قالا تىرشىلىگى

ەلوردا تويى – ەل تويى

ajnjjjjjjj

«جىل سايىن اسىعا كۇتەتىن استانا كۇنى مەرەكەسىنە ارنالعان شارالار باعدارلاماسى انىقتالدى. بيىل ايتۋلى مەرەكەگە وراي ۇيىمداستىرىلاتىن 70-تەن اسا قىزىقتى دا اسەرلى شارالارعا كەز كەلگەن قالا تۇرعىنى مەن قوناقتارى قاتىسا الادى» دەپ حابارلايدى استانا قالاسىنىڭ 16 جىلدىعىنا ارنالعان مەرەكەلىك شارالاردى دايىنداۋ جانە وتكىزۋ جونىندەگى ۇيىمداستىرۋ كوميتەتىنىڭ مەديا-شتابىنان.

استانانىڭ 16 جىلدىعى قارساڭىنداعى ءداستۇرلى مەرەكەلىك شارالار اراسىنان «استانا يگىلىگى ءۇشىن» دەگەن ورتاق اتپەن وتەتىن بىرەگەي اكتسيانى ەرەكشە اتاپ وتۋگە بولادى. ازاماتتاردى ءوزارا تۇسىنىستىككە ۇندەپ, ءتۇرلى قيىندىقتارمەن بىرگە كۇرەسۋگە, كومەككە مۇقتاج جاندارعا قول ۇشىن بەرۋگە جۇمىلدىراتىن بۇل اكتسيا – استانانىڭ ءار تۇرعىنى ءوزىن ۇلكەن وتباسىنىڭ ءبىر مۇشەسى رەتىندە سەزىنۋىنە اسەر ەتپەك. استانا تۇرعىندارىمەن بىرگە «قايسار كەرۋەن» قايىرىمدىلىق ۆەلوجارىسىندا قالا اكىمى يمانعالي تاسماعامبەتوۆ ەلوردا كوشەلەرىن ارالايدى.

ويىن-ساۋىق باعدارلاماسى وزىندىك قىزىققا تولى بولماق. اتاپ ايتقاندا, «مىڭجىلدىقتار توعىسىنداعى استانا» كوشپەلىلەر وركەنيەتى فەستيۆالى ادەتتەگىدەي دۋالدى قالا فورماسىندا ەمەس, جارمەڭكەگە ارنالعان شاتىرلى كەشەن رەتىندە ەرەكشەلەنبەك. مۇندا ات ۇستىندە اتويلاعان قويىلىمدار ادەتتەگىدەي مانەجدە وتپەيدى. بۇل جولى ات قۇلاعىندا ويناعان كاسكادەرلەرگە قۇم توگىلگەن ارنايى الاڭ جاساقتالادى.

«وزەن اۋەندەرى» كلاسسيكالىق مۋزىكا كەشتەرى جاڭا ادىپپەن بەزەندىرىلەدى. ساحنا ادەتتەگىدەي وزەن ۇستىندە قۇرىلادى, الايدا, ونىڭ سىرتقى كورىنىسى شىعىس سارايىن ەسكە تۇسىرەتىن بولادى. «استانا – ارقاۋ» تۇركى مۋزىكاسى فەستيۆالى بىرقاتار ەلدەردىڭ اسپاپشىلارى مەن انشىلەرىنىڭ باسىن قوسادى. فەستيۆالعا قازاقستان, ازەربايجان, تۇركىمەنستان, وزبەكستان, قىرعىزستان, قىتاي, موڭعوليا (حالحا وبل), التاي, ساحا, تىۆا, تاتارستان, باشقورتستان, حاكاسيا, شىڭجان-ۇيعىر اۆتونوميالىقاۋدانى, سونىمەن بىرگە داعىستان (نوعاي) ەلدەرىنىڭ مۋزىكانتتارى قاتىسادى.

«اسقاقتاي بەر, استانا!» اتتى قازاق جانە شەتەل ەسترادا جۇلدىزدارىنىڭ كونتسەرتى بيىل «سارىراقا» رەسپۋبليكالىق ۆەلوترەگىنىڭ ساحناسىندا وتەدى. وندا «The Jigits», «پيتستسا», «Blue» توپتارى, عالىمجان مولدانازاروۆ, قايرات نۇرتاس, پولينا گاگارينا جانە اتى ازىرگە قۇپيا الەم جۇلدىزى ونەر كورسەتەدى. «بيتۆا گورودوۆ» ءازىل-سىقاق فەستيۆالى قازاقستاننىڭ قاي قالاسى قالجىڭنىڭ كورىگىن قىزدىراتىنىن انىقتاماق. شاتتىق مەرەكەسىنە «ماسساعان» جوباسى, «KZلانديا», «ليتسا ستوليتسى»-سكەتچ شوۋى قاتىسسا, ولاردىڭ ونەرىن «Comedy Club» كلۋبىنىڭ تانىمال رەزيدەنتى سەمەن سلەپاكوۆ باعالايدى.

«استانا – ارماندار ورىندالادى» رەترو كونتسەرتى – ەلوردا تۇرعىندارى مەن قوناقتارىنا ارنالعان قايتالانباس ءان-شاشۋ بولماق. كوڭىلدە جاتتالعان اسەم اندەردى روزا رىمباەۆا, «دوس مۇقاسان», «جەتىگەن» توپتارى, رەسەيدىڭ حالىق ءارتىسى يۋري انتونوۆ ورىندايدى. ال 4-6 شىلدە كۇندەرى «ايالاعان استانا» ۇلتتىق مۋزىكالىق تەلەۆيزيالىق بالالار بايقاۋى مارەسىنە جەتەدى. ونەرپاز بۇلدىرشىندەردىڭ قابىلەتىن حالىق ءارتىسى روزا رىمباەۆا, باتىرحان شۇكەنوۆ, قاراقات ءابىلدينا مەن جانار ايجانوۆا باعالايتىن بولادى. رەسەي تاراپىنان سارالايتىن قازىلار مۇشەسى ازىرگە قۇپيا ۇستالادى.

«استانالىق» ورتالىق ساياباعىنىڭ اشىلۋى – استانا تاريحىنداعى ايتۋلى ءارى ماڭىزدى ۋاقيعا بولماق. بۇل – قالاداعى ەڭ كونە ساياباقتىڭ ءبىرى. ول قالا تاريحىنىڭ كۋاگەرى ىسپەتتى. الايدا, ەندى ول جاڭا زاماناۋي, تەحنولوگيالىق كوركەم كەيىپكە ەنەدى. ول جاس قالامەن بىرگە جاڭارادى.

«ماڭگىلىك ەل – ۇلت مۇراتى» اتتىپوەزيا كەشى «ماڭگىلىك ەل» رەسپۋبليكالىق ءمۇشايراسىن قورىتىندىلايدى. بايقاۋ ماقساتى – تاۋەلسىزدىك جالاۋىن جەلبىرەتىپ وزگە ەلدەرمەن يىق تىرەسە دامىپ كەلە جاتقان قازاق مەملەكەتى مەن ونىڭ جاس استاناسىن جىرعا قوسۋ, ۇرپاققا اسەم تۋىندىلار سىيلاۋ. «ماڭگىلىك ەل – قازاق ەلىنىڭ ۇلتتىق بولاشاعى» كىتاپ جانە پوەزيا مەرەكەسى اياسىندا كوركەمسوز وقۋدان «ءۇش بايتەرەك» بايقاۋى ۇيىمداستىرىلادى. وندا مۇزافار الىمباەۆ, قادىر مىرزا ءالي, تۇمانباي مولداعاليەۆ سىندى كورنەكتى اقىنداردىڭ شىعارمالارى ورىندالماق.

داريعا نازارباەۆانىڭ باستاماسىمەن ءارى قامقورلىعىمەن وتكىزىلەتىن «استانا كەشتەرى» III حالىقارالىق ونەر فەستيۆالى قازاقستان, رەسەي, ازەربايجان, يتاليانىڭ تانىمال ورىنداۋشىلارى قاتىساتىن ءۇش كونتسەرتتەن تۇرادى. مۋزىكانتتار مۇندا تەك جاندى داۋىسپەن ءان شىرقاماق.

«استانا شاتتىق» شىعارماشىلىق اۆتوكەرۋەنى – استانا قالاسى تۇرعىن ءۇي الاپتارىنداعى تۇرعىندارعا كوشپەلى كونتسەرت قويادى. ونىڭ باعدارلاماسى ونەردىڭ ءتۇرلى باعىتتارى مەن جانرلارىن قامتيدى. بيىل استانانىڭ شاعىن اۋداندارى مەن اۋلالارىن ديلناز احماديەۆا, «رينگو» توبى, الىشەر كارىموۆ, قايرات تۇنتەكوۆ ارالاپ, اننەن شاشۋ شاشپاق.

استانا كۇنى مەرەكەسىنە جىل سايىن قازاقستاننىڭ باسقا دا قالالارى مەن ءتۇرلى ەلدەردەن 100 مىڭنان اسا قوناق قاتىسادى. قالا كۇنىنە ارنالعان مەرەكەلىك شارالار بيلەتتەرىنىڭ ساتىلىمىنان تۇسكەن قارجى جىلداعىداي مۇگەدەك بالالاردىڭ ەمىنە جۇمسالادى.

تاعىدا

ۇقساس جاڭالىقتار

پىكىر ۇستەۋ

Back to top button