استانا قالاسى اكىمىنىڭ ورىنباسارى ا. لۋكيننىڭ توراعالىعىمەن قالا اۋماعىنداعى ۆەتەريناريالىق-سانيتاريالىق قاۋىپسىزدىكتى قامتاماسىز ەتۋ ماسەلەلەرى بويىنشا كەڭەس ءوتتى. كەزدەسۋگە ساۋدا وبەكتىلەرىنىڭ باسشىلارى, مال سويۋ پۋنكتەرىنىڭ, ۆەتەريناريالىق-سانيتاريالىق ساراپتاما زەرتحانالارىنىڭ ديرەكتورلارى قاتىستى.
كەڭەس بارىسىندا ەل اۋماعىندا قالىپتاسقان جالپى ەپيزووتولوگيالىق احۋال ءسوز بولدى.
ىشكى ساۋدا وبەكتىلەرىنە مال شارۋاشىلىعى ونىمدەرىن ساۋدا وبەكتىسىنەن تىس ساتپاۋ جانە ۆەتەريناريالىق ەرەجەلەردى قاتاڭ ساقتاۋ تاپسىرىلدى.
ايتا كەتەيىك, ەلورداداعى 14 بازاردىڭ ارقايسىسىندا مال شارۋاشىلىعى ونىمدەرىنە ساراپتاما جۇرگىزەتىن ۆەتەريناريالىق زەرتحانا جۇمىس ىستەيدى.
سونداي-اق, ساۋدا ورىندارىندا, مامانداندىرىلعان ورىنداردا (ەت دۇكەنى, سۋپەرماركەتتەردەگى ەت بولىمدەرى, مينيماركەتتەرى, قوعامدىق تاماقتاندىرۋ ورىندارى) ۆەتەريناريالىق-سانيتاريالىق تالاپتاردى ساقتاۋ بويىنشا مونيتورينگ جۇرگىزىلمەك. سونىمەن قاتار, جەرگىلىكتى پوليتسيا قىزمەتكەرلەرى بەكەتتەردە باقىلاۋدى كۇشەيتەدى جانە قاجەت بولعان جاعدايدا, ۆەتەريناريالىق باقىلاۋ قىزمەتكەرلەرىمەن بىرلەسىپ ءتارتىپ بۇزۋشىلارعا قاتىستى قاتاڭ شارالار قولداناتىن بولادى.
بۇل جاعداي مەملەكەتتىك ورگانداردىڭ جۇيەلى باقىلاۋىنا الىندى.
astana.gov.kz
