن, – دەدى.
«Elorda Aqparat» جشس تاريحىندا اقپارات جانە قوعامدىق دامۋ ءمينيسترى دارحان قىدىرالى تۇڭعىش كەلۋىمەن سيپاتتالىپ, ساقتالاتىن بولادى.
