ەلوردادا «Astana Learning Management System» جوباسى ىسكە قوسىلادى

سىناقتاعى «Smart مەكتەپ» جوباسى وزىق تەحنو­لوگيالاردىڭ مۇمكىندىگىن ورتا مەكتەپتەردە پايدالانۋعا جول اشتى. بيىلعى وقۋ جىلىنىڭ جاڭالىعى – وقۋشىلاردىڭ ۇلگەرىمىن ءموبيلدى قوسىمشا ارقىلى باقىلاۋعا مۇمكىندىك بەرەتىن «Astana Learning Management System» جوباسى.

تىڭ جوبا «Edupage» پورتالى ارقىلى جۇزەگە اسادى. ۆەب-سايت تۇرىندە جۇمىس ىستەيتىن اتالمىش جۇيە سمارتفوندار مەن پلانشەتتەرگە ارنالعان ءموبيلدى قوسىمشا ۇلگىسىندە دە قولجەتىمدى بولماق.
جاڭا جوبانىڭ ارقاسىندا ەندى اتا-انالار مۇعالىمدەرمەن تىكەلەي بايلانىس ورناتا الادى. كەز كەلگەن ۋاقىتتا ساباق كەستەسىن, وقۋشىنىڭ باعالارىن, ءۇي جۇمىسىن, ساباققا قاتىسۋ جۋرنالىن, ءتىپتى اسحانا مازىرىنە دەيىن قاراۋعا بولادى. سونداي-اق, اتا-انالار مەكتەپ جاڭالىقتارىنان حاباردار بولىپ, الداعى جينالىستار مەن شارالار جونىندە بىلە الادى جانە ساۋالنامالارعا قاتىسۋعا مۇمكىندىك بار.
ال مۇعالىمدەر ەلەكتروندى جۇيەنىڭ كومەگىمەن ساباق كەستەسىن اۆتوماتتى تۇردە جاساپ, باعالار مەن ءۇي جۇمىسىن جەدەل تىركەۋى ءتيىس.
ەلوردالىق ءاربىر مەكتەپتى لي­تسەنزيالىق باعدارلامامەن قام­تاماسىز ەتۋ 100 مىڭ تەڭگەنى قۇرايدى. ال اتا-انالار قوسىمشانى Play Market نەمەسە App Store ارقىلى تەگىن جۇكتەي الادى.
باعدارلاما ىسكە قوسىلعاندا, مەكتەپ اكىمشىلىگى ءار وقۋشىعا قۇپياسوز بەرەدى.
جۇيەنىڭ جۇمىسىنا ينتەرنەتتىڭ ەڭ تومەن جىلدامدىعى جەتكىلىكتى.