استانا قالاسىن تازالاۋ, اباتتاندىرۋ, كوگالداندىرۋ بويىنشا 10 ءساۋىر مەن 10 مامىر ارالىعىندا وتكەن ەكولوگيالىق ايلىقتىڭ قورىتىندىسى شىعارىلدى.
ەلوردا تۇرعىندارى كوشەسى تازانىڭ كوڭىلى تازا بولاتىنىن ساناسىنا سىڭىرگەلى قاشان. سونىڭ ءبىر كورىنىسى جىلىنا ەكى مەزگىل وتكىزىلەتىن تازالىق ايلىعىنان دا ايقىن اڭعارىلادى. استاناعا دەگەن جىلى سەزىمىن بىلدىرگىسى كەلەتىن ءار تۇرعىن جىل سايىن كۇرەك-كەتپەندەرىن قولدارىنا ۇستاپ, تازالىق ايلىعىنا شىعادى. بۇگىندە سەنبىلىككە قاتىسۋشىلاردىڭ قاتارى دا ارتا تۇسكەن. قالا اكىمدىگىنىڭ بەرگەن مالىمەتىنە سۇيەنسەك, وسى جولعى ەكولوگيالىق ايلىققا ەلوردا بويىنشا 134 675 ادام قاتىسقان. سونىڭ ىشىندە الماتى اۋدانى بويىنشا – 69 902, سارىارقا اۋدانى بويىنشا – 41 115 جانە ەسىل اۋدانىنان – 23 658 ادام. ولارعا كومەككە كەلگەن تەحنيكانىڭ كۇشى دە از ەمەس. بارلىعى 519 جۇك تيەگىش كولىك پەن 1223 جۇك تەحنيكاسى جۇمىلدىرىلعان.
سەنبىلىك كەزىندە ەلوردانىڭ سانيتارلىق جاعدايىنا عانا ەمەس, كوگالداندىرۋ ىسىنە دە ايرىقشا كوڭىل ءبولىندى. قالانىڭ كورىكتى بولۋىنا جايقالعان جاسىل تال-تەرەكتىڭ دە ۇلەسى بار. سوندىقتان كەلەشەكتە ەلوردانى جاسىل جەلەگى جايقالعان اسەم شاھارعا اينالدىرۋ مىندەتى تۇر. وسى جولعى كوكتەمگى تازالىق ايلىعىندا باس وردادا ارقانىڭ اۋا رايىنا ءتوزىمدى 5 073 اعاش, 1202 كوشەت وتىرعىزىلدى. بۇلار ءالى-اق جايقالىپ, اينالامىزدىڭ اجارىن ايشىقتاي تۇسەرى انىق.
كوپتىڭ ىسىندە بەرەكە بار. كارى-جاس دەمەي, ەڭبەك مايدانىنا بىركىسىدەي جۇمىلعان كوپشىلىكتىڭ ارقاسىندا استانا ايناداي جارقىرادى. كوشەلەر مەن تۇرعىن ۇيلەردىڭ اينالاسى كۇل-قوقىستان تازالانىپ, عيماراتتاردىڭ ءىشى-سىرتى, تەرەزە ەسىكتەرىنەن تارتىپ, مۇنتازداي جۋىلدى. 22 مىڭنان استام شارباق قايتادان قالپىنا كەلتىرىلىپ, 2300-دەن استام كوشە شامدارى شاڭ-توزاڭنان ارىلدى, 5 مىڭنان استام اعاشتىڭ ءتۇبى اكتەلدى.
سەنبىلىككە بەلسەنە اتسالىسقان تۇرعىنداردىڭ كۇشىمەن قالادان 7 571 توننا قوقىس شىعارىلدى.
ق.نۇرعالي
