باستى اقپاراتمادەنيەت

ەلوردانىڭ ەڭسەلى اق سارايى نەمەسە رەفورماتور رەجيسسەر

قازاق ونەرى كەڭىستىگىنەن ءوزىنىڭ ورنىن ويىپ تۇرىپ العان استانالىق «جاستار» تەاترىنىڭ قوس مەرەي­تويى بيىل قاتار كەلدى. رۋحانيات ورداسىنىڭ قۇرىلعانىنا 15 جىل تولسا, تەاتردىڭ نەگىزىن قالاعان رەفورماتور رەجيسسەر, قازاقستاننىڭ ەڭبەك سىڭىرگەن قايراتكەرى, اباي اتىنداعى مەملەكەتتىك سىيلىقتىڭ لاۋرەاتى نۇرقانات جاقىپباي مەرەيلى جەتپىس بەس جاستىڭ بەلەسىنە شىقتى. وسىعان وراي اتالمىش تەاتردا مەرەي­تويلىق كەش ۇيىمداستىرىلدى. سونىڭ بارىسىندا رەجيسسەردىڭ شىعارماشىلىعى جايلى «قيالدان قيانعا سامعاعان ءبىر پەندەڭ…» كىتابىنىڭ تانىستىرىلىمى, عىلىمي كونفەرەنتسيا جانە ۋ.شەكسپيردىڭ «رومەو-جۋلەتتا» تراگەدياسىنىڭ پرەمەراسى ءوتتى.

ونەر وشاعى مەن رەجيسسەردىڭ مەرەيتويىنا وراي كوپتەگەن قۇتتىقتاۋلار مەن جىلى لەبىزدەر ايتىلدى. پارلامەنت سەناتىنىڭ توراعاسى ماۋلەن  اشىمباەۆتىڭ  قۇتتىق­تاۋىن سەناتور نۇرتورە ءجۇسىپ, استانا قالاسى اكىمىنىڭ مىندەتىن اتقارۋشى التاي كولگىنوۆتىڭ قۇتتىقتاۋىن ونىڭ ورىنباسارى ەسەت بايكەن, قالالىق ءماسليحات حاتشىسى ەرلان كاناليموۆتىڭ لەبىزىن ءماسليحات دەپۋتاتى ەرلان داكەنوۆ وقىپ بەردى. سونىمەن قاتار مادەنيەت جانە سپورت ءمينيسترى داۋرەن اباەۆ پەن بىرقاتار وبلىس باسشىلارى, ەل ايماقتارىنداعى تەاترلار, ت.جۇرگەنوۆ اتىنداعى قازاق ۇلتتىق ونەر اكادەمياسى, روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى اتىنان قۇتتىقتاۋلار وقىلدى.

– «جاستار» تەاترى – ەڭسەلى ەلوردامىزدىڭ اق سارايى, سان قىرلى, جاسامپاز ونەر وردالارىنىڭ ءبىرى. ەلوردامىزدىڭ مادەنيەت سالاسىنىڭ دامۋىندا وزدەرىڭىز سىندى بىلىكتى مامانداردىڭ قاجىرلى ەڭبەگى جاتىر. 15 جىل ىشىندە كوپتەگەن قويى­لىم قويىپ, ەلىمىزدىڭ اتىن شەتەلدەردە تانىتىپ جۇرسىزدەر. ءمىنسىز قىزمەتتەرىڭىز ءۇشىن العىس ايتامىن.

قۇرمەتتى نۇرقانات جاقىپباي! ءسىزدى 75 جاس مەرەيتويىڭىزبەن شىن جۇرەكتەن قۇتتىقتايمىن! جىلدار بويى مول تاجىريبەڭىزبەن, كاسىبي بىلىكتىلىگىڭىزدىڭ ارقاسىندا ەلىمىزدىڭ مادەنيەت سالاسىنىڭ وركەندەۋىنە سۇبەلى ۇلەس قوسىپ كەلەسىز. ءومىر جولىڭىز جاس ۇرپاققا ۇلگى-ونەگە. تولايىم شىعارماشىلىق تابىس تىلەي وتىرا, الداعى ۋاقىتتا دا ورەلى ونەرىڭىزدى حالىق يگىلىگى جولىندا جۇمساي بەرۋىڭىزگە تىلەكتەسپىن, – دەلىنگەن استانا اكىمىنىڭ مىندەتىن اتقارۋشى­ ­التاي كولگىنوۆتىڭ قۇتتىقتاۋىندا.

وسىدان 15 جىل بۇرىن ەلوردادا «جاستار» تەاترىنىڭ قۇرىلۋىنا, ونىڭ كوركەمدىك جەتەكشىلىگىنە نۇرقانات جاقىپبايدىڭ تاعايىن­دالۋىنا استانا قالاسىنىڭ اكىمدىگى, سول كەزدەگى قالا اكىمىنىڭ ورىنباسارى ەرمەك امانشاەۆ ۇيىتقى بولدى. ەرمەك ءامىرحانۇلى تەاتردىڭ قۇرىلۋ تاريحىن, كورنەكتى رەجيسسەردىڭ كەلۋىن ەسكە الدى.

– استانا جاستار قالاسى بولعاننان كەيىن ءبىزدىڭ الدىمىزدا جاستار تەاترىن اشۋ ماقساتى تۇردى. سول كەزدە مەنىڭ ويىما ەڭ الدىمەن, نۇرقانات جاقىپباي ءتۇستى. الماتىدا جۇرگەن ەدىم, بىردەن سول كىسىگە زۆوندادىم. ول استاناعا جيىرما بەس شاكىرتىمەن كەلدى. بۇل – ەلوردامىزدىڭ ەندى قالىپتاسىپ كەلە جاتقان كەزى. بىردەن بارىنە جاعداي جاساۋ مۇمكىن بولعان جوق. دەگەنمەن, «جاستار» سارايىنان ورىن بەردىك. كەيىننەن بەيبىتشىلىك جانە كەلىسىم سارايىندا, وقۋشىلار سارايىندا ءبىراز وتىردى. قاليبەك قۋانىشباەۆ تەاترىنىڭ ساحناسىندا سپەكتاكلدەرىن قويىپ ءجۇردى. بىرتە-بىرتە ماقتان تۇتار تەاترىمىزعا اينالدى. استانانىڭ «جاستار» تەاترى – بۇگىنگى تاڭدا ەلىمىزدەگى ەڭ بەدەلدى, ەڭ اتاقتى, شىعارماشىلىق الەۋەتى, جەتكەن جەتىستىكتەرى جاعىنان الدىڭعى قاتارلى تەاتر, – دەدى ەرمەك امانشاەۆ.

جۋرناليست, تەاترتانۋشى نازەركە جۇمابايدىڭ «قيالدان قيانعا سامعاعان ءبىر پەندەڭ…» كىتابىنىڭ تانىستىرىلىمىن بەلگىلى اقىن, مەملەكەتتىك سىيلىقتىڭ لاۋرەاتى نۇرلان ورازالين مەن «جاستار» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى ءادىل احمەتوۆ جۇرگىزدى. كىتاپتىڭ تۇساۋىن مەملەكەت جانە قوعام قايراتكەرى قۋانىش سۇلتانوۆ پەن بەلگىلى عالىم, فيلولوگيا عىلىمدارىنىڭ دوكتورى, پروفەسسور ءادىل احمەتوۆ كەسىپ, جىلى لەبىزدەرىن جەتكىزدى. قىر­عىز رەسپۋبليكاسىنىڭ ەڭبەك سىڭىرگەن قايراتكەرى, ۇلتتىق تەلەۆيزياسىنىڭ ديرەكتورى قايرات يماناليەۆ «جاستار» تەاترى مەن نۇرقانات جاقىپ­بايدىڭ ونەرى قىرعىزستاندا جوعارى باعالاناتىنىن, جازدا ەلدەرىنە ارنايى شاقىرىپ, تەاتر مەن رەجيسسەردى مەرەيتويلارىمەن قۇتتىقتاعاندارىن, قىرعىزدىڭ مادەنيەت جانە قوعام قايراتكەرلەرى اتىنان نۇرقانات جاقىپبايعا قازاقستاننىڭ ەڭبەك ەرى اتاعىن بەرۋ ءۇشىن قازاقستان پرەزيدەنتىنە حات جولداعاندارىن ايتتى.

ءماجىلىس دەپۋتاتى امانجول ءالتاي نۇرقانات جاقىپبايدى مەرەيتويىمەن قۇتتىقتاپ, استىنا ات مىنگىزدى, يىعىنا شاپان جاپتى. استاناداعى مۋزىكالىق جاس كورەرمەن تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى, Phd دوكتورى اسحات ماەميروۆ نۇرقانات جاقىپبايدىڭ شىعارماشىلىعى جايىندا مازمۇندى بايانداما جاسادى. «جاستار» تەاترىنىڭ العاشقى ديرەكتورى, قازاقستاننىڭ ەڭبەك سىڭىرگەن قايراتكەرى عاني قۇلجانوۆقا, تەاتردىڭ بۇرىنعى ديرەكتورلارى ايبولات جانعاليۇلى مەن ەرنار جۇماتاەۆقا قۇرمەت كورسەتىلدى.

قازاقستاننىڭ حالىق جازۋشىسى, مەملەكەتتىك سىيلىقتىڭ يەگەرى, قازاقستاننىڭ ەڭبەك ەرى ءابىش كەكىلباەۆ اۋدارعان «رومەو مەن دجۋلەتتا» تراگەدياسى نۇرقانات جاقىپبايدىڭ قولتاڭباسىندا ەرەكشە بولىپ شىقتى. ۋيليام شەكسپيردىڭ شىعارماسى بولعانىمەن, رەجيسسەر سپەكتاكلدى ۇلتىمىزعا نەعۇرلىم جاقىنداتقان. بۇل ­ «رومەو-جۋلەتتا» دەيتىن اتاۋىنان, كەيىپكەرلەردىڭ كيىمدەرىنەن, جانداۋلەت باتاي سومداعان ءپىرادار اتتى كەيىپكەردىڭ قوسىلۋىنان كورىندى. قويىلىم مۋزىكاسى دا شىعىس سارىنىندا بولدى. سپەكتاكلگە تسيرك ەلەمەنتتەرى دە قوسىلدى. كەش وسى تراگەديانىڭ پرەمەراسىمەن تۇيىندەلدى.

تاعىدا

ۇقساس جاڭالىقتار

پىكىر ۇستەۋ

Back to top button