ون ءبىر جىل بويى وزات وقىپ, ۇزدىك ۇلگەرىم كورسەتكەن 294 ەلوردالىق تۇلەك «التىن بەلگى» يەگەرى اتاندى. ءبىلىمدى جەتكىنشەكتەردى نۇر-سۇلتان قالاسىنىڭ اكىمى التاي كولگىنوۆ ماراپاتتادى.
تالاپتىڭ تۇلپارىن ءمىنىپ, تاس قياعا ورلەگەن ۇل-قىزدار ءۇشىن ۇيىمداستىرىلعان «ەلوردا ماقتانىشى» اتتى سالتاناتتى كەشتىڭ اتموسفەراسى مۇلدە ەرەك بولدى. جيىن بارىسىندا شاھار باسشىسى:
– بيىل 6274 استانالىق وقۋشى مەكتەپ ءبىتىرىپ, ءومىر جولدارىنداعى العاشقى بەلەستى باعىندىردى. ونىڭ 294-ءى – «التىن بەلگى» يەگەرلەرى. سەندەردى الدا تالاي وزگەرىستەر مەن جاڭاشىلدىقتار كۇتۋدە. ونىڭ ءبارى ارقاشان باتىل قادامدارعا, قاي سالادا بولماسىن جەتىستىكتەرگە جەتەلەيدى, – دەپ جاس تۇلەكتەرگە ۇلكەن سەنىم ارتا سويلەدى.
«التىن بەلگى» يەگەرلەرىنىڭ سانى بويىنشا №1 مەكتەپ-ليتسەي – العاشقى ورىندا. وندا 16 تۇلەك اتالعان ماراپاتقا يە بولدى. ودان كەيىنگى ورىنداردا №48 (13 تۇلەك), №69 (11 تۇلەك), №62 (11 تۇلەك), نۇر-وردا (11 تۇلەك), №61 (9 تۇلەك) مەكتەپتەر مەن دارىندى قىز بالالارعا ارنالعان ءبىلىم-يننوۆاتسيا ليتسەيى (9 تۇلەك) تۇر.
سونداي-اق التاي كولگىنوۆ مەكتەپ مۇعالىمدەرىنىڭ ەڭبەگىن دە ەلەۋسىز قالدىرمادى. ەلوردا اكىمى بۇگىندە قالاداعى 93 مىڭداي شاكىرت ءتۇرلى وليمپيادالار مەن زياتكەرلىك جارىستارىنا قاتىسىپ جۇرگەنىن, وتكەن وقۋ جىلىندا رەسپۋبليكالىق جانە حالىقارالىق دەڭگەيدەگى بايقاۋلاردا 107 التىن, 167 كۇمىس جانە 180 قولا – جالپى سانى 424 مەدالدى قانجىعاعا بايلاعانىن ەرەكشە اتاپ ءوتتى. سونداي-اق قالا باسشىسى بۇل كورسەتكىشتەر ەلورداداعى 17 مىڭ ۇستازدىڭ جەمىستى ەڭبەگى ەكەنىن دە ايتتى.
