مادەنيەت

ەلوردالىقتارعا – «جۇلدىزدى» پاندۋس

ERA_6539

ەلوردالىقتارعا – «جۇلدىزدى» پاندۋس

«مۋز –تۆ.گراۆيتاتسيا» پرەمياسىن تابىستاۋ قارساڭىندا «ا-Cتۋديو» توبى مەن «dara» قورى بىرلەسىپ, «اراي» ساياباعىندا مۇمكىندىگى شەكتەۋلى جانداردىڭ ءجۇرىپ-تۇرۋىنا ىڭعايلى پاندۋستىڭ تۇساۋىن كەستى. شارا بارىسىندا «ا-ستۋديو» توبى ەلوردالىقتارعا «كەدەرگىسىز ورتا ءۇشىن» دەپ تاڭبالانعان ەسكەرتكىش تاقتانى تارتۋ ەتتى. جيىنعا مۋز-تۆ تەلەارناسىنىڭ باس ديرەكتورى ارمان داۋلەتياروۆ قاتىسىپ, جۇرتشىلىققا جىلى لەبىزىن ءبىلدىردى.

ايتۋلى شارا اياسىنداعى قايىرىمدىلىق باسقوسۋلارعا ۇيىتقى بولىپ وتىرعان قازاق ازاماتى ارمان داۋلەتياروۆتىڭ ايتۋىنشا, مۇمكىندىگى شەكتەۋلى جاندارعا قولداۋ كورسەتۋ, ولاردىڭ قوعامعا بەيىمدەلىپ كەتۋىنە جاعداي جاساۋ – ءار ادامنىڭ ازاماتتىق بورىشى. مۇگەدەك جاندار ەشقاشان ورتادان تىسقارى ءومىر سۇرمەۋى كەرەك. ولار دا باسقالار سياقتى, تالانتى مەن تالابىن ۇشتاپ, وي-ارمانىن جۇزەگە اسىرۋعا قۇقىلى. بۇگىنگى شارا ماقساتى الەۋمەتتىك قولداۋعا مۇقتاج بالالاردىڭ جاعدايىنا قوعامنىڭ نازارىن اۋدارۋ. ولاردىڭ ەركىن ءجۇرىپ-تۇرۋىنا پاندۋستاردىڭ كومەگى كوپ ەكەندىگىن اتاپ وتكەن ارمان داۋلەتياروۆ «اراي» ساياباعىندا اشىلىپ وتىرعان ەسترادا جۇلدىزدارىنىڭ ەستەلىك الاڭقايى ەلوردالىقتاردىڭ تىنىعۋعا كەلەتىن جايلى ورنىنا اينالاتىنىنا سەنىم ءبىلدىردى.
ون جىل بويى قايىرىم­دىلىقپەن اينالىسىپ كەلە جاتقان «Dara» قايىرىمدىلىق قورى سوڭعى ەكى جىل ىشىندە ەلىمىزدىڭ ءارتۇرلى اۋماقتارىندا ورنالاسقان 6 تۇزەتۋ ورتالىعىندا جوندەۋ جۇمىستارىن جۇرگىزىپتى. بۇل ورتالىقتاردىڭ ءبارى پاندۋستارمەن قامتاماسىز ەتىلىپ, ارباعا تاڭىلعان بالالاردىڭ قوزعالىسىنا قولايلى جاعداي جاساعان.
سالتاناتتى شاراعا ەسىل اۋدانىنىڭ اكىمى ءسابيلا مۇستافينا, «Dara» قايىرىمدىلىق قورىنىڭ قۇرىلتايشىسى گۇلنار دوساەۆا, «ا-ستۋديو» توبىنىڭ ءانشىسى بايعالي سەركەباەۆ قاتىسىپ, ءسوز سويلەدى.
تۇساۋكەسەر راسىمىندە №2 استانا قالاسىنداعى مۋزىكالىق مەكتەبىنىڭ «بايتەرەك» اسپاپتار ءانسامبلى, حالىقارالىق سپورتتىق بالدىڭ جۇلدەگەرلەرى ونەرىمەن شاشۋ شاشتى.
ايتپاقشى, بۇل كۇنى ارباعا تاڭىلعان ءبيشى قىزدار مىڭ بۇرالا بيلەدى. ولارعا تاڭدانا قاراپ قالعان كىشكەنتاي قىزدى سوزگە تارتتىق. ءوزىن ءمولدىر دەپ تانىستىردى. ول ارباعا تاڭىلعان بالالاردىڭ بي بيلەگەنىن العاش رەت كورىپ, ەرەكشە تاڭدانىپ وتىرعانىن جاسىرمادى. «ءبيدى قاتتى جاقسى كورەمىن. بىراق بي بيلەۋ مەنىڭ جاعدايىمدا مۇمكىن ەمەس دەپ ويلايتىن ەدىم. ال قازىر ءوزىم سياقتى اربادا وتىرعان قىزداردىڭ بيلەگەنىن كورگەننەن كەيىن دە بيلەگىم كەلىپ كەتتى. ۇيگە بارا سالىسىمەن قولعا الامىن» دەدى ول قۋانىشتان ءجۇزى بال-بۇل جانىپ.
وسىعان قاراعاندا قايىرىمدىلىق قورلارىنا ۇيىتقى بولىپ جۇرگەن قازاق ازاماتىنىڭ «مۇگەدەكتەردىڭ دە تالانتىن ۇشتاۋعا بولادى» دەگەن وي-تىلەگى ورىندالعان دا سياقتى…

قىمبات نۇرعالي

ديانا دارىندىلاردى فەستيۆالعا شاقىردى

رەسەيلىك ءانشى ديانا گۋرتسكايا قالامىزداعى №71 مەكتەپ-ليتسەيىندە زاعيپ بالالارعا ارنالعان قايىرىمدىلىق كەشىنە قاتىستى.

باسقوسۋ بارىسىندا ءانشى مۇنداعى بالالارعا رياسىز سۇيىسپەنشىلىگىن جەتكىزدى. الدىمەن ىقىلاس قويىپ, ولاردىڭ ونەرىن تاماشالادى. ءبىرى پيانينودا ويناسا, ەكىنشىسى الەمگە تانىمال ەسترادا جۇلدىزدارىنىڭ اندەرىن ورىنداپ, وزدەرىمەن تاعدىرلاس قوناقتى قۋانىشقا بولەدى. بالعىنداردىڭ ونەرىنە ءتانتى بولعان ديانا دا سولارعا قوسىلىپ, ءان سالدى.
ءانشىنىڭ وزىمەن بىرگە ءان سالىپ تۇرعانىنا سەنبەگەن ءبىر بوزبالانىڭ وقىس قويعان سۇراعى زالدا وتىرعان ۇستازدار مەن قالىڭ كوپشىلىكتىڭ كوڭىلىن بوساتتى. «ديانا, بۇل ءسىز بە؟» دەپ قايتا-قايتا ءانشىنىڭ قولىنان ۇستاي بەرگەن ەدى الگى بالا… ءانشى ديانا دا وزىنە ابدەن تانىس سەزىمدەردى باستان كەشىپ جاتقان بالاعا بار ماحابباتىن, جان جىلۋىن جەتكىزۋ ءۇشىن مەيىرلەنىپ, قۇشاعىنا تارتا ءتۇستى.
وسى كەزدەسۋ كەزىندە بالالار دياناعا ءوز كوكەيلەرىندەگى سۇراقتارىن قويۋعا ەركىن اڭگىمەگە جول اشىلعان تۇستا: «ءسىزدىڭ كوزىڭىز نەگە تۋعاننان كورمەيدى؟» دەپ سۇرادى ءبىر بالا. ءانشى بۇل سۇراققا: «بۇل – تاعدىر, وعان مويىنسۇنۋ كەرەك» دەپ جاۋاپ بەردى.
سودان سوڭ: «مەن بۇل بالالاردىڭ جاعدايىن جاقسى تۇسىنەمىن. كەزىندە مەنى دە اتا-انام تبيليسيدەگى زاعيپ بالالارعا ارنالعان ارنايى مەكتەپ-ينتەرناتتا وقىتتى. وتە ارىق, كىپ-كىشكەنتاي قىز بولاتىنمىن. ەشقاشان وزگەلەرگە كوز جاسىمدى كورسەتكەن ەمەسپىن. العاش ينتەرناتقا اپارعان كەزدە اتا-انام «ديانا, جىلاپ تۇرسىڭ با؟» دەپ سۇراعان ەدى. مەن سەنىمدى تۇردە «جوق» دەپ جاۋاپ قاتتىم. شىن مانىندە جاندۇنيەم بوساپ, ۇيگە قايتقىم كەلىپ تۇرعان ەدى. ءومىر ماعان كوپ نارسە ۇيرەتتى. جارىق دۇنيەنى ءبىر كورۋ باقىتى بۇيىرماسا دا, ءومىر ماعان جاناشىر جانداردىڭ قامقورىن سەزىنۋ باقىتىنا بولەدى. بۇگىن, مىنە, وزدەرىڭىز سياقتى تاعى دا ءبىر جاناشىر جاندارمەن كەزدەسىپ تۇرمىن. مەن باقىتتىمىن» دەدى ءارى قاراي ديانا.
بۇدان سوڭ بالالاردىڭ ءبىرى انشىدەن قاي كەزدەن ءان ايتا باستاعانىن سۇراعان. «ول ەسىمدە جوق. ايتەۋىر, بالا كۇنىمنەن مۋزىكانى جاقسى كورەتىنمىن. ال ساحناعا العاش رەت 10 جاسىمدا شىقتىم. تبيليسي فيلارمونياسىنىڭ ءسوليسى يرما سوحادزەمەن دۋەت ورىندادىم» دەپ جاۋاپ بەردى.
بۇل كەشتە ديانا گۋرتسكايانىڭ الدىندا ءان سالعان بالالاردىڭ اراسىندا داۋى-سىنان ۇلكەن ونەردىڭ قۇدىرەتى سەزىلگەن دارىندى قازاق بالالارى دا بولعان. جاس تالانتتاردىڭ اياق الىسىنا ءتانتى بولعان رەسەيلىك ءانشى ولاردى ءوزىنىڭ بەس جىلدان بەرى وتكىزىپ كەلە جاتقان «بەلايا تروست» فەستيۆالىنە شاقىردى. بۇل حالىقارالىق بايقاۋ ءانشىنىڭ مۇگەدەك بالالاردى قولداۋ ماقساتىندا قولعا العان جوبالاردىڭ ءبىرى بولاتىن.
سونىمەن قاتار, بالالارعا «مۋز-تۆ 2015. گراۆيتاتسيا» سىيلىعىن تابىستاۋ سالتاناتىندا انشىمەن بىرگە قىزىل كىلەمدە ءجۇرىپ ءوتۋ مۇمكىندىگى بەرىلەتىنى ايتىلدى.

جۇلدىز جاقىپوۆا,
ەۋرازيا ۇلتتىق ۋنيۆەرسيتەتىنىڭ 1-كۋرس ستۋدەنتى

سەداكوۆا – ساۋىقتىرۋ ساباعىندا

ەلورداداعى №1 تۇزەتۋ كابينەتىندەگى «ناتيجەلى وڭالتۋ»  ساباعىنا اتاقتى اننا سەداكوۆا كەلدى.

شارا ماقساتى – مۇمكىندىگى شەكتەۋلى, اتا-اناسىنىڭ قامقورلىعىنان ايىرىلعان بالالارعا ونەر جۇلدىزدارىمەن جۇزدەسۋگە مۇمكىندىك بەرۋ, سونىمەن قاتار, قوعام نازارىن الەۋمەتتىك قولداۋعا مۇقتاج جاندار ماسەلەسىنە اۋدارۋ. ەمدىك دەنە تاربيەسى ساباعىنا №1 تۇزەتۋ كابينەتىنە بارىپ جۇرگەن بالدىرعاندارمەن مارجان اراپباەۆا, اننا سەداكوۆا سىندى ايگىلى انشىلەر قاتىستى. نۇسقاۋشى دۇرىس كەلبەتتى ساقتايتىن, بۇلشىق ەتتەردى نىعايتاتىن جەڭىل جاتتىعۋلار كەشەنىن كورسەتتى. سونىمەن قاتار انشىلەر وسىدان بىرنەشە جىل بۇرىن «Dara» قورىنىڭ دەمەۋىمەن اشىلعان تۇزەتۋ كابينەتىنىڭ جۇمىسىمەن تانىستى. بۇل جەردە ماماندار ەستۋ جانە سويلەۋ قابىلەتىندە كەمشىلىگى بار بالالارمەن جۇمىس جاساپ, ولاردى مەكتەپكە بارۋعا دايىندايدى.
بەس جاستاعى پولينا اندرياششەنكونىڭ اناسى يۋليا: «تۇزەتۋ كابينەتىندەگى جاتتىعۋلاردىڭ, سونىڭ ىشىندە ەمدىك جانە دەنە تاربيەسىنىڭ ارقاسىندا مەنىڭ قىزىم كوپ وزگەرىسكە قول جەتكىزدى, cويلەۋ قابىلەتى جاقسارىپ, قوزعالىس يكەمى دامىدى. پولينانىڭ وزىنە دەگەن سەنىمى ارتىپ, العاشقى دوس-تارى پايدا بولدى. دامۋىندا كەدەرگى بار بالالارعا ارنالعان ورتالىقتار سانى كوپ بولۋى ءتيىس» دەدى.
مارجان مەن اننا بوبەكتەرگە زور دەنساۋلىق تىلەپ, وقۋلارىنا تابىستى بولسىن ايتتى. بالالار ەسترادا جۇلدىزدارىنا قولونەر بۇيىمدارىن سىيلادى.

جانبوتا دارمەنقۇل

ارمان العا جەتەلەيدى

رەسەي ەسترادا جۇلدىزدارى ساتي كازانوۆا مەن ارسەنيۋم سال اۋرۋىنا شالدىققان جانە جۇيكەسى زاقىمدانعان بالدىرعاندارعا ارنالعان №64 «اسىل بوبەك» بالاباقشاسىندا بولدى.

وسىدان ءۇش جىل بۇرىن اشىلعان اۋىر كەسەلى بار سابيلەردى وڭالتۋ جانە ولاردىڭ وي-ءورىسىن دامىتۋعا ارنالعان مەكەمەدە 180-گە جۋىق بالا تاربيەلەنىپ جاتىر ەكەن. مۇندا بوبەكتەر جان-جاقتى دايىندىقتان وتكەن سوڭ ورتا ءبىلىم بەرەتىن مەكتەپتە وقۋعا مۇمكىندىك الادى. مۇندا تاربيەلەنۋشىلەرگە پسيحولوگيالىق-پەداگوگيكالىق كومەك كورسەتۋ ءۇشىن بارلىق جاعداي جاسالىپتى. قوناقتار بالالاردىڭ سالعان سۋرەتتەرىن, قولدارىمەن جاساعان ءتۇرلى بۇيىمدارىنىڭ كورمەسىن تاماشالادى. مارتەبەلى مەيماندار سابيلەرگە جىلى ىقىلاستارىن ءبىلدىرىپ, ەستەلىككە سۋرەتكە ءتۇستى. بالاباقشانىڭ ونەرپازدارى دا قاراپ قالمادى. اياۋلىم الپىسباەۆا ءان سالىپ, بيشىلەر توبى مىڭ بۇرالدى, ال ساشا گروحولسكايا شىعىس ءبيىن ورىنداپ, ساتي سياقتى ءانشى بولعىسى كەلەتىنىن ايتتى.
مۋز-تۆ پرەمياسى مەن «Dara» قورىنىڭ بىرلەسكەن الەۋمەتتىك اكتسياسىنىڭ اياسىندا وتكەن شارانىڭ ماقساتى قولداۋعا مۇقتاج ناۋقاس سابيلەر ماسەلەسىنە قوعام نازارىن اۋدارۋ بولىپ تابىلادى.

ايگۇل ۋايسوۆا

«ءبىز ينكليۋزيۆتى قوعام ءۇشىن»

وقۋشىلار سارايىندا اقپاراتتىق تەحنولوگيا پانىنەن وتكەن اشىق ساباقتا №65 مەكتەپتىڭ تۇزەتۋ جانە ينكليۋزيۆتى سىنىپتارىندا ءبىلىم الاتىن, تىرەك-قوزعالىس اپپاراتتارىندا اقاۋى بار جانە تسەرەبرالدى سال اۋرۋىنا شالدىققان بالالار رەسەيلىك «گرادۋسى» توبىنىڭ مۇشەلەرىمەن جۇزدەستى.

قىسقا شەبەرلىك ساباق شەڭبەرىندە وقۋشىلار باعدارلامالاۋشىلار كىم ەكەنىن, باعدارلامالاۋدى ۇيرەنۋ نەدەن باستالاتىنىن جانە وسى سالادا قالاي جەتىلۋگە بولاتىنىن ۇيرەنىپ-ءبىلدى. اشىق ساباقتىڭ ماقساتى بالالاردىڭ وسى ماماندىققا قىزىعۋشىلىعىن تۋدىرىپ, بولاشاعى بار ماماندىققا قول جەتكىزە الاتىنىن كورسەتۋ بولدى.
شارا بارىسىندا «شاگ» اكادەمياسىنىڭ ماماندارى جەتكىنشەكتەردى باعدارلامالاۋ جانە روبوت قۇراستىرۋمەن تانىستىردى. قاتىسۋشىلار وسى جۇمىستارمەن تانىسىپ قانا قويماي, روبوت قۇراستىرۋعا دا اتسالىستى. قۇراستىرۋدان سوڭ بالاقايلار روبوتتاردى وزدەرى باسقارىپ, جارىس وتكىزدى. جەڭىمپازدار رەسەيلىك «گرادۋسى» توبىنىڭ مۇشەلەرىمەن جارىستى. جۇلدىزدارمەن جۇزدەسۋ بالاقايلارعا توسىن سىي بولىپ, وراسان زور اسەر قالدىردى.
شارا سوڭىندا جەڭىمپازدار مەن بارلىق قاتىسۋشىلار گراموتالارمەن ماراپاتتالىپ, سىيلىقتارعا يە بولدى. سونداي-اق, سۇيىكتى ورىنداۋشىلارىمەن ەستەلىككە سۋرەتكە ءتۇستى.

شىراق بايكەنوۆا,
ل.گۋميلەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىنىڭ ءىى كۋرس ستۋدەنتى

ومىرگە قۇشتارلىق ورنەكتەرى

«حانشاتىر» ساۋدا ويىن-ساۋىق ورتالىعىندا رەسەي مەن قازاقستان ەسترادا جۇلدىزدارى قامكوڭىل بالالارعا قۋانىش سىيلادى. 

شارادا ەسىمى ەلگە بەلگىلى جۇلدىزدار ءان شىرقاپ, بي بيلەپ ويىن-ساۋىق ورتالىعىنىڭ ءسانىن كىرگىزدى. ارباعا تاڭىلسا دا, زاعيپ عۇمىر كەشسە دە ومىرگە دەگەن قۇشتارلىعى سۋىماي, جىگەر مەن قايراتىن كورسەتكەن جانداردىڭ ونەرىن تاماشالاعان جۇرت قول شاپالاقتاپ, ىنتا-پەيىلىن ءبىلدىرىپ جاتتى. «DARA» قايىرىمدىلىق قورىنىڭ جوبا ۇيلەستىرۋشىسى اينۇر ايمۋزينا: «بالالاردىڭ قانداي دا ءبىر كەمىستىگى بولسا دا, ولار تۋمىسىنان دارىندى, تالانتتى. ولاردىڭ دەنى ساۋ ءاربىر ادامنان ەشقانداي كەمدىگى, السىزدىگى جوق ەكەنىن وسىنداي جوبالار كورسەتەدى» دەدى. جوبا ۇيلەستىرۋشىنىڭ ايتقانى ايداي اقيقات ەكەنىن شاراعا كەلگەن كوپشىلىك ءوز كوزدەرىمەن كوردى.

«مەنىڭ قولىمنان كەلەدى!»

جىلدىڭ ايتۋلى شاراسىنىڭ رەسەيلىك مەيماندارى «ۆرەميا ي ستەكلو» توبى, بيانكا جانە جەرگىلىكتى «تەكيلا» توبىنىڭ  مۇشەلەرى قالاداعى ارنايى تۇزەتۋ مەكتەپ-ينتەرناتىندا بولىپ, «ارتسپورتفەست-2015» اتتى ونەر مەن  سپورت فەستيۆالىنە قاتىستى.

«مەنىڭ قولىمنان كەلەدى!» دەگەن ۇرانمەن وتكەن بالالار مەرەكەسىندە سابيلەر ءتۇرلى سايىستارعا ءتۇسىپ, ەپتىلىگى مەن ونەرىن ورتاعا سالدى. ال «بامبينو» بالمۇزداق ساتۋ جەلىسى ءتاتتى ءدامىن تەگىن تاراتتى.
مەكتەپ-ينتەرناتتا دامۋىندا ازداعان تەجەۋى بار, اۋتيزم, سال اۋرۋىنا شالدىققان جەتكىنشەكتەر ءبىلىم الۋدا. مۇندا ولاردىڭ شىعارماشىلىق قابىلەتتەرىن دامىتا وتىرىپ, قوعامعا بەيىمدەلۋىنە, ومىردەن ءوز ورنىن الۋىنا كۇش سالادى. مەكەمە ديرەكتورى باقىت ءامرينا ايتقانداي, «مۇمكىندىگى شەكتەۋلى بالالاردىڭ تالانتتارىن اشۋعا ارنالعان مۇنداي شارالاردىڭ ۇيىمداستىرىلۋى ولاردىڭ وزدەرىنە سەنىمى ارتىپ, ءوز كۇشىنە سەنۋگە مۇمكىندىك بەرەدى. تەك بالانىڭ ءتىلىن تاۋىپ, ونىڭ ەرىك-جىگەرى مەن مۇمكىندىكتەرىن دۇرىس باعىتتاي بىلسە بولعانى».

ايگۇل ۋايسوۆا

«شەكسىز بايلانىس» شەرۋى

 بۇل فلەش-موب مۇمكىندىگى شەكتەۋلى جانداردى بەلسەندى ءومىر سۇرۋگە شاقىردى.

رەسمي دەرەك بويىنشا, ەلىمىزدە مۇمكىندىگى شەكتەۋلى 650 مىڭعا تارتا ادام ءومىر سۇرۋدە. ولاردىڭ ومىرگە بەلسەنە ارالاسۋى ءۇشىن جانە دە قازاقستاندا ينكليۋزيۆتى, ياعني, جالپىعا ورتاق قوعامدى قۇرۋ ءۇشىن «شەكسىز بايلانىس» اتتى فلەش-موب ۇيىمداستىرىلدى.
ايتۋلى ءىس-شارا م.وتەمىسوۆ اتىنداعى وقۋشىلار سارايى الدىندا, اشىق اسپان استىندا وتكىزىلدى. قالا تۇرعىندارىن بەلسەندى ءومىر سۇرۋگە شاقىرۋ ماقساتىندا زاماناۋي بي قيمىلدارى كورسەتىلدى. جينالعان قاۋىم اراسىندا بي شەرۋى ۇيىمداستىرىلىپ, جەڭىمپازدارعا سىيلىقتار ۇلەستىرىلدى. فلەش-موب اياقتالعان سوڭ كوپشىلىك الدىندا الەۋمەتتىك اكتسيانىڭ ارنايى قوناقتارى, رەسەيدىڭ اتاقتى جۇلدىزدارى M-BAND پەن ۆيا گرا توبى ونەر كورسەتتى.

ايگەرىم بەيسەنبەكقىزى,
ل.گۋميلەۆ اتىنداعى ەۇۋ ءى كۋرس ستۋدەنتى

 ىزگىلىكتى شارا يگىلىگى

«ءبىز ينكليۋزيۆتى قوعام ءۇشىن» ۇرانىمەن ەلورداداعى №65 مەكتەپ-گيمنازيانىڭ ينكليۋزيۆتى سىنىپتارىنىڭ وقۋشىلارى اراسىندا رەسەيلىك ءانشى ميتيا فومين مەن قازاقستاندىق بەلگىلى تەلەجۇرگىزۋشى ايگۇل مۇكەيدىڭ قاتىسۋىمەن «ەرەسەكتەرگە ارنالعان 10 ساۋال» اتتى توك-شوۋ ءوتتى.

اتالعان وقۋ ورداسىندا مۇمكىندىگى شەكتەۋلى بالالارعا ءوز قاتارلارىمەن بىرگە تولىققاندى ءبىلىم الۋعا بارلىق جاعداي جاسالعان. مۇندا ەرەكشە بالالار ءۇشىن دەفەكتولوگ-ماماندار جانە بالامالى وقۋ باعدارلامالارى ەنگىزىلگەن. مەكتەپكە بىرنەشە جىلدان بەرى «Dara» قورى قايىرىمدىلىق كورسەتىپ كەلەدى. ايتۋلى شارانى – ايگۇل مۇكەي جۇرگىزدى. اسىرەسە, بالالار رەسەيلىك ءانشى ميتيا فومينگە: «كىمنىڭ پىكىرى ءسىز ءۇشىن قۇندى؟», «كىمدى ۇلگى تۇتاسىز؟» «قوعامدا ادامدار ءبىر-بىرىنە ءتوزىمدى بولۋ ءۇشىن نە ىستەۋ كەرەك؟» دەگەن وزدەرىن تولعاندىرىپ جۇرگەن ساۋالدارىن قويدى. ءانشى دە ءار جەتكىنشەكتىڭ سۇراعىنا تولىمدى جاۋاپ بەرىپ وتىردى. شوۋ دەڭگەيىندە وتكەن كەش وتە اسەرلى بولدى. بالالار اسەم اۋەن ىرعاعىمەن بيلەپ, كوڭىلدەرىن كوتەردى. قىزىقتى سۇراق قويعاندارعا سىيلىقتار تابىس ەتىلدى.
– بۇگىن مەكتەبىمىزدە اسەرلى شارا وتۋدە. اسىرەسە, ول بالالار ءۇشىن قىزىققا تولى بولىپ وتىر. مۇمكىندىگى شەكتەۋلى بالالاردى جالپى ءبىلىم بەرۋ جۇيەسىنە تارتۋ ءۇشىن جان-جاقتى جاعداي جاساۋ قاجەت. ينكليۋزيا دەگەنىمىز – بالالاردىڭ ءبىر سىنىپتا بىرگە وتىرۋى عانا ەمەس, ولاردىڭ ءوزارا تۇسىنىستىك جاعدايىندا ءومىر سۇرۋىنە مۇمكىندىك جاساۋ. سوندىقتان وسىنداي ىزگى شارالاردىڭ كوپ بولعانىن قالايمىز, – دەيدى №65 ينكليۋزيۆتى مەكتەپ ديرەكتورىنىڭ ورىنباسارى راۋان باقىت.

ازامات ەسەنجول

تاعىدا

ايگۇل ۋايسوۆا

اقپارات سالاسىنىڭ ۇزدىگى

ۇقساس جاڭالىقتار

پىكىر ۇستەۋ

Back to top button