«استانا اقشامى» گازەتى ەلوردا بازارلارى مەن دۇكەندەرىندەگى ازىق-تۇلىك باعاسىنا مونيتورينگ جاساۋدى جالعاستىرۋدا. سونداي-اق, ءبىز حالىق كوپ تۇتىناتىن ونىمدەردىڭ جىل باسىنان بەرى قانشا تەڭگەگە ارزانداعانىن يا قىمباتتاعانىن دا انىقتاۋعا تىرىستىق.
بايقاعانىمىز, قالانىڭ ءار تۇكپىرىندە ساتىلاتىن تاۋارلار باعاسىنداعى ايىرماشىلىق كادىمگىدەي ۇلكەن ەكەن. ماسەلەن, ءبىرىنشى سورتتى «تسەسنا» ۇنىنىڭ كەلىسى – «رامستور» سۋپەرماركەتىندە 184 تەڭگە. «اپرەل», «Small», «5 مينۋت», «استىقجان» دۇكەندەرىندەگى باعا دا وسى شامالاس, ياعني, 170-199 تەڭگە ارالىعىندا. مۇنى قىمباتسىنساڭىز, «انۆارعا» باس سۇقساڭىز بولادى. وندا «تسەسنا» ۇنىن 145 تەڭگەگە ساتىپ الا الاسىز. ال «شاپاعات» بازارىنا بارساڭىز, مۇلدە ارزانعا – نەبارى 97 تەڭگەگە تاباسىز.
وسىعان ۇقساس جاعداي كۇرىش ساۋداسىنا دا تيەسىلى. اتىشۋلى «اقمارجاننىڭ» كەلىسىن 403 تەڭگەگە «رامستوردان» نەمەسە 199 تەڭگەگە «5 مينۋت» دۇكەنىنەن الۋىڭىزعا بولادى. «سۇلتان» ماكارون ءونىمدەرىنىڭ باعاسى دا بىركەلكى ەمەس. ونىڭ كەلىسى «رامستوردا» – 292 تەڭگەگە, «انۆاردا» – 390 تەڭگەگە, «5 مينۋتتا» – 410 تەڭگەگە, «ستوليچنىي رىنوك» پەن «الەم» بازارلارىندا – 400 تەڭگەگە, «شاپاعاتتا» – 155 تەڭگەگە, «استىقجاندا» 80 تەڭگەگە باعالانىپ تۇر. كورىپ وتىرعاندارىڭىزداي, ايىرماشىلىق 5 ەسەدەن دە كوپ.
قانت باعاسى دا ازىرگە تۇراقتى. دالىرەك ايتساق, «رامستوردا» – 290 تەڭگە, «Small» دۇكەنىندە – 275 تەڭگە, «انۆاردا» – 280 تەڭگە, «5 مينۋتتا» – 284 تەڭگە, «استىقجاندا» – 299 تەڭگە, «شاپاعاتتا» – 280 تەڭگە.وكىنىشكە قاراي, كوكونىس ونىمدەرى تۋرالى دا وسىنداي قورىتىندى شىعارا المايمىز. ويتكەنى, قارا بازارداعىعا قاراعاندا دۇكەن سورەلەرىندە ساتىلاتىن كوكونىستىڭ باعاسى الدەقايدا جوعارى ەكەنى داۋسىز. مىسالى, ورامجاپىراقتىڭ كەلىسى «Small» دۇكەنىندە 165 تەڭگە بولسا, «شاپاعاتتا» – 65 تەڭگە. سول سىقىلدى پياز «رامستوردا» – 135 تەڭگە, «انۆاردا» – 97 تەڭگە, «شاپاعاتتا» – 75 تەڭگە. بىراق كارتوپتىڭ باعاسى ولاردىڭ جانىندا جاقسى ەكەن. ونى «انۆاردا» – 75 تەڭگەگە, «5 مينۋتتا» – 80 تەڭگەگە, «شاپاعاتتا» 65 تەڭگەگە ساتىپ الۋعا بولادى.
مونيتورينگ ناتيجەسىندە جىل باسىنان بەرى قاي ءونىمنىڭ باعاسى قانشالىقتى وزگەرگەنىن تەكسەرۋگە مۇمكىندىك تۋدى. تالداۋ قورىتىندىسىندا 8 ايدىڭ ىشىندە ۇنتاق جارماسى – 37,9 پايىزعا, سۇلى جارماسى – 45,3 پايىزعا, نان – 24,8 پايىزعا, پياز – 25 پايىزعا, ءسابىز – 35,7 پايىزعا, قانت – 38,6 پايىزعا, شاي – 38,3 پايىزعا قىمباتتاعانى, ال ورامجاپىراق 12,5 پايىزعا ارزانداعانى بەلگىلى بولدى.
بوتاگوز ماراتقىزى
