استانا اكىمى يمانعالي تاسماعامبەتوۆ قالا اكىمدىگىنىڭ كەڭەسىندە ەلوردا كۇنىن مەرەكەلەۋدىڭ قورىتىندىلارىنا باعا بەردى. «اركىمگە ءوز ۋچاسكەسىندە اتقارعان ەڭبەگى ءۇشىن العىس بىلدىرگىم كەلەدى. مەملەكەت باسشىسى وسى شارالاردىڭ وتكىزىلۋ دەڭگەيى جىل سايىن ارتىپ كەلە جاتقانىن اتاپ وتۋدە», – دەدى اكىم.
«ءبىز سىزدەرمەن بىرگە جوسپارلانعان بارلىق 78 ءىس-شارانى وتكىزدىك. جالپى العاندا اتالعان شارالاردى كورۋگە جارتى ميلليوننان استام ادام كەلگەن. مەرەكە كۇندەرى قالادا 20 ۇلكەن كونتسەرت بولىپ ءوتتى, ولارعا 70000-نان اسا بيلەت ساتىلدى. 300 000 ەلوردا تۇرعىندارى مەن قالا قوناقتارى اشىق الاڭدارعا كەلىپ, ارالاپ قايتتى. استانا كۇنىن ۇيىمداستىرۋ جانە وتكىزۋ, جۇمىستارىنا 10 000-عا تارتا ادام جۇمىلدىرىلدى», – دەپ حابارلادى ي.تاسماعامبەتوۆ.
اكىمنىڭ ايتۋىنشا, باق-تىڭ بەلسەندى اقپاراتتاندىرۋىنىڭ ارقاسىندا بۇكىل ەلدىڭ تۇرعىندارى مەرەكەلىك شارالاردى كورە الدى. ەلوردا كۇنىنە 1000-نان استام باق وكىلدەرى تىركەلگەن, سونىڭ ىشىندە 100-گە تارتا شەتەلدىك مەديااگەنتتىك بار. «بۇل – مەملەكەتتىك مەرەكە, ول تەك ءبىزدىڭ قالادا ەمەس, بۇكىل ەلدە تويلاندى. ەلوردا تۇرعىندارى مەن وسى مەرەكەنى تاماشالاۋ ءۇشىن ارنايى كەلگەن مەيماندار بارلىعىن ءوز كوزدەرىمەن كوردى. زاماناۋي اقپاراتتىق تەحنولوگيالاردىڭ ارقاسىندا ەلىمىزدىڭ كەز-كەلگەن تۇرعىنى ءبىز ۇيىمداستىرعان مەرەكەنى قاراي الدى»,– دەدى ول.
سونىمەن بىرگە, ي.تاسماعامبەتوۆ جينالىس بارىسىندا تۇرعىن ءۇي جانە الەۋمەتتىك سالا نىساندارىنىڭ قۇرىلىسى, جاڭا وقۋ جىلى مەن كۇزگى-قىسقى جىلۋ بەرۋ ماۋسىمىنا دايىندىققا بايلانىستى ينجەنەرلىك جانە كولىك ينفراقۇرىلىمىن دامىتۋ بويىنشا بىرقاتار تاپسىرمالار بەردى.
