ەلوردالىق دارىگەرلەردىڭ دارەجەسى ەرەكشە
ءار ماۋسىمنىڭ ءۇشىنشى جەكسەنبىسىندە ەلىمىز مەديتسينا قىزمەتكەرلەرىنىڭ كاسىبي مەرەكەسىن اتاپ وتەدى. وسى اتاۋلى كۇنگە وراي كەشە استانا قالاسى اكىمىنىڭ ورىنباسارى ەرمەك امانشاەۆتىڭ توراعالىعىمەن سالتاناتتى جيىن ءوتتى. وعان دەنساۋلىق ساقتاۋ جانە الەۋمەتتىك دامۋ ءمينيسترىنىڭ ءبىرىنشى ورىنباسارى ساليدات قايىربەكوۆا, ءماجىلىس دەپۋتاتى نادەجدا پەتۋحوۆا قاتىستى.
جيىندى اشقان ەرمەك ءامىرحانۇلى بارلىق مەديتسينا قىزمەتكەرىن ءتول مەرەكەسىمەن قۇتتىقتاپ, ەڭبەكتەرىنە جەمىس تىلەدى. اكىم ورىنباسارىنىڭ ايتۋىنشا, ەلوردالىق دەنساۋلىق ساقتاۋ جۇيەسىنە جۇكتەلىپ وتىرعان جاۋاپكەرشىلىك ۇلكەن. باس قالانىڭ مەديتسيناسى قاي جاعىنان دا الدا بولۋى كەرەك. ەلباسىنىڭ ءوزى بۇل سالاعا ەرەكشە كوڭىل ءبولىپ وتىر. سوندىقتان, مەديتسينا قىزمەتكەرلەرى استانالىق دەڭگەيگە ساي ەڭبەك ەتىپ, وزگە وڭىرلەرگە ۇلگى بولۋى قاجەت.
ءوز سوزىندە اكىم ورىنباسارى استاناعا ۇنەمى ىقىلاس تانىتىپ, قانداي جۇمىستارىنا دا قولداۋ ءبىلدىرىپ جۇرەتىن دەنساۋلىق ساقتاۋ جانە الەۋمەتتىك دامۋ مينيسترلىگىنە العىسىن ايتا وتىرىپ, الداعى ۋاقىتتا دا قالا اكىمدىگى مەن مينيسترلىكتىڭ اراسىنداعى ارىپتەستىك ارتا تۇسەتىنىنە سەنىم ءبىلدىردى.
بۇدان كەيىن ءسوز پارلامەنت ءماجىلىسىنىڭ دەپۋتاتى ن.پەتۋحوۆاعا بەرىلدى. ول باس شاھاردا تۇرعىنداردىڭ دەنساۋلىعىن نىعايتۋ ءۇشىن قىرۋار شارۋالار اتقارىلىپ جاتقانىنا توقتالىپ, استانانى «ەل مەديتسيناسىنىڭ اۆانگاردى» دەپ اتادى. «وسىدان جيىرما جىلداي بۇرىن قالا مەديتسيناسى قانداي ەدى؟ مىسالى, مەن قالالىق ءماسليحاتتىڭ دەپۋتاتى بولعان 1999 جىلى دەنساۋلىق ساقتاۋ سالاسىنىڭ بيۋدجەتى نەبارى 101 ملن تەڭگە بولعان ەدى. ال قازىر ونىڭ كولەمى 40 ملرد تەڭگەگە جەتتى. بۇل – ەلوردانىڭ كادرلىق الەۋەتى, ماتەريالدىق-تەحنيكالىق بازاسى, باسقا دا الەۋمەتتىك-ەكونوميكالىق احۋالى ەسەلەپ ارتتى دەگەن ءسوز. ءبىر عانا مىسال, ەلوردا تۇرعىندارىنىڭ ءومىر ءسۇرۋ ۇزاقتىعى وزگە وڭىرلەردەن كوش ىلگەرى. مۇنىڭ ءوزى مەديتسينامىزدىڭ قارقىندى دامۋىنىڭ كورسەتكىشى» دەدى ول.
دەنساۋلىق ساقتاۋ جانە الەۋمەتتىك دامۋ ءمينيسترىنىڭ ءبىرىنشى ورىنباسارى س.قايىربەكوۆا ادامنىڭ دەنساۋلىعى مەن ءومىرى ءۇشىن كۇرەسكەن دارىگەرلەردىڭ تىنىمسىز ەڭبەگىن دايەكتى دەرەكتەرمەن ايشىقتادى. ەلىمىزدىڭ دارىگەرلەرى ادامنىڭ جانى ءۇشىن اق تەر, كوك تەر بولىپ, تاۋلىگىنە ەكى مىڭ وپەراتسيا جاسايدى. قازاقستاندىق جەدەل جاردەم ستانسالارى كۇندىز-ءتۇنى ءبىر تىنباي, كۇنىگە 18 مىڭ شاقىرۋعا قىزمەت كورسەتەدى. ال پەرزەنتحاناداعى اق حالاتتىلار تاۋلىگىنە ورتا ەسەپپەن 1 مىڭ ايەلدى بوساندىرىپ الادى. ساليدات زەكەنقىزىنىڭ ايتۋىنشا, بۇل كورسەتكىشتەردىڭ ءوزى – دەنساۋلىق ساقتاۋ جۇيەسىنىڭ ۇلكەن ءبىر يندۋستريا ەكەنىن دالەلدەيدى. «استانانىڭ
مەديتسيناسىنا قويىلىپ وتىرعان تالاپ جوعارى. جاقسى دارىگەرلەر دە, مىقتى ماتەريالدىق-تەحنيكالىق بازا دا, جاڭا تەحنولوگيا دا, ۇزدىك يننوۆاتسيالىق تاسىلدەر دە ەلوردادا بولۋى كەرەك. كەلەشەكتە باس قالا قازاقستاننىڭ تۇكپىر-تۇكپىرىنەن عانا ەمەس, شەتەلدەن دە ىزدەپ كەلىپ ەمدەلەتىن وزىق مەديتسينالىق الاڭعا اينالۋى ءتيىس. وسىنداي دەڭگەيگە جەتكىزۋگە مەديتسينا قىزمەتكەرلەرى سىزدەر ۇلەس قوسۋعا تيىسسىزدەر» دەدى ءمينيستردىڭ ءبىرىنشى ورىنباسارى.
جيىندا قالالىق ءماسليحات حاتشىسى سانسىزباي ەسىلوۆ, ەلوردالىق دەنساۋلىق ساقتاۋ باسقارماسىنا جاڭادان باسشى بولىپ كەلگەن ەرىك ءبايجۇنىسوۆ, ۇلتتىق عىلىمي-مەديتسينالىق ورتالىقتىڭ باس ديرەكتورى, ءماسليحات دەپۋتاتى اباي بايگەنجين ءسوز سويلەپ, مەديتسينا قىزمەتكەرلەرىنە جىلى لەبىزىن ءبىلدىردى.
بۇدان كەيىن ۇزدىك مەديتسينا قىزمەتكەرلەرىنىڭ ەڭبەكتەرى ەلەنىپ, مينيسترلىك پەن قالا اكىمدىگى تاراپىنان قۇرمەتتى ماراپاتتارعا يە بولدى. ەلوردانىڭ جەتى دارىگەرى «دەنساۋلىق ساقتاۋدى دامىتۋعا قوسقان ۇلەسى
ءۇشىن» توسبەلگىسىمەن ماراپاتتالدى. ال, التاۋى «دەنساۋلىق ساقتاۋ ءىسىنىڭ ۇزدىگى» اتاندى. ون ءۇش اق حالاتتى دەنساۋلىق ساقتاۋ جانە الەۋمەتتىك دامۋ ءمينيسترى مەن استانا قالاسى اكىمىنىڭ قۇرمەت گراموتاسى مەن العىس حاتىنا يە بولدى.
مەديتسينا قىزمەتكەرلەرىن كاسىپوداق ۇيىمدارى دا نازاردان تىس قالدىرعان جوق. قر دەنساۋلىق ساقتاۋ قىزمەتكەرلەرى كاسىپوداعىنىڭ استانا قالالىق فيليالىنىڭ ءتوراعاسى باقىتجان ءتاجىباي اق حالاتتىلاردى ىنتالاندىرۋ ءۇشىن جىل سايىن ولاردىڭ ىشىنەن ۇزدىكتەردى انىقتاپ, ماتەريالدىق جاعىنان قولداپ وتىراتىنىن جەتكىزدى. بۇل بايقاۋ بيىل ءتورت اتالىم بويىنشا ءوتىپتى. قاتىسۋشىلاردىڭ ىشىنەن №2 قالالىق بالالار اۋرۋحاناسىنىڭ حيرۋرگ-دارىگەرى اعابەك چيكيناەۆ ءارتىپتەستەرىنەن وزىپ شىعىپ, ەڭ ۇزدىك ءدارىگەر اتاندى. ال №1 قالالىق اۋرۋحانانىڭ مەيىربيكەسى باعلان الكەنوۆا «ۇزدىك مەيىربيكە» نوميناتسياسىندا ءبىرىنشى ورىندى جەڭىپ الدى. ۇزدىك فەلدشەر اتاعىن رەسپۋبليكالىق سانيتاريالىق اۆياتسيانىڭ ءموبيلدى بريگاداسىنىڭ فەلدشەرى بولات ءشارىپوۆ ەنشىلەسە, №4 قالالىق ەمحانانىڭ باس دارىگەرى سەرىك شايمەردەنوۆ ۇزدىك مەنەدجەر دەنساۋلىق ساقتاۋدى ۇيىمداستىرۋشىسى رەتىندە تانىلدى.
قىمبات توقتامۇرات