جىل سايىن قازاقستان رەسپۋبليكاسى پرەزيدەنتىنىڭ اكىمشىلىگى استانا, الماتى قالالارىنىڭ جانە وبلىستاردىڭ الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى بويىنشا رەيتينگ وتكىزەدى.
ول جىل قورىتىندىسىندا رەسمي ستاتيستيكالىق مالىمەتتەرگە سۇيەنە وتىرىپ جاسالادى. ونىڭ ناتيجەلەرى ءار ءوڭىردىڭ الەۋەتىن ناقتى كورسەتىپ, دامۋ بارىسىنىڭ وسال تۇستارىن ايقىنداۋعا مۇمكىندىك بەرەدى.
2011 جىلى وتكىزىلگەن رەيتينگ قورىتىندىسى بويىنشا دامۋ دەڭگەيى جونىنەن استانا قالاسى ءبىرىنشى ورىنعا شىعىپ, قاتارىنان ەكىنشى مارتە «دامۋى جوعارى دەڭگەيدەگى قالا مارتەبەسىن» يەلەندى.
ودان كەيىنگى ورىنداردا اتىراۋ وبلىسى, الماتى قالاسى مەن ماڭعىستاۋ وبلىسى تۇر. اسىرەسە, نەگىزگى الەۋمەتتىك دامۋ كورسەتكىشتەرىنىڭ دەڭگەيىن سارالاعاندا, ەلوردادا تۇرمىس كەشىپ, ءبىلىم الۋ, الەۋمەتتىك قورعالۋ مۇراتىنا جەتۋگە قولايلى جاعدايلار جاسالعانى بايقالادى.
سونىمەن قاتار, ەكونوميكالىق دامۋ باعىتىندا دا استانا ۇزدىك كورسەتكىشتەرگە قول جەتكىزىپ وتىر. اتاپ ايتقاندا, جان باسىنا شاققانداعى تۇرعىنداردىڭ باسپانامەن, كولىكپەن قامتاماسىز ەتىلۋى, سالىق تۇسىمدەرى ت.ب. كورسەتكىشتەرى جوعارى.
سونىمەن, وتكەن جولى قالا اكىمدىگىنىڭ ورنىقتى دامۋ باعىتىنداعى باسىم مىندەتتەر مەن ماقساتتاردى بايىپتى تاڭداپ, جۇيەلىكپەن جۇزەگە اسىرا ءبىلۋى استانانىڭ ابىرويىن اسقاقتاتىپ, بەدەلىن جوعارىلاتا ءتۇستى.
ياعني, 2011 جىلى ەلوردانىڭ جالپى وڭىرلىك ءونىمىنىڭ كولەمى, الدىڭعى جىلمەن سالىستىرعاندا, 11,9. % -عا ءوسىپ, 2 ترلن 298 ملرد تەڭگەنى قۇراعان. ونەركاسىپ ءونىمىنىڭ كولەمى 121,4 %-عا ارتىپ, 1647 ملرد تەڭگەگە جەتكەن.
ورتا جانە شاعىن كاسىپكەرلىك سۋبەكتىلەرى 887 ملرد تەڭگەنىڭ ءونىمىن ءوندىرىپ, قىزمەت تۇرلەرىن كورسەتكەن, بۇل 2010 جىلعى كورسەتكىشتەن 4,3%-عا وسكەنىن بىلدىرەدى. سونداي-اق, نەگىزگى كاپيتالعا ينۆەستيتسيا سالىپ, قۇرىلىس نىساندارىنا قارجى جۇمساۋ كورسەتكىشتەرى دە ەداۋىر ارتقانى بايقالادى.
وسىناۋ ءوسۋ تەندەنتسياسى بيىل دا ساقتالىپ وتىر. ماسەلەن, تۇرعىن ۇيلەر سالىپ, پايدالانۋعا بەرۋ كورسەتكىشىنەن استانا رەسپۋبليكادا ءبىرىنشى ورىندى يەلەنىپ تۇر. سونىمەن قاتار, شاعىن جانە ورتا كاسىپكەرلىكتى دامىتۋ, تۇرعىنداردى جۇمىسپەن قامتۋ, بولشەك ساۋدانىڭ اينالىمىن ارتتىرۋ ت.ب. سالاسىندا دا ەلوردا ەشكىمگە دەس بەرەر ەمەس.
اينۇر قارامەنديەۆا
