ەلوردادا ىڭگالاپ ەلۋ بوپە
«ءبىر ءتول تۋسا, ءبىر ءتۇپ جۋسان ارتىق وسەدى» دەگەن ۇلتتىڭ قانىنانبىز. سوندىقتان دا, دەموگرافيالىق احۋالىمىزدىڭ قانات جايۋىنا مەملەكەت تاراپىنان بارىنشا قولداۋ كورسەتىلىپ, ءتۇرلى جاردەمدەر قاراستىرىلۋدا. ءاربىر بالانىڭ بولاشاعىنا بايىپپەن قاراپ, ەرتەڭىنە الاڭدايمىز. ومىرگە كەلگەن ءبۇلدىرشىن – تاۋەلسىز قازاقتىڭ تۋىن ۇستاۋشى, تىزگىن يەسى, تۇتقاسى. ەسىمىزدە بولسا, عاسىرلار توعىسىندا, ياعني, ەكى مىڭىنشى جىل ەسىك قاققاندا ەلىمىزدىڭ بارلىق وڭىرىندە تۋعان انا مەن بالاعا قارجىلاي سىيلىق جاسالعان. ەندى تۇڭعىش پرەزيدەنت كۇنى ىڭگالاعان سابيگە دە, اناسىنا دا نازار اۋداردىق. بۇل ءسۇيىنشىلى جايت الدىن الا جۇرتشىلىققا قۇلاقتاندىرىلعان. سونىمەن…
مەرەكە كۇنى گازەت تىلشىلەرى ەلورداداعى ءۇش پەرزەنتحانانىڭ تابالدىرىعىن اتتادى. ەڭ الدىمەن, ەلباسى نۇرسۇلتان نازارباەۆتىڭ ءوزى بارىپ, سالتاناتتى جاعدايدا اشقان №3 قالالىق پەرزەنتحاناعا باس سۇقتىق. جيىرما جەتى شارانا جارىق دۇنيەگە كەلىپتى. باقىتتى انالار ۆالەنتينا زولوتارەۆا, ايگەرىم ۇسەنباەۆا, اقنيەت جۇماباەۆا… دەپ جالعاسا بەرەدى. ولار استانا قالاسى دەنساۋلىق ساقتاۋ باسقارماسى باستىعىنىڭ ورىنباسارى گۇلنار تولەگەنوۆانىڭ قولىنان «تۇڭعىش پرەزيدەنت كۇنى مەرەكەسى» دەگەن ءادىپتى جازۋى بار ءسابي كيىمدەرى مەن ەسكەرتكىش سىيلىقتار الدى. «ومىرگە كەلگەن ۇلىم ەكەۋمىز العان العاشقى سىيدىڭ ورنى – ايرىقشا. مەن مۇنى مىندەتتى تۇردە ساقتاپ قوياتىن بولامىن» دەپ قۋانىشىمەن ءبولىستى جاس انا ليليا فايزۋللينا. «قىزىمنىڭ وسىنداي ايتۋلى كۇنى تۋعانىنا ءوزىمدى باقىتتى سەزىنىپ تۇرمىن», – دەدى ۆالەنتينا زولوتارەۆا.
تۇڭعىش پرەزيدەنت كۇنى №2 قالالىق پەريناتالدى ورتالىقتا ون بەس نارەستە, №1 پەرزەنتحانادا سەگىز نارەستە جارىق دۇنيە ەسىگىن اشتى. دارىگەرلەر بۇل كۇنى تۋعان ۇل بالالاردىڭ ەسىمىنىڭ كوبىسى «نۇرسۇلتان» قويىلعانىن ايتادى. جاقسى ىرىم. تۇڭعىش رەت تويلانعان تۇڭعىش پرەزيدەنت كۇنى ومىرگە كەلگەن ەلورداداعى ەلۋ نارەستە تۋعان حالقىنا ءدال نۇرسۇلتانداي قىزمەت ەتسە, وندا ۇلت ەرتەڭىنىڭ جارقىن بولارى ءسوزسىز!
نۇرسۇلتانداردىڭ باۋى بەرىك بولسىن!
اسحات رايقۇل