ەلوردادا «نولدىك توزىمدىلىك» ۇستانىمىن قالىپتاستىرۋ ماقساتىندا اشىق سوت وتىرىسى ءوتتى

«قازاقستان تەمىر جولى» ۇلتتىق كومپانياسىنىڭ «استانا» ستانتسياسىندا قوعامدا ورىن الىپ وتىرعان زاڭ بۇزۋشىلىقتارعا «نولدىك توزىمدىلىك» ۇستانىمىن قالىپتاستىرۋ ماقساتىندا اشىق سوت وتىرىسى ءوتتى.

اتالمىش مەكەمە جۇمىسشىلارىنىڭ قاتىسۋىمەن وتكەن سوت وتىرىسىندا مامانداندىرىلعان اۋدانارالىق اكىمشىلىك سوتىنىڭ سۋدياسى ايگەرىم سادۋاقاسوۆا قر اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنا قاتىستى 20 اكىمشىلىك ءىس قارادى. سوت وتىرىسىنان كەيىن رەسمي ورگاننىڭ وكىلدەرى ستانسا جۇمىسشىلارىمەن اڭگىمەلەسىپ, ۇساق قۇقىق بۇزۋشىلىقتىڭ جاۋاپكەرشىلىگى تۋرالى ءتۇسىندىرىپ بەردى.

«تەمىر جول ۆوكزالى – ەلوردانىڭ قاقپاسى. ەلىمىزدىڭ باس شاھارىنا كەلگەن ءاربىر ادامنىڭ العاشقى اسەرلەرى وسى جەردەن باستالادى. ءتارتىپ بۇزۋشىلىققا جول بەرمەي, قالا تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋ بارىسىندا كوپشىلىك ورىندارىندا تەرىس قىلىقتار كورسەتىپ, ءتارتىپ بۇزعانداردى دا نازاردان تىس قالدىرمايمىز.

باستى ماقساتىمىز – قوعامدا نولدىك ءتوز­بەۋشىلىكتى قالىپتاستىرۋ. مۇنداي اشىق سوت وتىرىستارى تۇرعىنداردى ۇساق قۇقىق بۇزۋشىلىق جاساۋدان تەجەيدى جانە اينالاسىنداعى ازاماتتارعا دا باسقا كوزبەن قاراپ, ولقىلىق ورىن العان جەردە ءتارتىپتىڭ ساقتالۋىن تالاپ ەتەتىن بولادى», – دەيدى سارىارقا اۋدانى ءىىب جەرگىلىكتى پوليتسيا قىزمەتى №20 ۋچاسكەلىك پوليتسيا پۋنكتىنىڭ ۋچاسكەلىك ينسپەكتورى, پوليتسيا كاپيتانى ارنۇر ماحانوۆ.

ايگۇل ۋايسوۆا